Maniakal həvəsin 5 dəfə azalması |
Müəllif: Admin | Bölmə: Xəbərlər | Vaxt: 22-01-2016, 21:58 | Şərh sayı: (0) | Baxılıb: 229
Maniakal həvəsin 5 dəfə azalması
Deyəsən, avtomobil manyaklığı erası sona yetir. Xəbər yayılıb ki, son bir ildə ölkəyə gətirilən avtomobillərin sayı 5 dəfə azalıb. Beş dəfə! Balaca rəqəm deyil. Bu o deməkdir ki, ötən illərdə ölkəyə 100 (1000, 10 000) avtomobil gətirilirdisə, indi 20 ( 200, 2000) avtomobil gətirilir.Deməlii ölkədə 5 dəfə az avtomobil alınıb-satılır.
Ölkəyə gətirilən avtomobillərin sayının 5 dəfə azalması, bu sahədən dövlət büdcəsinə daxil olan gömrük rüsumlarının 5, bu işə baxan məmurların rüşvətinin 10 dəfə azalması deməkdir.
Rüsum və rüşvət büdcəsini qoyaq bir qırağa, buna ayrı adamlar baxır, biz xalqımızın avtomobil alıcılığı qabiliyyətinin qəfil zərbə almasından danışaq.
Pis çıxmasın, bu, inqilabi situasiyadır. Görün, vəziyyət necə qəlizləşibsə, camaat (7-dən 77-yə maşınsız hər kəs) öz ülvi arzusunu, şəxsi avtomobil sahibi olmaq planını gerçəkləşdirə bilmir və müvəqqəti də olsa, bu arzunu öz qəlbinin kameralarında boğub.
Bura cibində ilk 250 manatı hiss edən kimi gedib 1970-ci ildə buraxılmış və 50 il istismarda olduğu üçün cırıq-cırıq olmuş “Jiquli”ni sürüyərək dəmirçi sexinə aparan, “usta, yavaş-yavaş zapçast alıb verəcəm, bundan mənə maşın yığ” deyən avtomobil həvəskarlarının vətənidir.
Aylıq qazancı 500-ü keçən kimi bankdan 40 min manat kredit götürüb cip növlü avtomobil alan, “bunun kreditini verim, yenə kredit götürüb ev də alacam” deyə yaxınlarına öz planları barədə anons verən maşın azarkeşləri də bu ölkədə yaşayır.
Evi yoxdur, kirayələrdə yaşayır, amma 40 minlik maşın sürür, düşmənlərini çatladır.
Yadımdadır, on il öncə bizim məhəllədə, 6 doqquzmərtəbəli binanın geniş həyətində 6-7 avtomobil dayanırdı. Çoxu da “Niva”, “Vaz-2107" idi. İçində bir ”Opel-Astra" da vardı. Sonra nə oldusa, nə baş verdisə, avtomobillərin sayı sürətlə artmağa başladı. “Mersedes”lər, “Hunday”lar, “Toyota”lar böyür-böyürə sıralandı. Bir dəfə səhər-səhər eyvanda dayanıb ərinməz-ərinməz gözümə görünən avtomobilləri saydım: 77 dənə. Hələ buraya həmin vaxt ölkənin və paytaxtın yollarında hərəkətdə olan, yardımçı binaların arxasında olduğu üçün görmədiyim avtomobilləri də əlavə etmək lazımdır.
Nə demək olardı? Hər evə maşın lazımdır və imkan varsa alınmalıdır. Hiss olunurdu ki, bir çoxunun imkanı var. Bunu ondan bilmək olardı ki, onlar tez-tez maşınlarını dəyişir, hər dəfə yenisini və daha bahalısını alırdılar. Ancaq yuxarıda dediyim kimi, maşın almağa və saxlamağa imkanı olmayan, hətta ailəsi ilə toya gedəndə taksiyə verməyə pulu çatmayan adamlar da ümumi kampaniyaya qoşulmuşdular, avtomobil sahibi olmaq istəyirdilər. Təbii ki, onların buna haqqı vardı, təəssüf ki, imkanları yox idi. Banklar da kredit kisəsinin ağzını açaraq camaatın arzusunu ürəklərində, qazandıqları pulu ciblərində qoymurdu.
Ayda iki-üç dəfə gedib Gürcüstandan avtomobil gətirən və tanış-tunuşlarına satan bir simsar adam and içirdi ki, Rustavi şəhərinin yaxınlığındakı maşın bazarına girirsən, elə bilirsən, Badamdarsan - hər yan azərbaycanlılardır, alırlar, satırlar, çənə-boğaz edirlər.
Hər gün yol keçəndə görürdük ki, iki mərtəbəli banında minik avtomobilləri daşıyan traylerlər karvanı gömrük məntəqələrinə, ordan da avtomobil salonlarına gedir. Adama elə gəlirdi ki, Cənubi Koreyanın, Yaponiyanın, Almaniyanın avtomobil zavodları sırf ölkəmiz üçün işləyir.
Bu mənzərəni görənlərin bəziləri deyirdi: “Vay dədəə! Bu qədər maşın hara yerləşəcək? Vallah, belə getsə şəhərdə tərpənə bilməyəcəyik”.
Amma belə getmədi. Neftin qiyməti düşdü, düşdü, camaatın pul-parası azaldı, azaldı, o yerə çatdı ki, çörək imtahanı qorxusu maşın həvəsini öldürdü.
İndi bu həvəs 5 dəfə azalıb. Artıq maşın almaq üçün kredit götürənlərin sayı da sıfıra yaxınlaşıb. Bununla belə, hələ 5 il ölkəyə bir maşın gətirilməsə belə, salonlarda və camaatın əlində alıb-satmağa maşın var. Bircə “rastamoşka” işinə baxan məmurlara yazıq oldu...
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər