Gənc analardan pediatra cavab: Bələk, yoxsa uşaq bezi..? |
Müəllif: Admin | Bölmə: Xəbərlər | Vaxt: 19-01-2016, 19:58 | Şərh sayı: (0) | Baxılıb: 221
Gənc analardan pediatra cavab: Bələk, yoxsa uşaq bezi..?
Pediatr Vaqif Qarayevin körpəsi olan valideynlərə anti-böhran təklifi olaraq, uşaq bezləri əvəzinə bələyi məsləhət görməsi sosial şəbəkələrdə gənc analar arasında müzakirə mövzusu olub. Bu təklifi müsbət qarşılayanlarla yanaşı, əleyhinə çıxanlar, bələyin zərəri haqqında fikir söyləyənlər də az olmayıb. Musavat.com son günlərin ən çox müzakirə olunan bu mövzusuna gənc analardan münasibət öyrənməyə çalışıb.
“Yeni Müsavat” qəzetinin əməkdaşı, iki övlad anası olan Şahnaz Novruzqızı uşaq bələməyi bacardığını, lakin buna ehtiyacı olmadığını bildirib: “Heç vaxt uşağı bələməyə ehtiyac duymamışam. Çünki bunun uşaq üçün doğru olmadığını düşünürəm. Uşağın el-ayağı bağlanır, hərəkət edə bilmir və narahat olur. Ona görə də uşaqlarımı heç vaxt bələməmişəm”.
Azvision.az saytının əməkdaşı, bir neçə ay öncə ana olan Sevinc İltifatqızı qızı da bu təkliflə tanış olsa da, lakin bunun uşaq üçün rahat olmadığı fikrindədir: “Uşaq bələməyi bilirəm. Oğlum Uğur doğulduqdan sonra onu 1 aya yaxın bələdim. Amma sonra bələyəndə narahat oldu, yatmırdı. Bələyi açanda isə rahat yatırdı. Amma uşaq bezlərinin də bir az ucuzundan istifadə edirəm, bahalısını almıram. Amma ehtiyac olsa, bələyərəm. İnsallah ki, buna ehtiyac qalmaz”.
“Yeni Müsavat” qəzetinin keçmiş əməkdaşı, bir ay öncə Orli adlı qızı dünyaya gələn Fəridə Abdıyeva bələyin heç də uşaq bezindən ucuz başa gəlmədiyi qənaətindədir: “Anamın sayəsində bələməyi öyrənmişəm. Qənaət üçün deməzdim, ancaq uşağın sağlam inkişafı üçün arada pampersdən istifadə edilməməsinin tərəfdarıyam. Uşaq bezindən imtina etmək də çətindir. Lakin həmin pediatr bir nüansı nəzərə almadan tövsiyyə verib. Belə ki, parçanı da yumaq üçün yuyucu toz, su pulu, işıq pulu ödənir. Ümumilikdə isə, həm bələyin, həm də pampersin istifadəsi paralel olsa, daha yaxşıdır”.
Gənc ana, jurnalist Sevinc Fədai isə pediatrın təklifini normal qiymətləndirdi: “O pediatr dədə-baba bələyindən danışmırdı, daha rahat, uşaqları çox da sıxmayan bir variant təklif edirdi. Ənənəvi bələmək üsulu xalis işgəncədir, məncə... Bizim balamız isə doqquz aylıqdır və o, bələnmək dövrünü keçib. Bəlkə də, övladımız yeni doğulmuş olsaydı, qənaət üçün bu barədə düşünərdik”.
Gənc ana, jurnalist Günel Qarayeva qeyd etdi ki, o, bələyin uşaq bezlərindən ucuz başa gəldiyi fikrinə qatılmır: “Əslində, uşaq bezlərinin körpələr üçün zərərli olduğunu bilirəm. Uşaq bələməyi də bilirəm və körpəmi əskiylə böyüdə bilərəm. Ancaq bunun uşaq bezlərindən ucuz başa gəldiyi fikrinə qatılmıram. Uşaqlar üçün yuyucu tozların (söhbət ən keyfiyyətlisi və uşaq dərisinə zərər verməyənindən gedir) bir qutusu 1.70-2 manat arasında dəyişir. Gün ərzində uşaq altı-yeddi dəfə əskini isladır, bəzən də iki dəfə də böyük bayıra gedir. Bir qutu yuyucu toz bir həftə bəs eləməz. Amma körpənin sağlamlığı baxımından, əskiylə böyütməyin tərəfdarıyam. Lakin özüm əməl etmirəm. Çünki işləyən xanımlara bu əl vermir. Maddi durumumuzla əlaqədar olaraq, mən körpəmin bir yaşı olmamış işləməyə məcbur qalmışam”.
Gənc ana Arifə Mikayılova isə qənaət barədə təkliflər verməyin pediatların işi olmadığını qeyd etdi: “Düzü, bələməyi bilmirəm, ən pis durumda öyrənmək olar. Sadəcə, məni bir məsələ maraqlandırır. Neçə illərdir ki, araşdırılıb və təsdiqlənib ki, uşaq fiziki tələbatlarını 22 ayından idarə etməyi öyrənir. Belə çıxır ki, 2 yaşınacan əskidən istifadə edilməlidir? Bütün dünya anaların işini yüngülləşdirən dəyərli kəşfdən faydalanarəkən, biz keçmiş üsullara qayıtmalıyıq? Ümumiyyətlə, bələmək mövzusu böhrandan əvvəl də həmişə müzakirə olunub. Tanıdığım pediatrların bu barədə fikirləri müxtəlifdir. Bəziləri pampersin zərərli olduğunu düşünürlər. Amma bu barədə heç bir sübut yoxdur. Digərləri uşaq bələməyin qəti əleyhinədirlər və bunu onunla əsaslandırırlar ki, sonradan bud-çanaq əyriliyi, çanaq darlığı məhz ayaqları möhkəm sıxıb, bələməkdən yaranır. Bir də düşünürəm ki, qənaət barədə təkliflər vermək pediatların vəzifəsi deyil. Lazımısız bir sürü dərmanı reseptə yazanda da ailənin büdcəsini düşünsələr, yaxşı olar”.
“Mətanət A” şirkətinin PR meneceri, iki körpə anası Şəhanə Sarı isə bələyin uşaqda soyuqdəymə yaratdığı qənaətindədir: “Mən heç bir uşağımı bələməmişəm. Amma mənə elə gəlir ki, uşağı bələmək onda soyuqdəymə yaradır”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər