Okeanın o tayından Qarabağ mesajı - ilginc gəlişmə |
Müəllif: Admin | Bölmə: Xəbərlər | Vaxt: 16-01-2016, 20:15 | Şərh sayı: (0) | Baxılıb: 211
Okeanın o tayından Qarabağ mesajı - ilginc gəlişmə
Politoloq: “Bakının Vaşinqtona göndərdiyi və göndərəcəyi müsbət siqnallar ABŞ-ın ərazi bütövlüyümüzə marağının artmasına səbəb ola bilər...”“Dondurulmuş münaqişələrdə nizamlanmaya ehtiyac olduğu aydın görünür”. Bu sözləri ABŞ dövlət katibi Con Kerri ölkəsinin 2016-ci il üçün xarici siyasət gündəliyini açıqlayarkən deyib. “Sülhə əngəl həmişə var. Dünyadakı dondurulmuş münaqişələrə baxın. Bu münaqişələrdə nizamlanmaya ehtiyac olduğu aydın görünür. Biz bu məqsədlərimiz istiqamətində nə qədər çox irəliləyiş əldə etsək, o zaman İŞİD-ə qarşı daha effektiv və dayanıqlı mübarizə aparmış olarıq”, - deyə o, söyləyib.
Amerikalı diplomatın dedikləri Qarabağ münaqişəsinin həllinə də ümidlər yaradıb. Bu arada ATƏT-də sədrliyin Belqraddan Berlinə keçməsi Almaniyanın da prosesdə aparıcı rol oynayacağı haqda ehtimalları çoxaldıb. “Almaniya Avropada Təhlükəsizlik və Əməkdaşlıq Təşkilatının (ATƏT) sədri kimi Dağlıq Qarabağ və Dnestryanı münaqişələrin həllində aktiv rol oynayacaq”-deyə, Almaniya xarici işlər naziri Frank-Valter Ştaynmayer bəyan edib.
Paralel surətdə Rusiyanın 7 rayonun azad olunması ilə əlaqədar fəallığını artırdığı barədə məlumatlar Qərbi də hərəkətə gətirib. Lakin Qərb dairələri Moskvanın niyyətinin arxasında başqa mətləblərin olduğunu güman edir. “Rusiya İrana qədər tranzit şəbəkəsini genişləndirmək istəyir, lakin bu, ağır olacaq. Xüsusilə Qafqaz bölgəsi Moskvanın qarşısında maneədir”. Publika.az xəbər verir ki, bu barədə ABŞ kəşfiyyatının “kölgəsi” hesab olunan “Stratfor” mərkəzi yazıb.
Məqalədə qeyd olunur ki, Tehran və Moskva Qafqaz bölgəsini maneə olaraq aradan qaldırmaq üçün səylərini birləşdirəcəklər: “Onlar başqa böyük dövlətin bu bölgədə olmağını istəmirlər. Hələlik, Rusiya Cənubi Qafqaz vasitəsilə İrana iki yol açmağı bacarıb. Birincisi, Xəzər dənizinin sahil boyunca Azərbaycandan, ikincisi isə Gürcüstanın ərazisinə daxil olan dağlardan keçir. Birinci yol Azərbaycan və İran arasındakı tarixi gərginliyə görə bağlanıb. İkinci yol isə qış vaxtı keçilməz olur və avtomobillər gedə bilmir. Buna görə də Rusiya, İran və Ermənistan quru ticarət yolunun genişləndirilməsinə çalışırlar”.
Politoloq Elxan Şahinoğlu “Yeni Müsavat”a dedi ki, Con Kerrinin “dondurulmuş münaqişələrdə nizamlanmaya ehtiyac olduğu aydın görünür” fikri önəmlidir: “Kerri o fikrində də haqlıdır ki, dondurulmuş münaqişələr terrorçu qruplaşmaların fəaliyyəti üçün münbit şərait yaradır. Buna baxmayaraq, Vaşinqtonun qollarını çırmalayaraq dondurulmuş münaqişələrin həllinə girişəcəyini zənn etmirəm. Birincisi, Kerrinin də üzvü olduğu Barak Obama administrasiyasının ömrünə az qalıb. Obamanın 8 illik prezidentlik müddəti başa çatır. Əgər Obama və Kerri dondurulmuş münaqişələrin həllini bu qədər aktual sayırlarsa, gərək bu işə daha öncə başlayaydılar. İkincisi, ABŞ dünyanın əsas supergücü olsa da, əli hər yerə çatmır. Məsələn, bizim bölgəni götürək. ABŞ Rusiyanın 2008-ci ildə Gürcüstanı parçalamasına, 2014-cü ildə Krımın ilhaqına və Donbass separatçılarına dəstəyinə mane ola bilmədi. Bunlar da artıq dondurulmuş münaqişələrə çevrilib. Çünki nə Gürcüstan, nə də Ukrayna Abxaziya, Cənubi Osetiya, Krım və Donbasın itirilməsiylə barışmayıblar. Elə bunlardan da uzun tarixə malik olan Dağlıq Qarabağ münaqişəsi də dondurulmuş münaqişə sayılır”.
E.Şahinoğlu qeyd etdi ki, Dağlıq Qarabağın separatçı və terrorçu məskəni olduğunu xüsusi sübut etməyə ehtiyac yoxdur: “Torpaqlarımızın işğalında ASALA və ona dəstək verən terrorçu qruplaşmaların xüsusi rolu olub. Buna baxmayaraq, Barak Obama administrasiyası Azərbaycanla Ermənistan arasında bərabərlik işarəsi qoyur. Ancaq hər halda hətta Qarabağ məsələsində də Vaşinqtonun mövqeyi Moskvanın mövqeyindən müsbətdir. Məsələn, ABŞ-ın Minsk Qrupundakı həmsədri Ceyms Uorlik dəfələrlə deyib ki, Dağlıq Qarabağ ətrafındakı torpaqlar azad olunmalıdır. Onun rusiyalı həmkarından isə bircə dəfə də oxşar fikir eşitməmişik. Çətin dönəmə daxil oluruq. Azərbaycanda iqtisadi və sosial problemlər artır. Belə vəziyyətdə biz ABŞ-la əməkdaşlığı daha da genişləndirməliyik”.
Politoloqun sözlərinə görə, ABŞ-dan Azərbaycana səfərlərin artması da yaxşı haldır: “Bir neçə gün əvvəl ABŞ-ın Milli Təhlükəsizlik Şurasının Avropa üzrə baş direktoru Çarlz Kupçan Azərbaycana gələrək prezident İlham Əliyev və müdafiə naziri Zakir Həsənovla görüşdü. Hər iki görüşdə bölgədəki hərbi-siyasi vəziyyət, Azərbaycan hərbçilərinin Əfqanıstandakı sülhməramlı missiyanın tərkibində fəaliyyəti müzakirə olunub. Bu görüş Azərbaycanla ABŞ arasında hərbi və təhlükəsizlik sahəsində əməkdaşlıqda problemin olmadığını göstərir. Bu səfərlərin birbaşa Dağlıq Qarabağ münaqişəsinin həllinə aidiyyəti olmasa da, Bakının Vaşinqtona göndərdiyi və göndərəcəyi müsbət siqnallar ABŞ-ın Azərbaycanın ərazi bütövlüyünə marağının artmasına səbəb ola bilər. Vaşinqton Ukraynanın ərazi bütövlüyünün təmini məqsədilə Kiyevlə sıx əməkdaşlıq edir, ona hər cür dəstək verir, Rusiyaya qarşı sanksiyalar tətbiq edir. Biz elə etməliyik Vaşinqton Azərbaycanın ərazi bütövlüyünə də eyni prizmadan yanaşsın. Bütün hallarda yaxın illərdə Qarabağ münaqişəsinin danışıqlar yolu ilə həllini gözləmək əbəsdir. Bunu İlham Əliyevin Nazirlər Kabinetinin toplantısında Dağlıq Qarabağ münaqişəsinin həlli prosesindən danışarkən dediyi ”Ermənistan sülh istəmir" fikri də sübut edir. Bu açıqlama 2016-cı ildə də cəbhə bölgəsində gərginliyin davam edəcəyinin xəbərçisidir. Biz 2016-cı ildə həm atəşkəsin intensiv pozulmasının və itkilərin, həm də danışıqların davamının şahidi olacağıq. Atəşkəs daima ona görə pozulacaq ki, Ermənistan Dağlıq Qarabağ ətrafındakı rayonları boşaltmağa hazır deyil və Azərbaycan ordusu qarşı tərəfi təzyiq altında saxlayacaq. Nəticəsi olmayan danışıqlar isə ona görə davam edəcək ki, bu yolla heç olmasa, müharibənin qarşısı alınsın".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər