Bankların kredit və əmanət problemi... |
Müəllif: Admin | Bölmə: Xəbərlər | Vaxt: 29-12-2015, 14:26 | Şərh sayı: (0) | Baxılıb: 1005
Bankların kredit və əmanət problemi...
Ekspertlər ölkə banklarının durumunu çox ağır kimi qiymətləndirirlər...
İkinci devalvasiyadan sonra dollarla olan kreditlərin məsələsi ciddiləşib. Əksər ekspertlər bildirirlər ki, məhz problemli kreditlərə görə bankların çoxu müflis olacaq və əmanətlər batacaq. Hazırda kreditlərin təxminən yeddi faizi problemli hesab olunur. Ekspertlər bildirirlər ki, hökumət mövcud durumla bağlı konkret tədbirlər görməlidir. Çünki dollarla kredit götürən vətəndaşların durumu ağırdır. Ekspertlərin sözlərinə görə, devalvasiya zamanı Rusiya, Qazaxıstan kimi ölkələrin təcrübəsinə əsaslanıb müəyyən addımlar atıla bilər.
Devalvasiyadan sonra banklar toplaşıb Mərkəzi Bankla məsələni müzakirə etsələr də, nəticə olmadı. Dollarla olan kreditlərin əvvəlki məzənnə ilə qaytarılacağı barədə əhali ümidli olsa da, banklarda kreditlər indiki, artmış məzənnə ilə tələb edilir. Ancaq bir neçə gün əvvəl Naxçıvanda kreditin devalvasiyadan əvvəlki kursla qaytarılacağı barədə xəbərlər də yayılıb. Bildirilib ki, Naxçıvan Muxtar Respublikası Ali Məclisinin sədri Vasif Talıbovun yanında manatın devalvasiyasının yaratdığı iqtisadi və sosial nəticələrin mümkün qədər kompensasiya edilməsi məsələləri müzakirə olunub. Strateq.az-ın xəbərinə görə, kompleks tədbirlər toplusunun mühüm bir istiqaməti kimi ABŞ dolları ilə kredit borcları olan vətəndaşlara güzəşt məsələsinə baxılıb. Bu məsələ ilə bağlı Ali Məclis sədri tapşırıq verib ki, Naxçıvanda banka ABŞ dolları ilə kredit borcu olan sakinlər borclarını ödəyib qurtaranadək (yalnız kredit borcu olanlar borcunu ödəyən zaman) 1 dollar = 1,05 manat ekvivalentində konvertasiya edilsin. Bu qərar ancaq “Naxçıvanbank”ın müştərilərinə aiddir: “Bankın xarici valyutada kredit portfeli 1 milyon ABŞ dollarına qədərdir və 370 nəfəri əhatə edir. Yaranmış zərər “Naxçıvanbank” ASC tərəfindən qarşılanacaq”.
Ekspertlər Naxçıvanla bağlı bu durumu fərqli dəyərləndiriblər. Ekspert Qadir İbrahimli məsələ ilə bağlı musavat.com-a bildirib ki, kreditin devalvasiyadan əvvəlki məzənnə ilə qaytarılması barədə kredit müqaviləsində bənd varsa, bu, qanunidir, əks halda, qanunauyğun deyil: “Göstərilməyibsə, Naxçıvan hakimiyyətinin inzibati müdaxiləsi ilə baş verib. Ancaq istənilən halda bu, müştərilərin xeyrinə olan addım kimi dəyərləndirilməlidir”.
Ekspert Əkrəm Həsənov isə bildirib ki, bu cür rəsmi qərarın olmasından xəbərsizdir: “Bunun şayiə olması daha realdır. Amma əgər Naxçıvan büdcəsi hesabına banklara həmin fərq ödənilərsə, bu, qanunidir. Əks təqdirdə, qanunsuzdur. Büdcədən banklara pul ödənməlidir”.
Qeyd edək ki, bəzi ekspertlər Naxçıvanla bağlı yayılan məlumatların həqiqətə uyğun olmadığını bildirirlər. Qeyd edilir ki, bu, daha çox Naxçıvan Ali Məclisinin sədri Vasif Talıbovun piarı üçün hesablanmış addımdır.
Yeri gəlmişkən, artıa banklar əhalinin əmanətlərini qaytara bilmirlər. Ekspert Əkrəm Həsənov məsələyə aydınlıq gətirərək qeyd edib ki, Mülki Məcəlləyə əsasən, vətəndaş banka qoyduğu depoziti qoyduğu müddətdən asılı olmayaraq, istənilən vaxt gedib geri götürə bilər: “Bank əmanətin dörddə bir hissəsini dərhal, qalanını isə 5 iş günü müddətində geri qaytarmalıdır. Əgər bank pulu geri vermirsə, təbii ki, qanunu pozur. Əgər büdcəsində pul yoxdursa, o, Mərkəzi Banka müraciət etməlidir. Mərkəzi Bank müraciət edən bankı etibarlı sayırsa, ona kredit verəcək, yox, əgər etibarlı saymırsa, o zaman lisenziyasını ləğv edərək bankı bağlamalıdır ki, vətəndaşın pulu əmanətlərin sığortalanması fondu tərəfindən ödənilsin”.
Dolların bahalaşmasından sonra isə Banklar Assosiasiyası Nazirlər Kabinetinə təklif təqdim edib. Təklifdə deyilir ki, əhalinin banklarda qorunan əmanətləri üzrə 30 min manatlıq hədd və illik 12 faiz dərəcəsi ləğv edilsin. Əgər bu təkliflər qəbul olunarsa, onda əhalinin banklarda olan bütün pulları 100 faiz qorunmuş olacaq. Bildirilir ki, fevralda baş verən devalvasiyadan sonra insanlar banklarda olan əmanətlərinin böyük bir hissəsini dollara çevirib.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər