Azərbaycanlı turizmçilərə devalvasiya zərbəsi |
Müəllif: Admin | Bölmə: Xəbərlər | Vaxt: 14-01-2016, 19:57 | Şərh sayı: (0) | Baxılıb: 216
Azərbaycanlı turizmçilərə devalvasiya zərbəsi
Şirkətlər dollar ala bilmədiyi üçün tur əldə edə bilmir, bir-bir bağlanırlar; ölkədə qış turizmi bir günlük turların ümidinə qalıb Azərbaycanda fəaliyyət göstərən turizm şirkətlərinin durumu kritik həddə çatıb. Buna səbəb manatın devalvasiyasıdır. Xarici turlar dollar və avro ilə hesablandığı üçün turizmçilər dalana dirənib. Bu barədə bizə açıqlamasında “Fly Travel” şirkətinin sahibi Məmməd Əliyev məlumat verdi. Bildirdi ki, turizm şirkəti olaraq dollar tapıb ala bilmədikləri üçün tur satın almaq da mümkünsüz olub: “Dollar baha olduğu üçün turların qiyməti də hədsiz yüksəlib. Bu, əksəriyyətin cibinə uyğun deyil. Bizə qiymətlər dollarla verilir. Onu da manata çevirəndə baha çıxır”.
Müsahibimizin sözlərinə görə, qışda insanlar adətən İstanbul, Dubay, Uludağ və Ərzurum səyahətini tərcih edirdi. Amma indi bu turlar da donub: “Manatın devalvasiyası o qədər güclü olub ki, insanlar ancaq zəruri ehtiyacları barədə düşünməyə məcburdular. Səyahət keçib arxa plana. Bir az pulu olanlar da gələcəyi düşünüb, pulunu saxlayır, xərcləmək istəmirlər”.
M.Əliyev dedi ki, Azərbaycandakı hotellər qiymətləri bir az aşağı salsalar da, tələbat yoxdur. Qiymətini aşağı salan hotellər arasında Qəbələdəki "Tufandağ" hotelinin adı yer alır. Onlar qiyməti 20-30 AZN məbləğində endiriblər. Bununla belə, müraciət edənlərin sayında kəskin azalma var.
Bu arada müsavat.com-a məlum olub ki, manatın son devalvasiyasından sonra bir neçə turizm şirkəti fəaliyyətini dayandırıb. Bunların arasında “Ulduz Travel”, “Etna Travel” və “SB Travel” şirkətləri var.
Bu səbəbdən turizm şirkətləri daha çox diqqəti daxili turlar üzərinə cəmləşdirib. Daxili turlardan ən geniş yayılanı isə Şahdağ və Tufandağ turlarıdır. Əsasən qrup şəklində turlara üstünlük verən firmaların bununla bağlı iki variantı var.
Məsələn, əksər firmalar bir günlük Tufandağ turunun qiymətini 23 AZN olaraq müəyyənləşdirib. Qiymətə nəqliyyat xidməti (komfortlu avtobus), Tufandağ Qış-Yay Turizm Kompleksinə giriş, qidalanma (səhər yeməyi), tur rəhbəri, professional fotosessiya və dönüşdə çay süfrəsi daxildir.
Amma bu turların 33 AZN-lik versiyası da var. Həmin versiyaya isə səhər yeməyi ilə yanaşı, nahar da daxildir.
Eyni tariflər Şahdağ turu üçün də keçərlidir.
Amma Şahdağ turunun 1 gecə 2 günlük versiyası da var ki, bu, 60 AZN məbləğindədir. Bu sayaq turlarda isə görüş saat 06:30-da baş tutur. Daha sonra avtobusda turistlərə səhər yeməyi verilir, Şahdağ kompleksinə gedilir, bir neçə saat burda vaxt keçiriləndən sonra saat 18.00-da hoteldə yerləşdirilir, növbəti gün də eyni qaydada səhər yeməyi verilir, turistlər kompleksə gedir. Saat 17.00-da isə Şahdağ kompleksindən çıxış nəzərdə tutulur.
Azyaşlılar üçün əlavə oturacaq və əlavə yemək sifariş verilməzsə, onlar bu turlardan pulsuz istifadə edirlər. Ödəniş tur başlamazdan ən azı bir gün əvvəl həyata keçirilməlidir. Hətta turları təşkil edən təşkilatlardan bildirilir ki, 10 nəfər və yuxarı sayda turist gətirən təşkilatçı hədiyyə olaraq pulsuz bilet qazanacaq.
Amma 14 fevral - sevgililər günü münasibətilə də bəzi turizm firmaları təkliflərini açıqlayıblar. Bunların arasında “Praqada sevgililər günü” paketi diqqət cəlb edir. Belə ki, 6 gecə 7 günlük paketin qiyməti 599 AZN-dir. Qiymətə aviabilet, transfer, hotel, sığorta xərcləri daxildir.
Bundan başqa, sevgi turları adı ilə maraqlı turlar satışa çıxarılıb. Bu turlar 14 fevraldan başlayaraq, 4 gün-3 gecəni əhatə edir. Şəhərlərə və şərtlərə diqqət:
İstanbul- 340 AZN
Kapadokya- 530 AZN
Roma-640 AZN
Milan-650 AZN
Paris -680 AZN
Qiymətə aviabilet, otel, səhər yeməyi və sığorta daxildir.
Amma “qışda yay istirahəti” başlığı ilə 399 dollar məbləğində, bir həftəlik Şarm əl Şeyx turları da turizm şirkətlərinin təqdim etdikləri sırasındadır.
Turizm mütəxəssislərinin bildirdiyinə görə, Azərbaycanda ən çox -Bakı-Abşeron, Şəki-Zaqatala, Astara-Lənkəran bölgəsini daha çox inkişaf etmiş turizm zonası hesab etmək olar. Quba-Xaçmaz bölgəsi də hər zaman turistlərin diqqət mərkəzində olub. Gəncədə isə turizmin inkişafı zəifdir.
Hesab edək ki, qışda turizmin inkişaf etdiyi bölgələrə səfər etdiniz. Məsələn, Şəkiyə. Araşdırmalarımıza görə, buradakı hotellərdə səhər yeməyi verən iki nəfərlik sadə otaqlar əvvəlki kimi 90 manata, lüks otaqlar isə 150 manata təklif edilir. Səhər yeməyi verilməyən köhnə tipli hotellərdə isə bir nəfərlik otaqda 30 manata, iki nəfərlik otaqda isə 50 manata qalmaq olar. Burdakı hotellərin demək olar ki, hamısında ənənəvi menyu var - Şəki pitisi.
Amma Xəzər dənizi sahillərindəki istirahət obyektlərində, habelə yayın populyar istirahət zonası olan Nabranda da istirahət obyektlərinin böyük əksəriyyəti qışda öz fəaliyyətini dondurur. Fəaliyyət göstərən məkanlarda isə otaqların qiyməti 25-80 manat arasında dəyişir.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər