Bazarlarda qiymət necədir? - HƏFTƏLİK MONİTORİNQ |
Müəllif: Admin | Bölmə: Xəbərlər | Vaxt: 28-01-2016, 20:54 | Şərh sayı: (1) | Baxılıb: 506
Bazarlarda qiymət necədir? - HƏFTƏLİK MONİTORİNQ
Ötən bir həftə ərzində paytaxt bazarlarında kənd təsərrüfatı məhsullarının qiymətində bahalaşma olmayıb. Əksinə bəzi məhsulların qiymətində ucuzlaşma müşahidə olunur. APA TV qiymətlərlə bağlı paytaxtın “Təzə bazar”, “Yaşıl bazar” və “8-ci kilometr bazarı” adlanan tanınmış satış mərkəzlərində monitorinqlər aparıb.Əhalinin ən çox istifadə etdiyi kənd təsərrüfatı məhsullarından biri kartofdur. İlin hər fəslində tələbat olan bu tərəvəzin bir kiloqramı 70-90 qəpikdən satılır. Bazarlarda əsasən, Şəmkir və Tovuz rayonlarından gətirilmiş kartof məhsulları satışa çıxarılıb, ötən həftə ilə müqayisədə satışda çox az miqdarda Gədəbəy kartofuna rast gəlinir. Satıcılar bunu havaların şaxtalı keçməsi, dağlıq bölgələrdə yolların buz bağlaması ilə əlaqələndirir. Hava şəraitinin nəqliyyatın hərəkəti üçün əlverişsiz olması dağlıq bölgələrdən Bakıya kənd təsərrüfatı məhsullarının gətirilməsinə mane olur. Bazarda qiymətlər tələb-təklif qanununa əsasən müəyyənləşir, məntiqlə ən azı Gədəbəydən bazara kartof gətirilməməsi qiymətlərin bahalaşmasına səbəb olmalı idi. Lakin bu baş verməyib. Satıcıların sözlərinə görə, bazarda yerli məhsulla yanaşı Rusiya, Belarus, Polşa və İrandan gətirilən kartof məhsulları da satılır, bu isə bazarda qıtlıq yaranmasını qarşısını alır. Eyni zamanda xaricdən əlavə həcmdə kartof gətirilməsi qiymətlərin nəinki bahalaşmasının qarşısını alıb, üstəlik qiymətləri nisbətən ucuzlaşdırıb.
Bazarlarda soğanın qiymətində də ucuzlaşma var. Tovuzdan gətirilmiş soğanın qiyməti 60-70 qəpik arasında dəyişir. Göyərti məhsullarının qiymətində də ucuzlaşma var. Buna havaların şaxtalı keçməsi də təsir göstərib. Hazırda monitorinq aparılan bazarlarda göyərtinin bir dəstəsinin qiyməti 5-15 qəpik arasında dəyişir.
Ət və balığın qiymətində ciddi dəyişiklik yoxdur. Mal ətinin qiyməti 6-7 manat, quzu ətinin qiyməti 9-10 manatdır. Bəzi balıq məhsullarının qiyməti isə bahalaşıb. Ötən həftə kütümün kiloqramı 7 manata satılırdısa, bu həftə qiymət 9 manata qalxıb. Satıcılar qiymətlərin qalxmasının havaların şaxtalı keçməsi, balıqçıların Xəzərə ova getməməsi ilə əlaqələndirir. Onların sözlərinə görə, dəniz balıqlarının qiyməti havalar normallaşdıqdan sonra yenidən ucuzlaşacaq. Çay balıqlarının qiymətində isə elə bir dəyişiklik yoxdur. Toyuq ətinin qiymətində isə ucuzlaşma var, bu, təklifin tələbdən artıq olması ilə əsaslandırılır. Gec bişən, orta çəkisi 800 qramdan 1 kiloqramadək olan kənd toyuğunun qiyməti ötən həftə 4 manat idisə, indi belə toyuqlar 3 manat əlli qəpiyə satılır.
Meyvələrin qiymətində də ucuzlaşma müşahidə olunur. Süfrəlik palmet və smerinka sortundan almaların qiyməti 50 qəpik - 1 manat arasında dəyişir. Armudun qiyməti isə sortundan asılı olaraq 1-1,5 manatdır. Narıngi 1,20 qəpik, portağal 1,70-2 manatdır, heyva yerli və xarici məhsul olmasından asılı olaraq 50 qəpik - 2 manata satılır. Meyvələr arasında ən bahalısı nardır, mövsümi meyvə olsa da, narın qiyməti 2,5 manatdan başlayır.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər