Erməni komandirin canına vəlvələ salan ƏSGƏR |
Müəllif: Admin | Bölmə: Xəbərlər | Vaxt: 11-04-2016, 23:10 | Şərh sayı: (0) | Baxılıb: 806
Erməni komandirin canına vəlvələ salan ƏSGƏR
Azərbaycan bayrağının zirvədən görünüşü, eləcə də bayraq altında 30 əsgərin sırada düzülüşü onu göstərirdi ki, səhər yoxlanışı zamanı Mübariz İbrahimov şəxsi heyətlədir. Özü də sıranın başında dayanıb.- Əsgər Faiq Hacıyev!
- Burda!
- Əsgər Ülvi Əhmədov!
- Burda!
- ...
Mübariz İbrahimov 30 nəfərin adını sıra ilə oxuduqdan sonra taqım komandiri Fərid Əhmədova hərbi salam verib məruzə etdi:
- Cənab baş leytenant, səhər yoxlanışında şəxsi heyət yerindədir. Sırada 30 nəfər, postda 20 nəfər, növbədə 20 nəfər var. Gün ərzində qanun pozuntusu aşkar edilməyib. Düşmən tərəfdən də sərhəd pozuntusu törədilməyib.
(Bu zaman erməni postlarından bizim məntəqələrə atəş açmağa başladılar. Ətrafdan atışma səsləri yüksəldi)
Taqım komandiri Fərid Əhmədov hərbi yerişlə iki addım atıb, əsgərləri salamladı:
- Salam, əsgər!
- Salam!
Komandir:
-Mənə çatan məlumata görə, Mübariz İbrahimov döyüş məntəqəsindən çıxan hər bir əsgərin silahını yoxlatdırır, təmizliyinə baxır. Hər gün səhərlər şəxsi heyəti sıraya düzüb idman elətdirir. Başqa nə cür olmalıdır? Siz əsgərsiniz! Silahınız da, özünüz də həmişə hazır və təmiz olmalıdır! Sərhəddə - düşmənlə üzbəüz postda dayanırsınız. Burada hər an, hər dəqiqə atışma olur. Silahınız həmişə hazır olmalıdır ki, düşmənə cavab verə biləsiniz. Bir sözlə, sizin hər biriniz Vətəni qorumaq üçün buradasınız! İdman bu işin əsas amilidir, eyni zamanda hər birimizin sağlamlığıdır.
Komandir şəxsi heyətdən hərbi xidmətdən sonra nəçi olacaqlarını soruşanda, sadəcə 5 nəfər hərbçi olacağını dedi. Kimi bankda işləyəcəyini, kimi təhsilinə davam edəcəyini dedi.
- Baxın, Mübariz İbrahimov Daxili Qoşunlarda əsgərliyini başa vurub, o da bankda işləyib, amma sadəcə altı ay, sonra yenə horbi xidmətə gəlib. Xidmət üçün ən ağır cəbhə xəttini seçib. Niyə, bilirsinizmi? O deyib ki, "mən Vətəni qorumalıyam!". Siz də onu özünüzə nümunə götürməli, onun kimi vətənpərvər olmalısınız.
Taqım komandiri nitqinə davam edirdi. Digər tərəfdən də atışma səsləri kəsmirdi.
Fərid Əhmədov "Azad!" komandasını verib, Mübarizlə əsgərlərin postlarını yoxlamağa getdi.
Əsgərlərlə bir az söhbət aparandan sonra üzünü Mübarizə tutub dedi:
- Sən az vaxtdır burada olsan da, axşamlar belə, istirahət vaxtını postlarda olan əsgərlərlə keçirirsən. Bəs yorulmursan?
Mübariz İbrahimov:
- Yorulmuram, komandir, bura Vətən torpağı deyilmi?! Mən də Vətənin qulluğundayam. Gecələr əsgərləri yoxlayıram. Eləsi var ki, yeni gəlib, qorxur. Mən ona ürək-dirək verir, qorxusunu dağıdıram, əsgərlərimizə başa salıram ki, ermənilər bizdən gücsüzdür. Biz onlardan qoxmamalıyıq, çünki güclü ordumuz var.
Komandir:
- Bilirəm, xəbərim var. Ötən gecəni də səhərəcən əsgərlərlə bir yerdə olmusan. Get dincəl, istirahət elə. Azadsan.
Mübariz:
- Oldu, cənab komandir!
Atışma isə davam edirdi.
Bundan sonra Mübariz snayperi götürüb neytral zonada, erməni səngərlərini aydın görə biləcəyi bir yüksəkliyə qalxdı. Ermənilər hava telefonu ilə bizim postdakıları qızışdırırdılar:
"Biz gələcəyik, o, əraziləri də alacağıq. Çıxın gedin oradan...
Mübariz torpaqdan seçilməyən hərbi geyimi ilə təpənin üstündə özünə mövqe seçdi.
Snayperin gözlüyündən erməni səngəri aydın görünürdü.
Qarşıda başqa post da vardı. Erməni komandir atəşə ara verib, yeni gələn 20-yə yaxın əsgərə (onlara əsgər demək olmazdı, ən böyüyü onuncu sinif şagirdi ya olardı, ya olmazdı. Orta məktəbdə onlara güllə atmaq təlimi keçilirdi. Təcrübə üçün isə həqiqi savaş meydanına göndərilirdilər) Azərbaycan tərəfə atəş açmaq öyrədilirdi.
Mübariz onların bir neçəsinin gülləni atmayıb ciblərinə qoyduğunu görürdü. Erməni komandir həmin o 20 nəfərlə "KamAZ" markalı yük maşını ilə gətirilən növbəti dəstənin yerini dəyişdi. Mülki geyimli, orta məktəb uşaqları üzü Azərbaycana tərəf atəş açmağa başladılar. 20 nəfərin atəşi bəs deyilmiş kimi, erməni komandir də hava telefonunda sözlə aranı qatırdı.
Mübariz hava telefonuna cavab verdi:
- Hə, hə, eşidirik. Əgər sən indi atışmanı saxlamasan, 20 nəfər məktəbli öldürüləcək!
Qarşı səngərdə təlaş başladı. Erməni komandirin vasvasalı halı ətrafındakılara da sirayət etdi. O bağırırdı:
- Sən kimsən? Haradasan? Atəşi dayandırmasaq nə olacaq hə, nə olacaq?!
Mübarizin atəşi onun əlindəki hava telefonunun antenasını tərpətdi:
- Əgər atəşi dayandırmasan, ikinci güllə beyninə dəyəcək!
Erməni komandir nə baş verdiyini anlamağa macal tapmadan əsgərlərinə "atəşi kəsin!" deyə əmr verdi. Hava telefonundan onun səsi gəlirdi:
- Əsgər, saxladım! Sən kimsən? Bizi haradan görürsən? Bunu necə elədin? Harada olduğunu de!
Mübariz:
- Mən sizi hər yerdə görürəm. İnanmırsan, bax, sənin başın qarışanda üç məktəbli güllələri ciblərinə doldurdular. Bax o sarı şalvarlı var ha, hələ limonka da oğurlayıb.
- Nə?!
Hirsindən az qala dəli olan erməni komandir yük maşındakıları düşürdü. Üstlərini yoxlayanda Mübarizin haqlı olduğunu gördü.
- Əsgər, sən düz deyirsən. Axı sizin postunuzdan bura görünmür, sən buranı necə görə bilirsən?
Mübariz artıq postdan enmişdi. İndi də öz çarpayısına uzanıb ermənini ələ salırdı:
- Bəs mənim hər yerdə gözüm var, bilmirsən? Hər yerdən görürəm elədiyiniz qələtləri.
- Hə? Onda de görüm indi neynirəm, hə, de!
Ətrafından gələn məktəblilərin səsi ermənini ələ verirdi. Mübariz:
- Nə edəcəksən, o uşaqları döyürsən, ən çox da o sarı şalvarlını.
- Hə, o limonka oğurlayanı deyirsən? Ay Allahın azərisi, sən bu otağın içini haradan görürsən? Niyə mənə yaxşılıq eləyib içimizdəki oğrunu dedin?
- Ona görə ki, mən sizin kimi cani deyiləm. O məktəbli qumbaranı məktəbdə partlada bilərdi və günahsız uşaqlar ölərdilər.
- Mən başa düşə bilmirəm səni. O erməni uşağıdır, qumbaranı da erməni məktəbində partladacaq. Niyə istəmirsən, ermənilər ölsün? Axı onlar sənin düşmənindir.
- Bizim düşmənimiz sizsiniz, azyaşlı uşaqlar deyil! Nə isə, səninlə çox danışdım, mən yatmamışam, gecə güllə atıb məni oyatmayın ha!
Mübariz telefonu söndürəndə komandiri ona yaxınlaşdı:
- Sən o dığaları necə susdurdun? Onlara nə dedin ki, belə qorxuya düşdülər? Bayaqdan o erməni iti Kamo ilə sənin danışığına qulaq asıram.
- O artıq kapitan Kamodur?
- Hə, odur. İki ildir burada komandirəm, Kamo hava telefonundan bizim xəttə girib, bizi hədələyir, özünü telefonda göstərir, sən onu yaxşı susdurdun. Halaldır, qardaş! Dincəl.
O əlini Mübarizin çiyninə vurub uzaqlaşdı.
Səhəri gün Mübariz yuxudan oyandı. Yuyunub, vaxtında namazını qıldı, ibadətini etdi. Sonra da adəti üzrə postlara baş çəkdi. Postlardan birindəki hava telefonundan qoca bir erməninin səsi qulağına çatdı. Erməni bizim əsgərlərə, inəyinin sərhədi keçdiyini deyir, gəlib aparması üçün yalvararaq izn istəydi.
Mübariz:
- Niyə cavab vermirsiniz?
Əsgər:
- Komandir icazə vermir. Ermənilərin işi-gücü bizi telefonda ələ salmaq, bizimlə dalaşmaqdır.
Mübariz telefonu aldı:
- Qoca, get inəyini qaytar, sənə heç kim güllə atmayacaq.
- Yoxsa sən komandirsən? Adın nədir?
- Neynirsən adımı?
- Sizinkilər məni güllələsə, uşaqlar ac qalsa, bilim ki, mənim qatilim kimdir.
Mübariz:
- Biz erməni deyilik, azərbaycanlıyıq. Bizim işimiz qocalar, uşaqlar deyil, get heyvanına sahib çıx, qoca.
Qoca erməni heyvanına tərəf getmək istəyəndə əsgərlərimizdən biri Mübarizdən icazə alıb hava telefonundan asılı qalan qocaya:
- Sən heyvanını sağ-salamat alıb gedə bilərsən. Amma biz tərəfdə bir uşaq, bir yaşlı, ya da eləcə bir heyvan görünən kimi sizin postdakılar atəş açır. Get özünüzünkülərə de ki, bizim də silahımız var, amma biz sizə toxunmuruq. Siz heyvanınızdan ötrü yalvarırsınız, gedin götürün, biz buna icazə veririk.
- Mənim kimi imkansız birinin heyvanına güllə atanın Allah bəlasını versin. Sizdə mənim kimi iki inəyindən başqa heç nəyi olmayan bir kasıb yoxdur. Mənim varım-yoxum heyvanlarımdır, onlar olmasa, uşaqlarım, nəvələrim acından öləcək, - deyən qoca erməni Azərbaycan postu yaxınlığına qədər gəlib heyvanları öz tərəflərinə doğru haylamağa başladı. Hava telefonunu da əlindən buraxmayıb əsgərimizlə danışırdı.
Mübariz planşetindəki dəftərçəyə erməni qocanın hansı istiqamətdə getdiyini qeyd edirdi. Öz-özünə düşünürdü ki, bəlkə də bu erməninin getdiyi yerdə mina var. Qoca erməni öz postuna çatandan sonra da danışmağa davam edirdi:
- Deyin görüm mənə bu yaxşılığı edən kimdir? Mən onu tanımaq istəyirəm.
Mübariz:
- Mənim adımı neynirsən, qoca?
- Mənim adım Radikdir. Bakının çörəyini yemişəm, hər şeyim vardı, Allah müharibə salanın bəlasını versin. İndi mənim iki inəyimdən başqa heç nəyim yoxdur. Sən ki mənim malıma sahib çıxmağa icazə verdin, mən hər gün sənə dua edəcəyəm. Xahiş edirəm, mənə adını de.
- Mənim adım əsgərdir. Əsgər.
- Ara, sənin adına qurban olum, ara, bizim komandir Kamonu qarınağrısına salan sənsən? Sənin adın gələndə yaman qorxur. Əsgərlərin başının üstünü kəsdirib səndən danışır. Elə hey deyir: "Bir əsgər var, gəlib bizi qıracaq". Ara, sən onun canına elə qorxu salmısan, hər gün adını sayıqlayır.
- Qoca, sən bunları haradan bilirsən?
- Mənim nəvəm orda əsgərdir. Ara, köpəyin oğlu əsgərlərin pulunu alıb, evə buraxır. Oradakı əsgərlərin yarısından çoxu evlərində olur. Hər ayda bir dəfə gəlib onun "dolya"sını verib gedirlər. Mənim kimi kasıbların balaları da onların əvəzinə postda durur. Sən onu necə qorxutmusansa evə buraxdıqlarını yığır başına, hər posta iki-iki əsgər qoyur.
- Yaxşı, sən bizim dili hardan bilirsən?
- Bakı ermənisiyəm də, "Zavağzalnı"da, Stepanyan 36 ünvanında yaşamışam. Məni orda hamı tanıyır. Bakıda pulum, varım dövlətim başımdan aşırdı. Ara, 1990-cı ildə bura, Qarabağa gəldim, hər şeyim əlimdən çıxdı. İndi acından ölürəm, bir oğlum Xocalıda öldü, biri də müharibədən sonra vərəmdən öldü. Bir qızım Krasnodardadır, indi nəvələrimlə tək qalmışam.
- Xocalını yadıma salırsan, qoca, deyirsən, oğlun orada ölüb, hə?
- Hə, mən də itki verdim orda. İndiki müdafiə naziri Seyran Ohanyan, indiki prezidentimiz Sarkisyan bizə od qoyublar. Mən Qarabağa yeni gəlmişdim, pulum-malım vardı. Oğlum 18 yaşın içindəydi, Xocalıdakı dəhşətləri görüb dözmədi, özünü öldürdü.
- Nəyə görəsə mən sənə inanmıram. Heç erməniyə oxşamırsan...
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər