Tikinti materialları bazarında da qiymətlər artıb |
Müəllif: Admin | Bölmə: Xəbərlər | Vaxt: 8-01-2016, 21:00 | Şərh sayı: (0) | Baxılıb: 707
Tikinti materialları bazarında da qiymətlər artıb
Manatın dollara nisbətdə kəskin ucuzlaşması ölkədə bir çox məhsulların qiymətinin bahalaşmasına səbəb olub.
Musavat.com-un əməkdaşı Dərnəgül yolunda yerləşən tikinti materialları bazarında şahidi olub ki, bütün materialların qiymətində artım var.
Tikinti materialları bazarında müştəri çox az olsa da, satıcılar qiymətləri qaldırmağa məcbur olduqlarını bildirdilər. Ümumiyyətlə, hazırda bazarda qəribə sakitlik müşahidə olunur. Mal sahibləri girişlərdə olan xüsusi tikililərdə əyləşərək, müştərinin gəlməsini gözləyirlər. Ara-sıra bazara üz tutan müştərlər isə yeni qiymətlərdən xəbər tutunca, gəldikləri kimi də geri dönürlər. Satıcılar bildirirlər ki, dolların məzənnəsində kəskin artım onları qiymətləri bahalaşdırmağa məcbur edib. Bundan sonra da bahalaşmanın davam edəcəyi gözləniləndir. Bazarda alıcılar da qiymətlərdən şikayətlənirlər.
Rahim adlı alıcı ilə söhbətimiz zamanı o, bildirdi ki, Sulutəpə ərazisində ev tikir. Daha öncə hesabladığı məbləğlə hazırkı qiymətlər arasında təxminən 10-15 min manat arasında fərq var: “Belə bilsəydim, heç ev tikməyə başlamazdım. Əvvəllər hesablayırdıq ki, 30 min manata normal ev tikib, içərisinə yerləşə bilərik. Tikintiyə başlamamışdan öncə smeta da tərtib etmişdim. İndi hesablayıram ki, həmin smetadan 10-15 min manat artıq xərcim çıxacaq. Hələ deyirlər ki, bahalaşma davam edəcək. Bütün materialların qiyməti qalxıb”.
Satıcılar isə bildirirlər ki, heç kim müştərisini itirmək istəməz. Bu cür qiymət artımı onlara da sərf etmir.
Belə ki, hazırda bu bazarda qiymətində ən çox artım olan tikinti materialı taxtadır. Taxtanın 1 kubu 280-300 manatadır. Bu isə manatın ikinci devalvasiyasından öncəki qiymətdən təxminən 101-121 AZN bahadır.
Taxta satıcısı Ruslan bildirdi ki, qiymətlərin daha da artacağı istisna deyil: “Əvvəllər ucuz alırdıq, ucuz satırdıq. İndi dolların qiymətinin qalxmasına görə məcbur olub, biz də qiymətləri qaldırmışıq. Bundan sonra qiymətlərin necə olması da məzənnədən asılıdır. Qiymətlərdə artım da ola bilər, enmə də”.
Daşlara gəlincə, tamet daşlarının qiymətində hələ ki, bahalaşma yoxdur. Satıcılar bildirirlər ki, gətirdikləri material satılıb, qurtardıqdan sonra qiymət artımı ola bilər. Hazırda tamet daşlarının qiyməti 6-8 manat arasında dəyişir.
Mərmərlərin isə bütün növlərinin satış qiyməti artırılıb. Hazırda bazarda ən ucuz mərmərin kvadratı 40 AZN-dir ki, daha öncə bu, 30 AZN olub. Mərmərin qiyməti 40-60 manat arasında dəyişir.
Sementin isə qiyməti qalxmayıb. Satıcılar bildirirlər ki, bu da əllərində olan sementin satılıb, qurtarmaması ilə əlaqədardır. Növbəti dəfə mal gətirdikləri zaman neçəyə almalarından asılı olaraq, qiymətdə dəyişiklik edə bilərlər.
Bazarda lambirinin qiyməti 4.20 qəpik (əvvəllər 3.80 AZN olub), laminantın qiyməti isə 20 manatadır.
Devalvasiyadan sonra alçipanların qiyməti 1.50 AZN bahalaşıb. Hazırda bazarda 9.5 mm qalınlığında olan alçipanın 1 ədədinin qiyməti 7,5 AZN, 12.5 mm-liyin 1 ədədi 10,5-12,5 AZN arasında dəyişir. Divar üzlüklərinin qiymətində isə (spaklovka) 70 qəpik bahalaşma var. Digər növ tikinti materiallarının da qiymətində müəyyən qədər artım mövcuddur.
Söhbət etdiyimiz bütün satıcılar, qiymət artımının dollardan asılı olaraq, davam edəcəyinin istisna olmadığını bildirdilər. Bəs belə olduğu təqdirdə, Bakıda mənzil bazarında qiymətlər yüksələ bilərmi?
Məsələ ilə bağlı musavat.com-a iqtisadçı ekspert Vüqar Bayramov danışıb. O, bildirib ki, tikinti materialları bahalaşsa da, bu, mənzil bazarında qiymət artımına səbəb olmayacaq: “Mənzillərin qiymətində artım proqnozlaşdırılmır. Çünki tələb aşağıdır. İnsanlar mənzil və digər bu kimi istiqamətlərə vəsait qoymağa maraqlı deyil, yığıma üstünlük verirlər. Manatın devalvasiyası fonunda ümumiyyətlə, gözlənilir ki, evlərin qiymətinin dollar ifadəsində kəskin azalmalar olacaq. Doğrudur, tikinti materiallarının qiymətində artım var, ancaq bu gün yeni tikintilərin də sayı azdır. Bazarda olan mənzillər xeyli müddət əvvəl inşa edilmiş köhnə binalarda olan evlərdir. Tikinti materiallarının qiymətinin artması gələcəkdə bazara çıxarılacaq evlərin qiymətinə təsir göstərə bilər. Ancaq bu, indiki məqamda satılan evlərə aid deyil. Növbəti aylarda da mənzil bazarında qiymətlərin azalması davam edəcək”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər