Devalvasiyaya etiraz - çadır toylarına keçid... |
Müəllif: Admin | Bölmə: Xəbərlər | Vaxt: 14-01-2016, 19:56 | Şərh sayı: (0) | Baxılıb: 206
Devalvasiyaya etiraz - çadır toylarına keçid...
Toy israfçılığından yeganə çıxış yolu budur Manatın devalvasiyasının zərbə vurduğu sahələrdən biri də toy biznesidir. Qəzetimizin ötən saylarında bildirmişdik ki, bir çox şadlıq saraylarında, restoranlarda ciddi durğunluqdur. Hətta yanvar ayında cəmi bir toy mərasimi üçün sifariş qəbul edən restoranlar da vardı.
Təbiətin qanunudur: insanlar evlənməli, nəsil artırmalı və bəşəriyyət öz axarı üzrə inkişaf etməlidir. Bəs necə etməli? İqtisadi böhran Azərbaycanda evlənmək istəyənlərin də gözünü qorxudubsa, bunun səbəbi sözügedən prosedurun həddən artıq məsrəfli olmasıdır.
Xərclərin əsas hissəsi isə heç şübhəsiz ki, şadlıq evlərinə sərf olunur. İnsanlar minlərlə manatı şadlıq sarayına ödəyir. Hətta bəzi hallarda şadlıq sarayına borclu da qalır: “Bəyi girov saxladılar”, “Şadlıq sarayına borcunu ödəyə bilmədi, bəyin atası girov qaldı”... Neçə dəfə bu sayaq xəbərləri oxumuşuq...
Hətta indiki iqtisadi böhran şəraitində toy keçirməyə tərəddüd edənləri görənlər yarızarafat-yarıciddi şəkildə “bəlkə bizim millətin şöhrətpərəstliyinin öhdəsindən bu devalvasiya gəldi” fikrini səsləndirirlər. Bəli, “camaat nə deyər” prinsipi ilə şadlıq sarayı sahiblərini varlandırmağı özünün ümdə vəzifəsi hesab edən azərbaycanlılar üçün bu krizisin bir çıxış yolu olduğunu düşünənlər az deyil.
Və bunun alternativi də var. Toy etmək üçün yeganə ünvan şadlıq sarayları deyil. Bakı kəndlərində illərdən bəri davam edən çadır toyları artıq populyarlaşmağa başlayıb. Komplekslərindən qurtulanlar bu üsula baş vura bilərlər.
Çadır toylarına keçmədən öncə xatırladaq ki, insanların toyxana biznesinə verdikləri yersiz töhfələrlə bağlı illərdir müzakirələr gedir. Hətta hakimiyyət deputatları bunun qarşısını almağın mütləqliyi barədə fikirlər səsləndirirlər. Yeni Azərbaycan Partiyası (YAP) icra katibinin müavini, deputat Siyavuş Novruzov da toy mərasimlərində israfçılığın əleyhinədir.Azvision.az-a açıqlamasında S.Novruzov deyib ki, toy mərasimləri ailə xoşbəxtliyinə deyil, restoran müdirlərinə işləyir.
Yaxşı, bəs çadır toylarının toy sahibinin, qonaqların, gənc cütlüyün cibinə necə xeyri var? İlk növbədə bu toylarda menyu sərbəstdir. Süfrədə hansı təamların, neçə cür, neçə ədəd olmasını ev sahibi özü müəyyənləşdirir. 15 salatı masaya düzdürüb, “düşmən bağrı çartlatmaq” kimi bir öhdəlikdən söhbət gedə bilməz.
Çadır toylarında aşpazın işi çətin olur. O, masanı daim təzə, isti yeməklərlə təmin etməlidir. Menyu isə o qədər də zəngin olmur: bozartma, küftə bozbaş, kabab, buğlama... Bunlarla paralel, qəlyanaltıların da sayı az olur. Beləcə, masa bir neçə dəfə ucuz başa gəlir. İnsanlar həm dadlı, təzə yeməklərlə doyur, həm də ev sahibi əlavə xərc çəkmir.
Bu arada çadır toyuna gələnlər də nəmər olaraq astronomik məbləğdə pul yazdırmır. Yəni restoranda masanın qiyməti 40-50 manat olanda qonaq istər-istəməz bundan artıq məbləğdə nəmər yazdırmalı idi. Amma çadır toyları üçün belə bir öhdəlik yoxdur. İnsanlar, necə deyərlər, “könlündən qopan” məbləği gənc cütlüyə hədiyyə edir.
Bu dəbin Bakı kəndlərində adət halını alması insanların keçmiş adətlərinə maraq göstərməsidir. Amma bundan sonra çadır toyları geniş vüsət alacaqsa, bu, sırf maddiyyatla bağlı olacaq. Qonaqlar boyat yemək yeməyəcək, ev sahibi isə daha az xərcə düşəcək. Ümumiyyətlə, çadır toyları Binəqədi, Goradil, Biləcəri, Maştağa, Digah, Novxanı və Nardaran kəndlərində keçirilir. Azərbaycanın bölgələrində isə daha çox cənub rayonları bu ənənəyə sadiqdir.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər