Jurnalistlərin maaşı iki ildir ki, artmır |
Müəllif: Admin | Bölmə: Xəbərlər | Vaxt: 19-01-2016, 20:01 | Şərh sayı: (0) | Baxılıb: 285
Jurnalistlərin maaşı iki ildir ki, artmır
İlginc sorğu nəticələri... Jurnalistlərin Həmkarlar İttifaqı (JuHİ) Azərbaycan jurnalistlərinin 2015-cü ildə sosial durumlarının öyrənilməsi üzrə sorğunu yekunlaşdırıb.
JuHİ sədri Müşfiq Ələsgərli bildirib ki, təşkilatın keçirdiyi sorğuya ictimai rəyə təsir imkanları və stabil dövriliyi ilə seçilən 30 ümumrespublika yayımlı qəzet, 8 informasiya agentliyi, 10 xəbər portalı, həmçinin 10 həftəlik qəzet, 4 televiziya redaksiyasının əməkdaşları cəlb ediliblər (ümumilikdə 62 redaksiya əhatə olunub).
Sorğu iştirakçıları çalışdıqları redaksiyalarda aylıq gəlirlərinin miqdarı, əmək münasibətlərinin rəsmiləşdirilməsi, sosial və tibbi sığortaya cəlb edilmələri, həmçinin, 2015-ci ildə onları daha çox qayğılandıran problemlər və ilin uğurları barədə sualları cavablandırıblar.
Sorğu nəticəsində məlum olub ki, işçilərlə fərdi əmək müqavilələrinin bağlanmasında vəziyyət dəyişməyib. 2014-cü ildə olduğu kimi, 2015-ci ildə də sorğuya cəlb edilənlərin 90 faizdən çoxu redaksiyalarda fərdi əmək müqavilələri bağlandığını bildiriblər. Müqavilələrin redaksiyaların bütün əməkdaşlarına şamil edilməməsi problem də ötən illərdə olduğu kimi qalır. Orta hesabla, əksər redaksiyada ən yaxşı halda əməkdaşlardan yalnız 60 faizi ilə fərdi əmək müqavilələri bağlanır, təqribən 40 faizə qədər əməkdaş əmək münasibətləri rəsmiləşdirilmədən, şifahi sövdələşmə ilə çalışdırılırlar. Əmək qanunvericiliyinə edilən yeniliyə uyğun olaraq, əmək münasibətlərinin rəsmiləşdirilməsinin elektron informasiya sistemi müstəvisinə keçirilməsi ilə bu sahədə ciddi səhman yaradılıb. Amma hələ ki, prosesi sona çatdırılmayıb.
Bundan başqa, tibbi sığortanın tətbiq edilməsi məsələsində irəliləyiş və ya geriləmə yoxdur. Tibbi sığortanın tətbiq edilməsi vəziyyəti minimum həddə - 5 faizdən aşağıdır.
Jurnalistlərin aylıq gəlirlərində də sabitlik müşahidə edilib: Ümumrespublika yayımlı telekanallarda, informasiya agentliklərində, gündəlik qəzetlərdə və populyar xəbər portallarında çalışan jurnalistlərin aylıq gəlirləri 500-600 manat civarında olub (sorğu iştirakçılarının 87 faizi). Bu kateqoriya üzrə sorğu iştirakçılarının az qismi (2 faiz) 350-450 manat, qalanları isə (11 faiz) 700-800 manat və daha yuxarı həddə aylıq gəlir əldə etdiklərini bildiriblər. Məlumat üçün qeyd edək ki, ötən illə müqayisədə jurnalistlərə 700-800 manat əmək haqqı verilən redaksiyaların saylarında artım olub (5 faizdən11 faizə yüksəlib).
Analoji vəziyyət ümumrespublika yayımlı həftəlik qəzetlərdə çalışan jurnalistlərin aylıq gəlirlərində də mövcud olub. Bu kateqoriya üzrə redaksiyalarda çalışan jurnalistlərin orta aylıq gəlirləri 250-350 manat arasında dəyişir.
Hesabatın nəticələrinə görə, regionlarda da durum ürəkaçan deyil. Belə ki, regional qəzetlərdə çalışan jurnalistlərin orta aylıq gəlirləri 150-250 manatla ifadə olunur. Regional televiziyalarda çalışan jurnalistlərin və mərkəzi TV-lərin regional təmsilçilərinin aylıq gəlirləri isə 200-400 manat aralığında dəyişir.
Məlumat üçün qeyd edək ki, Azərbaycanda yaşayış minimumu 136 manat müəyyən edilib.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər