Keyfiyyətsiz ət baytarların sonunu gətirdi |
Müəllif: Admin | Bölmə: Xəbərlər | Vaxt: 29-01-2016, 20:33 | Şərh sayı: (0) | Baxılıb: 262
Keyfiyyətsiz ət baytarların sonunu gətirdi
Dövlət Baytarlıq Nəzarəti Xidmətinin rəhbəri: “Bu istiqamətdə həm hüquqi, həm də fiziki şəxslərə qarşı ciddi inzibati tədbirlər görüləcək”Kənd Təsərrüfatı Nazirliyinin kollegiya iclasında işdə ciddi nöqsanlara yol verdiyinə görə 4 rayon və Bakı Şəhər Baytarlıq İdarəsinin rəisləri, həmçinin Dəmir Yolunda Baytarlıq Nəzarəti İdarəsinin rəisi işdən azad edilib, 2 rayon baytarlıq idarəsinin rəisləri yaş həddinə görə təqaüdə göndərilib, 1 rayon və 1 şəhər baytarlıq idarəsinin rəisləri ilə bağlanmış əmək müqaviləsinə xitam verilib. 4 rayon həmçinin Gəncə və Mingəçevir şəhər baytarlıq idarələrinin rəislərinə şiddətli töhmət, 3 rayon baytarlıq idarəsinin rəisinə töhmət elan edilib.
Xatırladaq ki, bir neçə gün öncə Dövlət Baytarlıq Nəzarəti Xidmətinin mütəxəssisləri mənşəyi məlum olmayan, baytarlıq-sanitariya cəhətdən keyfiyyəti və təhlükəsizliyi şübhə doğuran ət və ət məhsullarının satışının qarşısını almaq məqsədi ilə Bakı şəhərində reyd keçirib. Reyd zamanı Qaradağ rayonu ərazisində Dövlət Yol Polisi postunda Bakı şəhərinə satış üçün Ağcabədi rayonu Aşağı Avşar kəndindən gətirilən 1100 kiloqramlıq mənşəyi bəlli olmayan ət aşkarlanıb. Həmin ətlər alınaraq yanvarın 27-də Balaxanı məişət tullantıları poliqonunda baytarlıq sanitariya tələblərinə uyğun olaraq zərərsizləşdirilərək basdırılıb.
Məlum olub ki, bu ətlər mal əti adı altında Bakıya satış məqsədilə gətirilən at əti olub. Qeyd edək ki, bu kimi hallar ilk dəfə baş vermir. Zaman-zaman kiloqramı 5 manata satılan mənşəyi bəlli olmayan ətlərə rast gəlinir. Dolanışığını güclə təmin edən az gəlirli ailələr bu ətlərdən alırlar. Təbii ki, bu ətlər alıcılara mal əti adı ilə satılır. Redaksiyamıza daxil olan şikayətlərə görə iri marketlərdə satılan farşlara da heyvanın baş ətindən qatqılar qatırlar ki, bunu da alıcılar əti alıb bişirən zaman onun iyindən və tamından dərhal hiss edir. İlk görünüşdə isə bunu hiss etmək mümkünsüzdür.
Kənd Təsərrüfatı Nazirliyi yanında Dövlət Baytarlıq Nəzarəti Xidmətinin rəhbəri Yolçu Xanvəli “Yeni Müsavat”a açıqlamasında bu istiqamətdə reydlərin davam edəcəyini və ciddi inzibati tədbirlər görüləcəyini dedi: “Mənşəyi bəlli olmayan, insan qidası üçün zərərli olan, insan həyatına təhlükə yaradan ətlər, ayrı-ayrı farşlar və digər heyvan və heyvan mənşəli məhsullarla bağlı daim reydlərimiz olur. Yanvarın 24-də alınan məlumat əsasında Qaradağ postunda Ağcabədi rayonunun Aşağı Avşar kəndindən gətirilən 1100 kiloqramdan artıq heyvan cəmdəyi aşkarlandı. Həmin heyvanlardan götürülən ət nümunələri Respublika Baytarlıq Laboratoriyasında müayinə olundu. Ekspertizanın nəticəsinə görə, götürülən 32 nümunədən 7-də at əti aşkarlandı. O ekspertizanın nəticəsinə uyğun götürülən 32 nümunənin kimyəvi müayinələri zamanı həmin ətlərin keyfiyyətsiz olduğu, baytarlıq sanitariya cəhətdən yararsız olduğu müəyyən edildi. Bütün bunlar nəzərə alınaraq yanvarın 27-də Balaxanı məişət tullantıları poliqonunda həmin ətlər zərərsizləşdirilərək basdırılıb. Bu istiqamətdə bizim reydlər daimi olub və olacaq. Mənşəyi məlum olmayan, keyfiyyəti şübhə doğuran, insan qidası və sağlamlığı üçün yararsız və təhlükəli olan heyvan və heyvan mənşəli məhsullarının emalı və satışının qarşısı qətiyyətlə alınır”.
Y.Xanvəli bəzi insanların öz ciblərini doldurması üçün bu cür yollara əl atdığını dedi: “Müxtəlif insanlar bəzən murdar olan heyvanları öz şəxsi mənafeləri, öz ciblərini doldurmaq xətrinə ayrı-ayrı məntəqələrə gizli formada satırlar. Biz çalışırıq ki, bu kimi halların qarşısını alaq. Bu istiqamətdə həm hüquqi, həm də fiziki şəxslərə qarşı ciddi inzibati tədbirlər görüləcək”.
Kənd təsərrüfatı üzrə ekspert Vahid Məhərrəmov isə mətbuata açıqlamasında əhalini ət alarkən diqqətli olmağa çağırıb. Ekspert bildirib ki, respublikada mal, qoyun əti az istehsal olunduğu üçün bəzi işbazlar xəstə, şikəst və ölmüş at leşini mal əti adı ilə Bakı və Sumqayıt şəhərlərində keçirilən kənd təsərrüfatı yarmarkalarında ucuz qiymətə əhaliyə satırlar: “Yarmarkalarda satılan ətin qiyməti ucuzdur. Təxmini hesablamalarımıza görə, hər ildə 1500 tondan çox at əti kasıb əhali tərəfindən istehlak olunur. Ət alarkən diqqətli olun!”
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər