Sıravi Cəfərzadəyə necə ehsan verməli |
Müəllif: Admin | Bölmə: Xəbərlər | Vaxt: 22-01-2016, 21:32 | Şərh sayı: (0) | Baxılıb: 288
Sıravi Cəfərzadəyə necə ehsan verməli
Dünən musavat.com saytında oxuduğum bir yazı gerçəkdən ürəyimi ağrıtdı. Belə kədərli mövzularda yazmağı sevməsəm də məcbur oldum bəzi fikirlərimi çatdırım. Yazı keçən il dekabrın 16-da Tərtərdə cəbhə xəttində həlak olan əsgərimiz Rəşad Cəfərzadə haqda idi. Sən demə, bu əsgər atasız-anasız, necə deyərlər, ikiqat yetim imiş, valideynləri 90-cı illərdə öləndən sonra onu və bacısını qohumları saxlayıb böyüdüblər. İndi ona himayədarlıq eləmiş dayısı şikayətlənirdi, deyirdi, qəhrəman əsgərin qəbrini düzəltməyə, ehsanını verməyə, yas mərasimini keçirməyə imkan tapmır, dövlət orqanları biganədir və sairə.
Doğrudan da dəhşətli taledir. Faktiki olaraq Rəşad bəyin ölümündən sonra nəsli davam etdirməyə yalnız bacısı qalıb. Bu faciə mənə məşhur Amerika filmini, 5 “Oskar” ödüllü “Sıravi Rayanı xilas etməli” filmini xatırlatdı. Rejissoru Stiven Spilberq, baş rollarda Tom Henks və Mett Deymonun oynadığı film savaş dramı janrında yəqin ki, ən yaxşı filmlərdən biridir.
Filmin qısa süjeti belədir ki, Amerika ordusu alman faşistləri ilə savaşda Avropaya desant çıxarıblar, ağır döyüşlər gedir. Bu zaman Vaşinqtondakı hərbi komandanlıq Rayan ailəsinin 3 oğlunun eyni vaxtda cəbhədə həlak olması faktı ilə üzləşir. Ailədən yalnız dördüncü oğul sağdır və o da parşütçü-desant dəstəsinin tərkibində Avropaya, almanların arxasına atılıb. Komandanlıq qərara alır ki, sonuncu Rayan nəyin bahasına olursa-olsun xilas edilməlidir, o ölməməlidir.
Deyə bilərsiniz bu, kinodur, həyatda belə şeylər olmur. Ancaq məsələ ondadır ki, “Sıravi Rayanı xilas etməli” filmi real əhvalatlar əsasında çəkilib. 1942-ci ilin noyabrında Sallivan qardaşları - düz beş doğma qardaş (!) Sakit okeanda yaponlarla döyüşdə həlak olub. Bundan sonra Amerika ordusunda 135.15 nömrəli xüsusi əmr imzalanıb, bu əmrə “sonuncu sağ qalan siyasəti” adı qoyulmuşdu. Daha sonra, 1971-ci ildə Amerika Konqresi bu siyasəti təkmilləşdirərək qanun qəbul eləyib: həmin qanuna əsasən nəinki qardaşı orduda həlak olan və tək qalan şəxsi əsgərliyə aparmırlar, bu, ümumiyyətlə, əsgərlikdə hər hansı qohumu ölən şəxslərə də aid edilib. Yəni kimsə ölüb, 2 qardaşı sağdırsa, onları da aparmırlar.
Təəssüf ki, bizim ölkədə belə insani, humanist kriteriyalar nəzərə alınmır. Özü də bu tarixən belə olub. Örnək üçün, mənim uşaqlıq yaddaşımda Füzuli rayonu Aşağı Seyidəhmədli kəndində yaşayan Zabitə xalanın kədərli duruşu həkk olunub. Onu həmişə “9 may” qələbə günü münasibəti ilə tədbirlərdə qabaq sıraya qoyurdular, çünki Zabitə xalanın 3 oğlu II dünya savaşından (o vaxtlar deyilən kimi, “Böyük Vətən müharibəsi”) qayıtmamışdı.
Mən 1999-cu ildə cəbhə xəttində əsgərlikdə olanda bir sabirabadlını, hardasa 30 yaşlı ailəli şəxsi də ora xidmətə gətirmişdilər. Onun qardaşı 1992-ci ildə Qarabağ döyüşlərində həlak olmuşdu.
Bir səhər isə qonşu postdan çavuş təlaşla bizim yanımıza gəldi: onunla eyni postda dayanan 4 əsgər qaçmışdı. Mən latın qrafikasını bilən əsgər kimi onların fərarilik sənədlərinin hazırlanmasında tabor komandirinə yardım elədim və bu zaman şok faktla üzləşdim: onların dördü də ikiqat yetim idilər!
Mən indi burda “yetim-yesirləri niyə cəbhə xəttinə basırlar” söhbətini təzədən açmaq istəmirəm, onsuz xeyri yoxdur. Ancaq Rəşad Cəfərzadənin əhvalatı deputatxanada oturan fərarilərin olmayan vicdanını heç olmazsa azacıq tərpətsin və hərbi xidmətə çağırış haqda qanunlara yenidən baxılsın. Demirəm tam Amerikadakı kimi eləyin, onsuz buna gücünüz yoxdur, peşəkar ordu xəyallarımız da neftin ölməsi ilə ölməkdədir, orduda maaşların azalması xəbərləri gəlir. Ancaq heç olmazsa evin tək oğlu, ikiqat yetim kimi uşaqlara güzəştlər edin, onlar cəbhə xəttindən uzaqda qulluq eləsin, ya da hansısa alternativ xidmət keçsinlər, ölməsinlər. Yoxsa adamın pisinə gəlir, hərdən “Şəhidin oğlu şəhid oldu” kimi xəbərlər də oxuyanda vətəni sevmək istəmirsən, çünki bir ailəni qıran, başqa ailəni isə piyləyib bəsləyən ərazinin adına vətən deyilmir.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər