Erməniləri yenidən danışıqlar aparmağa vadar edən amil |
Müəllif: Admin | Bölmə: Xəbərlər | Vaxt: 5-10-2015, 16:31 | Şərh sayı: (0) | Baxılıb: 299
Erməniləri yenidən danışıqlar aparmağa vadar edən amil
Cəbhə xəttində ermənilər tərəfindən atəşkəsin pozulması halları davam edir. Azərbaycan torpaqlarının 20 faizini işğal altında saxlayan Ermənistan ordusu təxribatlardan əl çəkmir. Bunun qarşılığında isə Azərbaycan tərəfdən layiqli cavab alır. Lakin bu gün Azərbaycan Ordusunun qarşısında duran əsas vəzifə düşmənin həmlələrini dəf etməklə yanaşı, həm də lazım gələcəyi təqdirdə, işğal altında olan ərazilərimizi geri qaytarmaqdır. Bəs, görəsən, Azərbaycan əsgəri buna nə dərəcədə hazırdır? Onların döyüş ruhu necədir? Bu istiqamətdə hansı işlər görülür?
El TV ( Region TV) xəbər verir ki, cəbhə xəttində davam edən gərginlik fonunda Azərbaycan ordusu düşmənə layiqli cavab verir. Yola saldığımız həftəyə nəzər salsaq görərik ki, sentyabrın 27-də gün ərzində və 28-ə keçən gecə Silahlı Qüvvələrimizin bölmələrinin qabaqlayıcı tədbirləri nəticəsində qoşunların təmas xəttində düşmənin fəallaşmaq cəhdinin qarşısı alındı. Qarşı tərəfin 7 hərbi qulluqçusu məhv edildi, çoxlu sayda yaralısı oldu. Oktyabrın 1-i və 2-də qoşunların təmas xəttində müxtəlif istiqamətlərdə Azərbaycan Silahlı Qüvvələrinin bölmələrinin həyata keçirdiyi qabaqlayıcı və vaxtında görülən tədbirlər nəticəsində düşmənin hərəkət fəaliyyətinin qarşısı alındı. Silahlı Qüvvələrimizin bölmələrinin vurduğu zərbələrlə qarşı tərəfin iki hərbi qulluqçusu məhv edildi, xeyli sayda yaralısı oldu. Göstərilən müddətdə düşmənlə ağır döyüşlərdə cəbhənin müxtəlif istiqamətlərində Silahlı Qüvvələrimizin 3 hərbi qulluqçusu şəhid oldu. Bir sözlə, düşmən Azərbaycan tərəfi ilə müqayisədə dəfələrlə çox itki verdi. Şəhid olan Azərbaycan oğulları layiqli şəkildə torpağa tapşırıldılar.
Şəhid olan hərbçilərimizin valideynləri və yaxınları bunu "Təki Vətən sağ olsun!" deyərək qarşıladılar. Elə bir müddət öncə düşmənin həmləsini dəf edərkən gülləyə tuş gələn Ağcabədi rayonundan olan əsgər Anar Atayevin anası kimi.
Hazırda hərbi xidmətdə olan əsgərlər isə şəhid anasını oğlunun qanının yerdə qalmayacağına əmin edirlər.
Hərbi qulluq müddətini başa vurub, evə qayıtmalı olan əsgərlər də Vətənə xidmətlərini davam etdirmək istəyirlər.
Bu gün çiynində silah Vətənin keşiyini çəkən Azərbaycan əsgəri isə tək deyil. Ali baş komandanın bir əmri ilə bütün Azərbaycan xalqı işğal altındakı torpaqların azadlığı uğrunda döyüşə atılmağa hazırdır. Sentyabrın 6-dan 13-dək Silahlı Qüvvələrin bütün qoşun növlərinin döyüşə hazırolma və döyüş qabiliyyətinin yoxlanılması məqsədi ilə keçirilən Komanda Qərargah Hərbi Oyunları zamanı bir sıra rayonlarda təşkil olunan tədbirlər də bunu sübut etdi. Xalqımızın orduya, qələbəyə olan inam hissini göstərdi. Həmin tədbirlərdə bir daha vurğulandı ki, Azərbaycan Silahlı Qüvvələri işğal edilmiş torpaqlarımızı istənilən vaxt azad etməyə hazırdır. Lakin ölkə rəhbərliyi Qarabağ probleminin sülh, danışıqlar yolu ilə həllini üstün tutur. Əgər düşmən məkrli niyyətindən əl çəkməzsə, o zaman ordu ilə xalqın birliyi öz sözünü deyəcək. Çünki indi hər bir Azərbaycan vətəndaşı erməni tapdağındakı ərazilərimizin azad olunacağına ümid bəsləyir. Elə işğal altındakı Laçın rayonundan olan qadın kimi: "Ax Laçın, sinəndə bir də gəzə biləydim".
İndi Azərbaycan əsgərinin qarşısında duran əsas məsələ də lazım gələcəyi təqdirdə, döyüşə atılmaq, doğma yurdlarından didərgin düşən yüz minlərlə insanın dədə-baba torpağına qayıtmasını təmin etməkdir. Bu məqsədlərə adekvat ordu da formalaşdırılır. Xarici ölkələrdən ən yeni texnologiyalarla təchiz olunan hərbi texnikalar alınır: "Düşmənlə təmas xəttinə Azərbaycan son illər ərzində xüsusi hərbi texnikalarını, çox müasir texnoloji avadanlıqlarını yerləşdirib. Onların böyük əksəriyyəti elektron qurğulardır. Yüksək NANO texnologiyalarla olan silahlardır. Bunlar düşmənə istənilən anda zərbə vurmağa imkan verir", - deyə Milli Məclisin Təhlükəsizlik və Müdafiə Komitəsinin üvzü Zahid Oruc bildirib.
Atılan addımlar hərbi və siyasi müstəvidə bəhrəsini də verir. Ermənistan getdikcə qüvvətlənən Azərbaycan və Cənubi Qafqazın ən güclüsü olan Azərbaycan Ordusu qarşısında dayanmağın mümükünsüzlüyünü anlayır: "Durum ondan ibarətdir ki, apardıqları siyasət Ermənistanın maddi vəziyyətini pisləşdirib. Əhalidə Ermənistan hakimiyyəti və ordusuna bir inamsızlıq sindromu yaranıb. Eyni zamanda cəbhə xəttində erməni provokasiyasına Azərbaycan ordusunun layiqli cavabı Azərbaycanın artıq bir güc olduğunu göstərir. Artıq bunu Ermənistanın özü də etiraf etməyə məcburdur", - deyə millət vəkili, politoloq deyə Aydin Mirzəzadə bildirib.
Hələlik isə nəticə ondan ibarətdir ki, uzun müddət danışıqlar masasından yayınan Ermənistan cəbhə xəttində Azərbaycan ordusundan layiqli cavablar alandan sonra yeni görüşlərə təşəbbüs göstərir. Ekspertlərin fikrincə, Azərbaycan və Ermənistanın xarici işlər nazirləri arasında keçirilən son görüş danşıqların yeni mərhələsinin başlanğıcıdır. Bu danışıqlar prezidentlərin növbəti görüşü üçün zəmin yaradıb. Bu ilin noyabr ayının sonu, dekabrın əvvəllərində Azərbaycan və Ermənistan prezidentlərinin görüşü gözlənilir. Həmin görüşdə yaranmış vəziyyət, danışılqların ölü nöqtədən tərpədilməsi və digər məsələlərin müzakirə ediləcəyi istisna deyil.
Azərbaycan Ordusu indi əvvəlkindən daha güclüdür. Hər bir Azərbaycan vətəndaşı da əsgər paltarını geyinib ermənilər tərəfindən işğal edilən torpaqlarımızı azad etməyə hazırdır. İndi hər şey Ermənistanın tutacağı mövqedən, yəni sülh və ya müharibə yolundan asılıdır. Azərbaycan isə istənilən halda işğal altındakı torpaqlarını azad etməkdə qərarlıdır və buna qadirdir.
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər