“Hesabat” dayandırıldı, Mir Şahin mətbuat konfransı keçirdi |
Müəllif: Admin | Bölmə: Xəbərlər | Vaxt: 23-01-2016, 18:26 | Şərh sayı: (0) | Baxılıb: 331
“Hesabat” dayandırıldı, Mir Şahin mətbuat konfransı keçirdi
“Bütün ictimaiyyət görür ki, MTRŞ bizə qarşı qərəzlidir” Milli Televiziya və Radio Şurasının (MTRŞ) növbəti iclası keçirilib. MTRŞ-dan APA-ya verilən xəbərə görə, İclasda “ANS” televiziyası tərəfindən “Televiziya və radio yayımı haqqında” Azərbaycan Respublikası Qanununun tələblərinin pozulması ilə əlaqədar inzibati icraata dair işə baxılıb.
MTRŞ bildirib: “ANS” televiziyasının efirində yayımlanan “Hesabat” analitik-informasiya proqramının 27 dekabr 2015-ci il və 17 yanvar 2016-cı il tarixli buraxılışlarında televiziya yayımının əsas prinsiplərinin və proqrama verilən tələblərin pozulması - proqramlarda informasiyanın tərəfsizliyi, qərəzsizliyi, əhatəliliyi, tam və doğru-dürüstlüyü prinsiplərinə əməl olunmadığını, işgüzar nüfuzun ləkələnməsinə yol verildiyini, faktlar və hadisələrin ədalətli şərh olunmadığını, birtərəfliliyə yol verildiyini nəzərə alınaraq, “Televiziya və radio yayımı haqqında” Azərbaycan Respublikası Qanununun 23.1-ci maddəsinə uyğun olaraq “ANS” televiziyasının efirində “Hesabat” analitik-informasiya proqramının yayımı 24 yanvar 2016-cı il tarixdən etibarən 1 (bir) ay müddətinə dayandırılmışdır".
ANS daha əvvəl MTRŞ tərəfin 161 manat məbləğində cərimə edilmiş, həmçinin “Sən tək deyilsən” və “Xoşqədəmlə axtarıram səni”, “Salam Azərbaycan” proqramlarının yayımı dayandırılmışdı.
Qərarla bağlı ANS telekanalında Mirşahin Ağayev mətbuat konfransı keçirib.
Musavat.com saytının konfransda iştirak edən reportyorunun verdiyi məlumata görə, Mirşahin Ağayev bir sıra ittihamlar səsləndirib: “Bizim MTRŞ ilə münasibətlərimiz göz qabağındadır. MTRŞ bütün gücünü ANS-i qarabaqara izləməyə verib. Bütün ictimaiyyət görür ki, MTRŞ bizə qarşı qərəzlidir.
Fikir versəniz, görərsiniz ki, bu qurumun qərarlarının böyük bir hissəsi ANS-lə bağlı olub. Bu gün də mən düşünmürəm ki, bu məsələlər hakimiyyət tərəfindən yaradılır. Hər şeyin arxasında MTRŞ-nın başındakı məmurlar durur. MTRŞ seriallarla bağlı bizə ödəməli olduğu pulun 40 min manatını hələ də verməyib. Biz onlara müraciət etdik. Hər şey də bundan sonra başladı. Qərəzli qərarlar, cərimələr...
Azərbaycan prezidentinin serialların çəkilməsi üçün ayırdığı vəsaiti bizə tam vermirlər. Suallarımız cavabsız qalıb. O pullar haraya xərclənib? Biz televiziya kanalıyıq. Bizim işimiz budur və bizə maraqlıdır ki, bu pullar haraya xərclənib? Azərbaycan Respublikasının prezidenti öz çıxışlarında bizlərdən, mediadan xüsusi fəallıq tələb edir. Biz də bunu icra edirik".
Mirşahin Ağayev MTRŞ-nı məhkəməyə verə biləcəklərini vurğulayıb: “MTRŞ bu gün verdiyi qərarla sübut etdi ki, biz tam haqlıyıq. Təbii ki, iş belə qalmayacaq. Biz məhkəməyə qədər gedəcəyik. Bu, pis bir haldır. Söz azadlığının məmur tərəfindən tapdalanmasıdır. Bu, bizim ölkəmizə başucalığı gətirmir”.
Telekanalın hüquqşünası Sevda Məhərrəmova konfransda çıxış edərək bildirib: “Bizi bu gün MTRŞ-ya çağırdılar. Məlum oldu ki, Şura artıq qərarı çoxdan qəbul edib. Biz haqlı iradlarımızı bildirdik. Buna baxmayaraq, dinləyən olmadı. Bizi iclasdan qovdular. Biz soruşduq ki, bu nə deməkdir? Bizi qovursunuz?” Dedilər ki, bəli, qovuruq".
M.Ağayevin sözlərinə görə, MTRŞ ANS TV-ni efirdə material verərək, kimlərisə şantaj etməkdə ittiham edir: “Bizim elə bir istəyimiz olsaydı, Binəqədi rayonunda çoxmərtəbəli yaşayış binasının tikintisindən hazırladığımız reportajda bunu edərdik. Belə ki, orada sakinlərin narazılıq etdiyi binanı inşa edənlər Nuşirəvan Məhərrəmlinin yaxın qohumlarıdır. Sakinlərin bu barədə dediklərini MTRŞ ilə həssas münasibətləri nəzərə alıb, efirə vermədik. Ölkə başçısı İlham Əliyev bütün medianın olduğu kimi, ANS-in də dostudur. Buna görə də ümid edirəm ki, verilişin bərpası ilə bağlı qərar veriləcək. Hətta belə olmasa belə, ümid edirəm.
MTRŞ-nın bu qərarının arxasında hansısa qüvvələrin olduğunu düşünmürəm. Veriliş 1 ay müddətinə bağlanıb. Problem yoxdur. Oradakı məlumatları bir ay ərzində başqa verilişdə verəcəyik. Baş verən hadisələr birbaşa təxribatdır. Vəziyyətin daha da gərginləşməsi üçün atılmış addımdır. Prezidentdən, daxili işlər nazirindən və digər qurumlardan danışa bilərik, amma MTRŞ-dan yox? Nuşirəvan Məhərrəmli özünü elə aparır ki, sanki o, peyğəmbərdir, ona toxunmaq olmaz.
Bizim 43 məhkəmə prosesimiz var. Hamısı da MTRŞ-nın verdiyi qərarlarla bağlıdır. Onlardan sadəcə, birini udmuşuq. Bəziləri isə hələ də davam edir. Biz bilirik ki, Azərbaycan məhkəmələrində problemlər var. Amma həm də əminik ki, ədalətli hakimlər də var. Əgər görsək ki, yerli məhkəmə orqanlarında ədalətli qərar yoxdur, o zaman Avropa məhkəməsinə müraciət edəcəyik. Biz efirdə MTRŞ ilə bağlı bir cümlə tənqidi fikir demişik. Buna görə də veriliş 1 ay müddətinə bağlanır. Bu, birbaşa söz azadlığının tapdalanmasıdır . Mediadan xahiş edirik, bu sualı MTRŞ-ya versinlər ki, 10 milyon manatı hara xərcləmisiniz?"
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər