Rusiyadakı azərbaycanlıların kütləvi qayıdışı gözlənilir? |
Müəllif: Admin | Bölmə: Xəbərlər | Vaxt: 16-12-2015, 19:17 | Şərh sayı: (0) | Baxılıb: 236
Rusiyadakı azərbaycanlıların kütləvi qayıdışı gözlənilir?
Rusiyada yaşayan azərbaycanlıların vətənə göndərdikləri pul vəsaitlərinin həcmi daha da azalacaq.
Rusiyadakı iqtisadi böhran nəticəsində MDB respublikalarından bu ölkəyə qazanc dalınca gedənlərin vətənlərinə göndərdikləri pulların həcmi kəskin azalıb. Rusiya Mərkəzi Bankının yaydığı məlumata görə, bu ilin 9 ayı ərzində azərbaycanlı əmək miqrantlarının Azərbaycandakı yaxınlarına göndərdikləri pulların məbləği cəmi 272 milyon dollar təşkil edib. Ötən il isə bu məbləğ 456 milyon dollar idi. Bu, sürətli pul köçürmələri əsasında qeydə alınmış statistikadır.
Bəziləri hesab edir ki, bunun əsas səbəblərindən biri Rusiya hökumətinin ölkədən kapital axınına qoyduğu məhdudiyyətlə bağlıdır. Belə ki, ötən ilin oktyabr ayından etibarən Rusiya Mərkəzi Bankı bankların xaricə köçürdüyü bəzi pul əməliyyatlarına, xüsusilə offşor zonalarda qeydiyyatdan keçmiş şirkətlər vasitəsilə ölkədən kənara maliyyə köçürmələrinə qadağa qoyub.
Amma miqrasiya məsələləri üzrə ekspert Azər Allahverənov Milli.Az-a bildirib ki, Rusiyadan gələn maliyyə axınının azalmasının digər səbəbləri də var: "Əsas səbəb budur ki, əvvəla oradakı azərbaycanlı miqrantların sayı getdikcə azalır. Bu isə Qərb ölkələri tərəfindən Rusiyaya qarşı tətbiq olunan sanksiyaların iqtisadiyyata, ticarətə mənfi təsir göstərməsi ilə bağlıdır. İş yerlərinin, istehsalat müəssisələrinin, iqtisadi yönümlü layihələrin bağlanması əmək miqrantlarının, o cümlədən azərbaycanlıların iş yerlərini itirməsinə gətirib çıxardı. İkincisi, rus rublunun qeyri-sabitliyi, məzənnənin tez-tez dəyişməsi, inflyasiya ticarətə mənfi təsir etdi. Bu sahədə isə azərbaycanlılar çox təmsil olunur".
Üçüncü səbəb Rusiya hökumətinin qeyri-qanuni miqrasiya ilə mübarizə çərçivəsində miqrasiya siyasətini sərtləşdirməsi ilə bağlıdır: "Yanvar ayından etibarən Rusiya hökuməti burada inzibati qayda pozuntusuna yol vermiş şəxslərə ölkəyə 3, 5, 10 illik giriş məhdudiyyəti qoydu. Bu da orada yaşayan azərbaycanlılarının sayının azalmasına təsir etdi. Ötən ilin oktyabrında Rusiyada 615 min azərbaycanlının yaşadığı bildirilirdi. Onlardan bir qismi əmək fəaliyyəti ilə məşğul olurdu. Rusiyanın Federal Miqrasiya Xidmətinin bu il noyabrın 1-nə olan rəsmi məlumatına görə isə, Rusiyada təxminən 532 min azərbaycanlı yaşayır. Yəni Rusiyadakı azərbaycanlıların sayı təxminən 85 min nəfər və ya 14 faiz azalıb. Bu, kifayət qədər böyük rəqəmdir və son nəticədə özünü Rusiyadan Azərbaycana göndərilən maliyyə vəsaitlərinin həcmində biruzə verdi. Əgər ötən il bank vasitəsilə yarım milyard dollara qədər vəsait köçürülübsə, təxminən bir o qədər də digər yollarla göndərilib. Bu da təxminən milyard dollara qədər vəsait edir. Bu il isə bu rəqəm, demək olar ki, 2 dəfə azalıb. Yəni Rusiyadan gələn maliyyə axınının azalması həm oradakı azərbaycanlıların sayının, eləcə də onların gəlirlərinin azalması ilə şərtlənir. Əgər 2016-cı ildə dünya bazarında neftin qiymətinin enməsi tendensiyası davam edərsə, bu, Rusiya üçün yeni iqtisadi çətinliklər yaradacaq. Bu çətinlik orada əmək fəaliyyəti ilə məşğul olan insanların maddi rifahına birbaşa mənfi təsir edəcək. Ona görə də əminliklə deyə bilərəm ki, gələn il Rusiyada yaşayan azərbaycanlıların vətənə göndərdikləri pul vəsaitlərinin həcmi daha da azalacaq".
Lakin ekspert hesab edir ki, bütün bu çətinliklər Rusiyadakı azərbaycanlı miqrantların kütləvi surətdə ölkəyə dönüşünə gətirib çıxarmayacaq: "Şübhəsiz ki, miqrantların bir qisminin geriyə dönüşü baş verə bilər, lakin kütləvi axın olmayacaq. Düzdür, Rusiyadakı azərbaycanlıların gəlirləri azalır, amma onlar özlərinin gündəlik ehtiyaclarını ödəyəcək qədər qazanc əldə edə biləcək iqtidardadırlar. Əgər soydaşlarımız bu imkanları da itirsələr, o zaman onların Azərbaycana dönüşü baş verə bilər".
İlkin İzzət
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər