Turp da əkməliyik |
Müəllif: Admin | Bölmə: Xəbərlər | Vaxt: 2-02-2016, 10:09 | Şərh sayı: (0) | Baxılıb: 248
Turp da əkməliyik
Beynəlxalq reytinq agentlikləri Azərbaycanın iqtisadi durumunu mənfi qiymətləndirir, artıq heç kim ölkəmizə kredit vermək istəmir. Deyirlər gedin özünüz öz başınıza çarə qılın. Bu mənada AzərTAc dövlət informasiya agentliyinin hazırladığı “Xərək çörəyi bişirin, devalvasiyadan qurtulun” başlıqlı material çox yerinə düşübdür. İstəyənlər bu iqtisadi reseptlə saytda tanışa ola bilər, əgər ermənilər oğurlamayıbsa hələ orda qalmalıdır. Mən 4-5 gün qabaq oxumuşdum, özümə gələ bilmirdim, az qala kəndə gedib xərək çörəyi bişirirdim. Bilməyənlər varsa bilsinlər: xərək çörəyi Azərbaycanın şimal rayonlarında - Xaçmaz, Qusar tərəflərdə bişirilən bir çörək növüdür. Bir az alaçiy bişirilir, klassik təndir çörəyimizdən fərqlidir, Anadolu türklərinin Bakıda açdıqları kafelərdə verilən çörəyə xeyli bənzəri vardır. Uzun sözün qısası, AzərTAc krizisdən çıxmağımız üçün Xaçmazın Çiləgir kəndinə xüsusi müxbir göndərib, müxbir yoldaş orada kənd sakinləri ilə xərək çörəyini bişirmək haqda geniş söhbət aparmışdır. Sitat: “Dörd övlad böyüdüb boya-başa çatdıran Sürəyya Mahmudova kolxoz dövründə mühasib, həyat yoldaşı isə anbardar vəzifəsində çalışıb. Bununla belə daim həyətyanı sahələrində tərəvəz məhsulları əkib, mal-qara, toyuq-cücə saxlayıb. O deyir ki, insan işdən qorxmamalıdır. Elə bir iş yoxdur ki, onun öhdəsindən gəlmək mümkün olmasın. Sadəcə həvəs, istək olmalıdır. İndi sakinlərin əksəriyyəti kənd təsərrüfatından uzaq düşüb. Kəndlə şəhərin fərqi qalmayıb. Hər şeyi bazardan alırlar. Hətta adi göyərtini də. Amma bolluq olması üçün torpaqlarımızı əkib becərmək lazımdır. Bizim torpaqlarımız qədər bərəkətli-ruzili yer yoxdur”. Sitatın sonu.
Daha sonra müxbir Xaçmazdan Bakıya xəyali səyahət edir. Yazır ki, paytaxtda yaşamaq, qutu binalarda ömür sürmək xəstəlikdir, hər bir insan təbiətin qoynuna, kəndə qayıtmalıdır, yazıçı-deputat, “Çadırda deputat yarana bilməz”, “Dolu soğan kisəsi”, “Batmanqaşıq” kimi gözəl romanlar müəllifi Aqil Abbasın dediyi kimi, soğan əkməyə getməlidir. Mən də bu ülvi arzulara qoşuluram. Sözgəlişi, Ülvi Quliyev adında bir deputat da var idi, onun axırı necə oldu, xəbəri olan varsa yazsın. Mənə yox, heç mənə lazım da deyil, Oqtay müəllimə yazsın, bəlkə deputatxana müdirinin heç xəbəri yoxdur, bəzi deputatlar sessiyalar arası fasilələrdə itkin düşürlər.
Hesab edirəm dövlət agentliyi çox haqlıdır. Biz özümüz də təbiətdən uzaq düşmüşük. Hamımız Avropa Oyunları, kosmosa “Azərsat” peyki uçurtmaq, Formula-1 yarışında maşın toqquşdurmaq, beynəlxalq multikulturizm tədbirləri kimi işlərə məşğuluq, nə soğan əkən var, nə qoyun qırxan. Dözülməz haldır. Elə rayon prokurorluq orqanları var ki, onların binasında mənasız istintaq hərəkətləri aparmaqdansa istixana açılsa, iki lək xiyar, üç lək pomidor, bir şax lobya, beş cız kələm əkilsə daha bərəkətli olar. Vallah, ciddi sözümdür. Yoxsa indi uca millətdə də qəpik-quruş qalıb, tutub soymaq olmur. Süd verməyən inəyi ətliyə göndərməlisən, biz Hindistanda yaşamırıq, inəklər qocalıb öz əcəliylə ölə bilməz. Ya get toyuq basdır, ya da özün orqanlardan bas bayıra! Bu cür hökmlü olmalıyıq. Yoxsa dövlətçilik dağılar.
Bu mənada, yeri gəlmişkən, keçmiş türmə rəisi, indi dövlətin təhlükəsizliyinə baxan şəxsiyyətin Zaqatala rayon türməsi sakinləri ilə görüşməsi, kəndlərdəki islah-əmək, islat-çırp, ishal-qarınağrısı cəzaçəkmə müəssisələrinə xəbərdarlıq etməsi layiqli addım idi. Türmənin fərqi yoxdur, əsas odur içəridə qiyama yol verilməsin, vaxtında “şmon”, bardak və bespredellər, duşnyaklar həyata keçirilsin.
Elə məhkumların başında turp əkilməsi də hardasa kənd təsərrüfatının inkişafına töhfədir. Yoxsa hamı girib qutu-türmələrə, turp əkən yoxdur. Gərək turp əkməyi də Aqil müəllim məsləhət bilsin? Özünüz əkə bilmirsiniz?
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər