Yanacaqdan haramla qazananlara "badalaq"... |
Müəllif: Admin | Bölmə: Xəbərlər | Vaxt: 5-11-2015, 23:34 | Şərh sayı: (0) | Baxılıb: 274
Yanacaqdan haramla qazananlara "badalaq"...
Yanacaqdoldurma məntəqələrində (YDM) istehlakçıların, xüsusən sürücülərin aldadılma hallarının qarşısının alınması üçün yeni mexanizmlərin tətbiq edilməsi təklif olunur.
Yol-nəqliyyat məsələləri üzrə ekspert Azər Allahverənov Milli.Az-a deyib ki, YDM-lərlə bağlı neqativlər, o cümlədən yanacağın satılması zamanı onun həcmində müştərinin aldadılması halları çoxdur: "Onların aradan qaldırılmasına isə yalnız dövlət qurumları nail ola bilərlər. Dövlət qurumlarının inzibati rıçaqları olmadan və texnoloji elementləri səfərbər etmədən bu problemi həll etmək mümkün olmayacaq. Həm İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti, həm də Standartlaşdırma, Metrologiya və Patent üzrə Dövlət Komitəsi nəzarəti gücləndirməlidir".
Amma ekspertin fikrincə, bu nəzarəti həyata keçirmək çətin olduğundan yeni mexanizmlər tətbiq olunmalıdır: "Bir dəfə bir şəxsin avtomobilinin çəni 90 litr tutduğu halda məlum oldu ki, YDM-də 90 litrdən artıq yanacaq vurulub. Nəzərə almaq lazımdır ki, avtomobil YDM-ə özü gəlib və çəndə də yanacaq olub. Həmin YDM-in rəhbərliyinə şikayət edildi. Onlar da dedilər ki, problem yoxdur, araşdıra bilərik. Gəlin çəni avtomobildən çıxaraq, benzini boşaldaq, ölçək. Əgər siz düz deyirsizsə, pulunuzu geri qaytaracağıq. Təbii ki, çəni avtomobildən çıxarmaq, onu boşaltmaq və yanacağın həcmini ölçmək xeyli vaxt tələb edir. Ona görə də sürücü sadəcə narazılığını başqa formada ifadə edərək avtomobilini sürüb çıxıb getdi. Təbii ki, bu, yolverilməzdir. YDM-lərdə elə bir mexanizm tətbiq olunmalıdır ki, insanlar həm yanacağın keyfiyyəti, həm də həcmi baxımdan aldadılmasınlar. Təəssüflər olsun ki, bununla bağlı nəzarət mexanizmi işlək vəziyyətdə deyil. Deməli, texnoloji cəhətdən yeni mexanizm tapılmalı və insanlar bunu sərbəst şəkildə aydınlaşdırmağa və zərurət olduqda şikayət etmək imkanına malik olmalıdırlar. Məsələn, avtomobilin çənində yanacaq varsa, onun qeydiyyatını aparmaq və vurulan yanacağın qeydiyyatını müqayisə etmək olar. Ya da nəsə başqa yeni bir şey fikirləşmək lazımdır".
Yol-nəqliyyat məsələləri üzrə ekspert, hüquqşünas Ərşad Hüseynov isə Milli.Az-a bildirib ki, çox zaman YDM-lərdə aldadılan sürücülər məsələni aydınlaşmaq üçün əsəblərini və vaxtlarını sərf etmək istəmirlər. YDM sahibləri də bu psixoloji məqamı yaxşı bildiklərindən vəziyyətdən çıxacaqlarına əmin olduqları üçün əməllərinə davam edirlər: "Bu problem əsasən insan faktoru ilə bağlıdır. YDM-lərdə yanacaq xüsusi qurğular vasitəsilə satılır. Həmin qurğular standartlara uyğun olmalı və onlara vaxtaşırı nəzarət edilməlidir. Nəzarət yalnız kağız üzərində deyil, real və ciddi olmalı, ölçmə qurğular texniki şərtlərinə uyğun vaxtaşırı dəqiqləşdirmədən keçirilməlidir. Dəqiqləşdirmədən keçməyibsə, qurğu istismar olunmamalıdır".
Ekspert həmçinin hesab edir ki, istehlakçı hüquqlarının qorunması və standartların tələbinə uyğunluğu istiqamətində nəzarət gücləndirilməlidir: "Əslində bunun üçün hüquqi mexanizmlər var, sadəcə onları icra etmək lazımdır. Texnoloji yeniliklərin təbiqi də bu problemi tam aradan qaldırmaq üçün yetərli olmayacaq. Çünki hətta ən müasir qurğuların da proqram təminatına müdaxilə etməklə qurğunun normal işini pozmaq olur".
Qeyd edək ki, İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin şöbə müdiri Malik Hacıyev Milli.Az-a deyib ki, əgər vətəndaşlarda YDM-lərdə istehlakçıların hüquqlarının pozulması ilə bağlı faktlar varsa, onlar Dövlət Xidmətinə müraciət edib əllərində olan müvafiq sənədləri və sübutları təqdim etməlidirlər. Çünki konkret sənəd və sübut olmadan belə faktları araşdırmaq çox çətindir.
M.Hacıyev əlavə edib ki, əgər problem məntəqədəki ölçmə cihazları ilə bağlıdırsa, buna Standartlaşdırma, Metrologiya və Patent üzrə Dövlət Komitəsi nəzarət edir. Bununla yanaşı, şöbə müdiri belə hallarda şikayətin həm də həmin məntəqələrin məxsus olduğu şirkətlərə də birbaşa ünvanlanmasını tövsiyə edib.
Standartlaşdırma, Metrologiya və Patent üzrə Dövlət Komitəsinin şöbə müdiri Fazil Talıblı isə Milli.Az-a açıqlamasında bildirib ki, təəssüf ki, həqiqətən də YDM-lərdə sürücülərin aldadılması faktlarına hələ də rast gəlinir. Belə hallara əsasən Bakıda deyil, bölgələrdə rast gəlinir. Lakin müqayisə etdikdə, belə faktların sayı getdikcə, ilbəil azalır.
F.Talıblı qeyd edib ki, Dövlət Komitəsi tərəfindən YDM-lərin qarşısında tələb qoyulub ki, ən müasir avadanlıqları alıb istismar etsinlər ki, onlara müdaxilə etmək mümkün olmasın: "Çünki bəzən vaxtı ötmüş, istismar müddəti bitmiş, köhnə avandanlıqlardan istifadə edirlər. Belə avadanlıqlara orada işləyənlərin fiziki olaraq əllə də müdaxilə etmək imkanları olur. Amma müasir avadanlıqlara müdaxilə, demək olar ki, qeyri-mümkündür. Biz bütün ölkə ərazisi üzrə bunu təmin etməyə çalışacağıq".
Şöbə müdiri əlavə edib ki, əgər YDM-lərdə vurulan yanacağın miqdarı ilə bağlı aldadılma faktı varsa, şikayətçilər Dövlət Komitəsinə sənəd və sübutlarla müraciət etsinlər. Bu halda qanunvericiliyin tələbinə əsasən, şikayətçinin tələbi əsasında müəyyən araşdırma aparıla bilər: "Fakt təsdiq olunanda İnzibati Xətalar Məcəlləsinin tələbinə əsasən, ölçmələrin düzgün yerinə yetirilməməsinə görə fiziki şəxslərə 1500-2000 manat, hüquqi şəxslərə 4-5 min cərimə tətbiq olunur".
İlkin İzzət
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər