Ev bazarında qiymətlər kəskin şəkildə enir... |
Müəllif: Admin | Bölmə: Xəbərlər | Vaxt: 19-01-2016, 16:03 | Şərh sayı: (0) | Baxılıb: 236
Ev bazarında qiymətlər kəskin şəkildə enir...
Ekspertlər bildirirlər ki, son bir neçə ildə mənzil bazarında indiki kimi durğunluq olmayıb...Devalvasiyalar daşınmaz əmlakın manat qiymətlərinə ciddi təsir göstərəcək. Ekspertlər bildirirlər ki, tezliklə ev bazarındakı təsir özünü daha qabarıq şəkildə büruzə verəcək.
Ekspert Rəşad Əliyevin sözlərinə görə, 2014-cü ilin payızından başlayan qiymət enməsi dollar ifadəsində bir qayda olaraq fasiləsiz davam edib: “Devalvasiya zamanı eniş sərt, digər dövrlərdə demək olar ki, mülayim olub. Çoxlarını maraqlandıran isə qiymətlərin manat ifadəsində neçə dəyişməsi olub. Yəni manat qiymətləri 2014-cü ilin pik həddindən nə qədər dəyişib? Fevral devalvasiyasına kimi daşınmaz əmlakların qiymətləri orta hesabla 10 faiz azalmışdı. Bahalı evlərdə azalma ümumiyyətlə çox müşahidə edilirdi. İki devalvasiya nəticəsində manat dollara nisbətdə orta hesabla 2,1 dəfə dəyərsizləşib, əvvəl orta hesabla 0,7850 idi, hazırda bazarda 1,65-lə hesablanır. Belə çıxır ki, manat qiymətləri həmin dövrdən sabit qalsaydı, onda dollar qiymətləri 58 faiz, yəni 2,3 dəfə düşməli idi. Yox, əgər manat qiymətləri düşübsə, onda belə çıxır ki, qiymət azalması dollar ifadəsində 60 faizdən çox olmalı idi. Ancaq biz belə rəqəmləri bazarda müşahidə etmirik. Müşahidə edirik ki, qiymətlər orta hesabla 2 dəfəyə kimi enib. Qiymətlər 45 faiz ətrafında, hətta bir qədər artıq aşağı düşüb. Bu isə göstərir ki, fevral devalvasiyasından sonra bu günə kimi manat qiymətləri artıb. Bundan sonra necə olacaq, bu, artıq əmlak bazarından yox, manatdan asılıdır. Dollar qiymətləri ilə isə hər şey aydındır”.
Qeyd edək ki, mənzil bazarında ucuzlaşma daha aktualdır. “MBA Group” Konsaltinq Şirkətinin hesablamasına görə, 2015-ci ilin dekabrında Bakıda ilkin yaşayış mənzillərinin bir kvadratmetrinin orta təklif qiyməti 1,03 faiz azalaraq 958 dollara qədər ucuzlaşıb. Ekspertlər bildirirlər ki, fevralda mənzil bazarında ciddi dəyişikliklər baş verəcək. Belə ki, mənzil və ya obyektlərin dollarla satışa çıxarılacağı gözlənilir. Ekspert Ramil Osmanlının sözlərinə görə, manatın ikinci devalvasiyasından dərhal sonra qiymətlər artırılıb. Lakin bahalaşma cəmi bir neçə gün davam edib: “Hazırda mənzil bazarında durğunluq yaranıb. Hətta dəyərindən aşağı qiymətlə təklif edilən mənzillər də satılmır. Aparılan müşahidələrə görə, gələn aydan mənzil bazarında ciddi dəyişikliklər olacaq. Əhalinin manata etibarı azaldığı üçün 2007-2008-ci ildə olduğu kimi mənzillər dollarla təklif olunacaq. Hazırda yalnız yeni tikililərdə cüzi qiymət artımı müşahidə edilir. Köhnə tikililərdə isə mənzillər bahalaşmayıb. Ötən ilin əvvəlinə nisbətən qiymətlər ucuz olsa da, alqı-satqı yoxdur. Son bir neçə ildə mənzil bazarında indiki kimi durğunluq müşahidə edilməyib. Hələlik alıcılar gözləmə mövqeyindədirlər”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər