Tehranın dondurulmuş 55 milyardı özünə qaytarılacaq |
Müəllif: Admin | Bölmə: Xəbərlər | Vaxt: 20-01-2016, 18:49 | Şərh sayı: (0) | Baxılıb: 264
Tehranın dondurulmuş 55 milyardı özünə qaytarılacaq
“İranın güclənməsindən ən çox yararlanan qonşu ölkə Ermənistan olacaq” İrana qarşı beynəlxalq sanksiyaların aradan qaldırılması nəticəsində rəsmi Tehran təxminən 55 milyard məbləğində dondurulmuş maliyyə vəsaitlərini geri alacaq. Bunu ABŞ-ın dövlət katibi Con Kerri bəyan edib. O, bəzi ekspertlərin adıçəkilən məbləğin 100-150 milyard dollara çatacağı barədə proqnozlarını qəti şəkildə təkzib edib: “Bu uydurma rəqəmlərdir. İran təxminən 55 milyard alacaq”.
Dövlət katibi həmçinin vurğulayıb ki, İran maliyyə vəsaitini birdəfəlik deyil, hissə-hissə alacaq.
Həmçinin İranın 1981-ci ildə ABŞ banklarında dondurulmuş 400 milyon dolları faizi ilə birlikdə - 1 milyard 700 milyon dollar həcmində qaytarılacaq. Bunu da Con Kerri yazılı açıqlamasında bildirib. Bu pulların İranın Mərkəzi Bankına köçürülməsi nəzərdə tutulub.
Siyasi ekspertlər və iqtisadçıların bir çoxu İrana qarşı sanksiyaların götürülməsi nəticəsində bu ölkənin neftinin dünya bazarına çıxmasının və xarici banklardakı dondurulmuş 55 milyard vəsaitinin önünün açılmasının İranı gücləndirəcəyini bildirirlər.
Neft məsələləri üzrə tanınmış ekspert İlham Şabanın fikrincə, sanksiyaların ləğvi İranın qarışısında yeni imkanlar açacaq: “İran təkcə yenidən qlobal neft bazarına qayıtmır, həm də 2012-ci ildən xarici maliyyə bazarlarında dondurulmuş hesablarından on milyardlarla dollar vəsait əldə etmək imkanı qazanır. Nəzərə alsaq ki, 2016-cı ildə dünya üzrə çox gərgin bir iqtisadi vəziyyət proqnozlaşdırılır, bu dövrdə İran sanki bir əlavə stimul qazanır. Uzun illər beynəlxalq sanksiyalar nəticəsində təcrid olunmuş, qənaət rejimində yaşamış ölkə üçün tamamilə yeni imkanlar açılır. Neft ucuzlaşır, İran bazara əlavə həcmlər çıxaracaq, əlavə maliyyə vəsaitləri cəlb edəcək, Qərb və Şərq ölkələri ilə ticarət və tərəfdaşlıq əlaqələrinə başlayacaq və daha çox uğur qazanacaq. Digər körfəz ölkələrində bir ruh düşkünlüyü varsa, İranda bunun əksini görəcəyik. Ona görə burda neftin qiyməti elə bir önəm daşımayacaq”.
Bəs İranın bu şəkildə yüksəlişi Azərbaycana necə təsir edəcək? İranın maliyyə və iqtisadi baxımdan güclənməsinin ölkəmizə müsbət, yoxsa mənfi təsiri ola bilər?
Müsavat Partiyası Divanının üzvü Razim Əmiraslanlı hesab edir ki, ABŞ və Avropa İttifaqının İran üzərindən sanksiyaları götürməsi çox müsbət hal olsa da, bunun Azərbaycan üçün müəyyən fəsadları da olacaq. Eyni zamanda qonşuluqda yerləşən avtoritar bir rejimin daha da güclənməsi ölkəmiz üçün potensial təhlükədir: “Nəzərə alsaq ki, Azərbaycanla müharibə vəziyyətində olan, eyni zamanda 23 ildir torpaqlarımızı işğalda saxlayan Ermənistanla da İran çox ciddi iqtisadi əlaqələrə malikdir, Ermənistanla bağlı bir çox layihələrin 70 faizini İran tərəfi maliyyələşdirir, deməli, İranın maliyyə vəsaitlərinin artması Ermənistana maddi dəstəyi bir az da artıra bilər.
Məsələn, Ermənistan-İran üçüncü yüksəkvoltlu elektrik xəttinin tikintisi, İran sərhədi yaxınlığında Ermənistanın Meğri rayonunda su elektrik stansiyasının tikintisi üzrə gələcək planları və sərhədyanı yaşayış məntəqələrində qazbölüşdürücü şəbəkəsi tikintisi proqramının gedişi ilə bağlı məsələlərin artıq planlaşdırılması, İrəvanla Tehran arasında üçüncü yüksəkvoltlu elektrikötürmə xəttinin tikintisinin bərpa edilməsi, Şimal-Cənub yol dəhlizi investisiya proqramı və Ermənistan-İran dəmir yolu layihəsinin maliyyələşdirilməsi İranın maliyyə imkanlarının artması üzündən daha sürətli və tez həyata keçiriləcək. Bir sözlə, farslar həmişə olduğu kimi yenə də Ermənistanın yanında olacaq. İranın güclənməsindən ən çox yararlanan qonşu ölkə Ermənistan olacaq".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər