Bir şərqlinin gün(əş) problemi... |
Müəllif: Admin | Bölmə: Məqalələr | Vaxt: 3-01-2016, 14:33 | Şərh sayı: (0) | Baxılıb: 266
Bir şərqlinin gün(əş) problemi...
Təbiətin elə də rəngarəng olmadığı bir ərazidə bir çox şeylər monoton, cansıxıcı olur. Daima qar, çovğun, qaranlıq görən bir yerdə ətraf aləmdən rəngarənglik gözləmək olmaz. Hələ bu dediyim kontinental havanın əks versiyasında daha da pisdir, yalnızca günəş və qumun olduğu səhralar, düzlər.
Avropanın cənub ölkələri istisna olmaqla əksər ölkələrinin əsas problemi birincidir, soyuq və qaranlıq. Bir ildən çoxdur ki, Polşadayam, qaranlıqdan rəsmən bezmişəm. İlin yarısından çoxunda hava saat 3 olana yaxın başlayır qaralmağa. Bəzən elə olur ki, bir az çox yatırsan, gün işığı görməyə cəmi iki üç saat vaxtın olur. Gecə görüləcək işlərin çox olursa, ümumiyyətlə, gün işığı görmürsən.
Bu ölkədəki hər şeyə təsir edir. İnsanların əhval-ruhiyyəsinə, digər insanlarla münasibətlərinə, şəxsi həyatlarına. İqlim ölkənin ümumi mənzərəsini formalaşdıran əsas amildir. Adət-ənənələrdən tutmuş mətbəxə qədər hər şey bundan asılıdır.
Bir şərqli üçün Avropada yaşamaq buna görə xeyli çətindir. Şadlığımıza qətiyyən şitlik eləmirik, vəziyyət həqiqətən bu cürdür. Təsəvvür eləyin, illərlə günəşli bir yerdə yaşa-yaşa, sonra da gəl qaranlıq və soyuq bir yerə öyrəş. Azərbaycanda qış cəmi üç-dörd ay çəkir, onun da bitiminə yaxın çilələr başlayır. Böyük çilə, kiçik çilə məsələsi onu göstərir ki, qədimdə burda yaşayan insanlar artıq gün sayırmışlar, qış bu gün çıxır, sabah çıxır deyə. Avropalı gün saymayıb, iyunun ortasında da şərflə gəzməyə məcburdur, hansı ümidlə saysın? Yadımdadır, keçən il yazın bitməyinə az qalmış bir balaca günəş çıxmışdı, bildiyimiz soyuq havada çıxan günəşdən idi, şərflə dolaşırdıq. Millət o günəşdə çay sahilinə günəş vannası qəbul etmək üçün gedirdi.
Amma istənilən halda şərqliyə yaşamaq imkanı versən, o, Avropanı seçər. Nə qədər qaranlıq və soyuq olursa-olsun. Ən başlıcası azadlıq və təhlükəsizliyə görə.. Digər yandan, günəşin az olması "günəşli günlərin" olmaması anlamına gəlmir. Avropada yüksək maaşla işləyib günəşli yerlərdə dincəlmək üçün sərmayə yığmaq olar.
Polşada və isti dənizlər görməyən digər ölkələrdə insanlar dəniz deyib həsrət çəkir, Bakıda insanlar təbiətin onlara verdiyi bu sərvəti çirkləndirmək üçün əlindən gələni edir. İnsan niyə bir qrup adamın pul qazanması üçün çirklənmiş dəniz kənarında yaşasın ki? Nə olsun ki, dənizdir? Hansımız indiyə qədər Bakının hansısa çimərliyində ürəyimiz istəyən kimi dincələ bilmişik? Günəşli hava gözəldir, amma bu havada iy verib iylənən metroda gedirsənsə, təpənə gün döyə-döyə cüzi maaş üçün işləyirsənsə, bu ölkələrin vətəndaşı olmaq, orda yaşamaq mənasız, hətta pisdir. Dənizin var, amma çirklidir, dağın, meşən var, amma gün keçirmək o yana dursun, bir saat oturub çay içmək büdcənə uyğun deyil. Kiçik bir ölkə olmağına baxmayaraq, təbiət sənə xeyli iqlim tipi verib, amma sən bunların heç birindən yönlü-başlı istifadə eləyə bilmirsən.
Avropalı isə belə eləmir. O ağıl işlədir, son elmi nailiyyətlərdən istifadə edir, insanların həyatını yaxşılaşdırır. Ancaq səmanın və mənfi 40 dərəcə temperaturun olduğu yerdə, hətta çılpaq qayalarda üstü şəffaf evlər düzəldir ki, millət gəlib burda ulduzları izləsin, bir yol tapıb əylənsin. Almanlar Berlin yaxınlığında böyük bir ərazini qapadıb süni, tropik dəniz sahili yaradıblar.
Nə qədər klassik olsa da aktual problemdir. Bir şərqli hər şeyə sahibdir, amma əslində heç bir şeyə sahib deyil.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər