Devalvasiya ölkədən İrana xəstə axınını artıra bilər |
Müəllif: Admin | Bölmə: Xəbərlər | Vaxt: 11-01-2016, 11:21 | Şərh sayı: (0) | Baxılıb: 289
Devalvasiya ölkədən İrana xəstə axınını artıra bilər
Manatın dəyərdən düşməsi səhiyyəyə də ciddi təsir edib, dərmanlar bir neçə dəfə bahalaşıbManatın dəyərdən düşməsi bir çox sahələrdə olduğu kimi səhiyyə sahəsində də qiymətlərin artmasına səbəb olub. Bir tərəfdən xaricdən idxal olunan dərman preparatlarının qiyməti devalvasiya faizinə uyğun olaraq bahalaşıb, digər tərəfdən səhiyyə müəssisələrdə də müayinə və müalicə xərclərində hiss olunacaq artım müşahidə edilir. Belə olduğu halda əhalinin kasıb təbəqəsinin müalicə üçün üz tutduğu İran səhiyyəsi yenidən aktuallaşır. Ehtimal edilir ki, yerli səhiyyə və dərman xərclərinin artması kasıb insanların yenidən şəfanı İranda axtarmasına və əvvəlki axının bərpa olunmasına səbəb olacaq.
Bu fikri “Yeni Müsavat”a açıqlamasında tibb elmləri doktoru Adil Qeybulla da təsdiqləyib. Ekspert bildirib ki, insanların müalicə üçün İrana daha çox getməsi orada səhiyyənin qiymətlərindən asılı olacaq: “Bildiyiniz kimi, orada manat da valyuta kimi işləyir, bu səbəbdən elə bir problem yaşanmır. Qiymətlər Azərbaycandakı kimi olsa və ya daha baha olsa, təbii ki, oraya gedənlər azalacaq. Çünki İrana getməyin əsasında maliyyə faktoru dayanır. Bəzi şəxslər məqsədli şəkildə oraya yönəlirlər, bəziləri də sadəcə hansısa məlumatlara inanıb oraya gedənlərdir. İmkanlı şəxslər, təbii ki, müalicə üçün İranı deyil, Avropanı seçirlər.
İrana adətən əhalinin kasıb təbəqəsi gedir, çünki orada müalicə nisbətən ucuz başa gəlir. Bir də milli səhiyyəyə güvəni olmayanlar, buradan incik düşənlər gedirlər. İmkanlı insanlar daha çox Avropaya, Türkiyəyə axışırlar. Əgər İranda da müalicə xərcləri artsa, oraya gedənlər azalacaq. Orada Azərbaycan manatının işləməsini nəzərə alsaq, gedənlərin sayı arta bilər".
Adil Qeybulla bildirdi ki, İran iqtisadiyyatı inkişafa doğru getdiyindən bu ölkənin səhiyyəsinin də cəlbedici olacağı ehtimal edilir: “Bir faktı nəzərə alsaq ki, İran artıq neft müqaviləsinə qoşulub və bu, iqtisadiyyatının dirçəlməsi deməkdir. İrana qarşı sanksiyaların götürülməsi də bu ölkənin inkişafına səbəb olacaq. Çünki İranda azad iqtisadiyyat var və bu stimullar iqtisadiyyatı bir qədər də gücləndirəcək. İranın iqtisadiyyatı inkişaf edərsə, səhiyyə xərcləri də azala bilər. Hesab edirəm ki, bu sonrakı inkişafından asılıdır.
Əgər bizdə devalvasiya qiymətlərin artmasına səbəb olsa, təbii ki, axın İrana olacaq. İranda devalvasiya olmayıb, iqtisadi sabitlik mövcuddur, səhiyyə qiymətlərində də hər hansı dəyişiklik yoxdur. Bu baxımdan onu demək mümkündür ki, Azərbaycanda devalvasiyadan sonra hər sahədə olduğu kimi, səhiyyə sahəsində də, xəstəxana xərclərində təbii qiymət artımı olacaq. Çünki səhiyyədə istehlak olunan malların əksəriyyəti idxal olunan mallardır, bu da xarici valyuta ilə alınır. Bu səbəbdən qiymətlərin artması da təbiidir. Təəssüf ki, bu sahədə də yerli istehsal hesabına tələbatın ödənilməsi mümkün deyil. Bu baxımdan hesab edirəm ki, İrana gedənlərin sayında artım ola bilər".
Ölkəmizdə devalvasiyadan sonra dərmanların qiymətinin də artdığını vurğulayan A. Qeybulla bu mənada da İran əczaçılığının kasıb təbəqə üçün cəlbedici olduğunu bildirdi: “ Başqa bir tərəfdən yanaşsaq, Azərbaycanda dərmanların da qiyməti artıb, çünki əksəriyyəti xarici valyuta ilə alınır. Bu səbəbdən qiymət artımı təbiidir, devalvasiya faizi dərmanların üzərinə gəlir. Əgər belə bir situasiya varsa, dövlət bu məsələlərə ciddi şəkildə nəzarət etməlidir. Süni qiymət artımının, spekulyasiyaların qarşısı alınmalıdır. Bəzi gündəlik tələbat olan dərmanların, şəkər dərmanlarını və sairin dövlət tərəfindən təminatı olmalıdır. İranda dərmanların Azərbaycanda olduğundan dəfələrlə ucuz olması əczaçılıq məhsulları üçün də bu ölkəyə üz tutanların sayını artıracaq. İranın özünün əczaçılıq sənayesi var və bizdə olduğundan xeyli ucuzdur. Düzdür ki, keyfiyyət məsələsində İran dərmanları Avropa istehsalı olan dərmanlardan geridə qalır, ancaq hər halda Rusiya dərmanlarında qat-qat üstündür”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər