Arvadını öldürməkdə suçlanan polis zabitinin növbəti şok müraciəti... |
Müəllif: Admin | Bölmə: Xəbərlər | Vaxt: 11-01-2016, 20:43 | Şərh sayı: (0) | Baxılıb: 322
Arvadını öldürməkdə suçlanan polis zabitinin növbəti şok müraciəti...
Samir Əliyev müstəntiqin apardığı istintaqdan razı deyil; Məhbus ekspert rəylərinin saxtalaşdırıldığını iddia edirÖtən ilin yayında törədilən 2 saylı doğum evinin həkim-ginekoloqu Natəvan Əliyevanın dəhşətli qətli ətrafında gedən proseslər böyüyür. Qətllə bağlı həbs edilən mərhumun keçmiş həyat yoldaşı, polis zabiti Samir Əliyev istintaqın gedişindən razı deyil. Noyabr ayında həbs müddəti 4 ay artırılan S.Əliyev müstəntiq Aslan İbrahimovun istintaqı düzgün aparmadığını iddia edir.
Həbsinin 5-ci ayında ekspert rəyləri ilə tanış olan polis zabiti hazırkı həyat yoldaşı Zəminə Əliyeva vasitəsilə “Yeni Müsavat”a göndərdiyi məlumatda rəylərin saxtalaşdırıldığını iddia edib: “Müstəntiq Aslan İbrahimov çoxsaylı məqalələrdən və rəsmi müraciətlərdən sonra məni ekspert rəyləri ilə tanış etmək qərarına gəldi. Lakin ekspert rəylərində pozuntulara və saxtakarlığa yol verildiyinə görə protokola imza atmaqdan imtina etdim. Aslan İbrahimovun üzünü həbs olunduqdan sonra 2 dəfə məhkəmədə görmüşəm. Dəfələrlə yazılı və şifahi müraciətlər edərək, ifadəmə əlavələr etmək istədiyimi, cinayətin kim tərəfindən törədilməsi və müəyyən faktlara əsaslanan məlumatlarımın olmasını bildirsəm də, buna nail ola bilməmişəm. Ekspert rəylərini də mənə öz köməkçisi ilə təqdim edən Aslan İbrahimova suallarımı mətbuat vasitəsi ilə vermək istərdim:
1. Mənzilimdən və avtomobilimdən, üzərimdən götürülmüş şəxsi əşyalara təyin edilmiş məhkəmə bioloji-genetik ekspertizasının rəyinə görə qeyd etdiyim bütün əşyalarda mərhumun qan, tük, və digər izləri aşkar olunmadığı halda, ekspert qarşısında qoyulmuş sualları eynilə bir daha verməklə, ekspertiza təyin etməyinizi və elə həmin əşyalara və avtomobilə təkrar baxış keçirilməsini nə ilə izah edə bilərsiniz?
2. 20 avqust tarixində ekspert tərəfindən verilmiş rəyləri hansı əsas və maraqlara görə 3 aydan sonra mənə təqdim edirsiniz?”
Məhbus ekspert rəylərinin təzad təşkil etdiyini də bildirib: “Ölümün baş vermə səbəbi ilə bağlı suala cavab verən ekspert abzasların birində "bədəndə olan xəsarətdən və ya qanaxmadan ölməsi ehtimal olunur", digərində isə "ölümün dəqiq səbəbini müəyyən etmək mümkün olmamışdır" kimi təzadlı fikirlər irəli sürmüşdür. Ölümün baş vermə vaxtını da dəqiq müəyyən etmək mümkün olmadığını bildirən ekspert, başqa bir abzasda təxminən ölüm vaxtını 29-30 iyun 2015-ci il tarixlərində ehtimal etmişdir. Digər bir rəydə isə belə yazılır: "Avtomobildən götürülmüş tüklərin bir neçəsi morfoloji quruluşuna görə mərhumun tükünə oxşar ola bilər”. Burda sual yaranır: olmaya da bilərmi? Yazıq məhkəmə bu rəyə necə sübut kimi baxa bilər? 8 iyul 2015-ci il tarixində məlum hadisə ilə bağlı meyitxanaya gələndə, avtomobilim yuyucuda olduğu üçün tələsik taksi ilə gəlmişəm. Avtomobildən tük nümunəsinin necə götürülməsi, o tükün ora necə uçub, düşməsini deməyə ehtiyac yoxdur”.
Polis zabiti həyat yoldaşı vasitəsilə mərhumun itkin düşdüyü vaxtlarda da ciddi müəmmaların olduğunu qeyd edib: “Ekspertlərimizin ehtimallara söykənən rəylərinə sübut kimi yanaşsaq, belə qənaətə gəlmək olar ki, mərhumun ya ağır xəsarətdən, ya qanaxmadan, ya da Allah bilir nədən 29-30 iyun 2015-ci il tarixində öldürülməsi güman olunur. Mərhumun 25 iyun tarixindən itkin düşdüyünü, mənim və ailə üzvlərimin 26-27 iyunda polis tərəfindən dindirilərək, Xətai Rayon Polis İdarəsinin inzibati binasında olduğumu, bundan əlavə, avtomobilimdən də Xətai rayon Prokurorluğunun əməkdaşları tərəfindən baxış keçirilərək, ekspertiza nümunələri götürüldüyünü nəzərə alsaq, Aslan İbrahimovu görə bilmədiyim üçün ona cinayəti törətmiş şəxsi müəyyən etməkdə maraqlı şəxs kimi bir neçə sual vermək istəyirəm:
1. 29-30 iyun 2015-ci il tarixində öldürülmüş mərhum itkin düşdüyü 25 iyun tarixindən öldürülməsi ehtimal olunan vaxtadək harada olub? Niyə bunu aydınlaşdırmırsınız? Mən ki, o zaman nəzarətdə idim.
2. Necə olur ki, 26-27 iyun 2015-ci il tarixində Xətai polisində saxlanıldığım zaman hələ çirkli, yuyulmamış olan avtomobilimə baxış zamanı sizin ekspertin aşkar etdiyi tüklərdən aşkar olunmadı? Axı, artıq itkin düşmüş mərhumun saç nümunələrini də yastıqdan götürmüşdülər! Halbuki o zaman məndən daha çox şübhələnməyə əsas var idi.
3. Necə olur ki, çirkli maşında mərhumun tükünə bənzər tüklər olmadı, 13 gün sonra isə tər-təmiz yuyulub, təmizlənmiş avtomobildən tük çıxdı?
Koperfildin bəzi nömrələrini çox məşq etsəm də, tükün uçurdulub, maşına gəlməsindən heç baş aça bilmədim. Lakin yenə də məhkəmə perspektivi olmayan, ehtimal və fərziyyələrlə zəngin rəylər verən müstəntiq-ekspert qrupuna minnətdaram. Nə yaxşı ki, Koperfild yolunun davamçıları qarajımızdan İŞİD-a məxsus tank və ya raket qurğusu aşkar etməyiblər. Bu humanistliyi nəzərə alıb, şəxsən Aslan İbrahimova təşəkkür edirəm və ona bir hüquqşünas məsləhəti verirəm. Cinayət prosesi ittiham və müdafiə tərəfinin çəkişməsi prinsipinə əsaslanır. Sən səhv olaraq, məni təqsirləndirdin və səhv yöndə istintaq aparırsan. Halbuki, 3 övladımın anası öldürülən və himayəmdə 5 azyaşlı qalan ən böyük zərərçəkənəm. Sən isə, bunları nəzərə almayaraq, saxtakarlıq etməkdə davam edirsən. Cinayət Məcəlləsinin 290-cı maddəsini oxu. O maddə bu ölkədə bəlkə də ilk dəfə sənə tətbiq olunacaq”.
Xatırladaq ki, bu il iyulun 6-da Bakı-Quba yolunun 55-ci kilometrliyində, yolun sağ hərəkət hissəsində yandırılmış naməlum qadın meyiti tapılıb. Xızı Rayon Polis Şöbəsi əməkdaşlarının keçirdiyi əməliyyat tədbirləri nəticəsində naməlum qadının şəxsiyyəti müəyyənləşdirilib.
Meyitin 1981-ci il təvəllüdlü Bakı sakini Natəvan Əliyevaya məxsus olduğu bəlli olub. N.Əliyeva Xətai rayonunda yerləşən 191 saylı orta məktəbin direktoru Əliyeva Rəhimə İsmayıl qızının həm gəlini, həm də qardaşı qızı olub.
P.S. Yazıda adı keçən şəxslərin mövqeyini dərc etməyə hazırıq.
Cavanşir ABBASLI,
Musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər