Qiymətlər bahalaşır, toy xərcləri artır: Evlənməyə tələsin... |
Müəllif: Admin | Bölmə: Xəbərlər | Vaxt: 18-01-2016, 15:24 | Şərh sayı: (0) | Baxılıb: 333
Qiymətlər bahalaşır, toy xərcləri artır: Evlənməyə tələsin...
Manatın devalvasiyası, bir çox sahələrə, o cümlədən, toy mərasimləri üçün lazım olan atributların qiymətinə də təsir göstərib. Hazırda toy adət-ənənələrinin olmazsa-olmazı sayılan briliant qaşlı qızıl üzük, nişan alyansları, gəlinliklər, maşın bəzədilməsi, gül dəstəsi və sair mal və xidmət sahələrində qiymət artımı müşahidə olunur. Bu da ailə qurmağa hazırlaşan gənclərin büdcəsinə təsir göstərir. Musavat.com-un müxbiri toy hazırlığı ənənələrinin izinə düşərək bir çox sahələrdə qiymətlərlə maraqlanıb.
Qızılın qiyməti oğlan evinin yuxusunu ərşə çəkir
Əvvəlcə yolumuzu paytaxtın iri ticarət mərkəzlərindəki qızıl dükanlarından salıb, nişan üzüklərinin və qızıl dəstlərinin qiyməti ilə maraqlandıq. “Laçın” ticarət mərkəzində nişan üzüklərinin qiymətləri əvvəl 300 manatdan başlayırdısa, indi 500 manatdan başlayır. Gəlinliyə namizədlərin vazkeçilməz arzusu olan müxtəlif dizaynlı təkqaşlı üzüklər 500-1300 manat arasında dəyişir. Zövqlü bir üzük almaq üçün bəyin cibində ən azı 1000 manat olmalıdır.
Daha təvazökar cütlüklər isə 500-550 manata sadə bir briliant qaşlı üzük ala bilərlər. Əsas üstünlük 750 əyarlı qızıla verilir. Satıcılar da etiraf edir ki, bir neçə ay əvvəl 700 manata olan qızıl indi 1200 manatdır. Üçlü qızıl dəstlərin (üzük, sırğa, boyunbağı) qiymətləri isə 2500 manatdan başlayır, 5000-6000 manata qədər davam edir. Təbii ki, satışda bundan da bahalı dəstlər var.
Halbuki, ötən ilin ortalarında eyni zərgərlik məhsullarını 1300-1500 manata almaq mümkün idi. Satıcılar isə toy ərəfəsində olanlara qızıl almağa tələsməyi məsləhət bilir. Deyirlər ki, qızıl ayın sonuna doğru yenidən bahalaşacaq.
Satıcılar bahalaşmanın səbəbini dolların bahalaşmasında və qızıla aksiz vergisinin tətbiq olunmasında görürlər. Deyirlər ki, bahalaşma zinət məqsədli qızıla olan tələbatı öldürüb. İmkansızlıq səbəbindən toy edən cütlüklər daha sadə və ucuz qızıla üstünlük verirlər.
Səbinə adlı satıcı deyir ki, onların işi də böhran vəziyyətindədir: “Qızılı Dubaydan gətirirəm, burada satdıqca hissə-hissə pulunu göndərirəm. Ödəniş vaxtı çatanda elə olur ki, dəyər-dəyməzinə, mayasına satmalı oluram. Elə olur ki, saatlarla bir nəfər yaxınlaşmır, az qala havalanırıq. İnsanlarda ərzaq almağa pul yoxdur, qızıla pul verməyə çətinlik çəkirlər”.
Qeyd edək ki, burada da alıcı qıtlığı yaşanır. Alanlardan çox evlərindəki qızılı gətirib, satanlar gözə dəyirdi.
Göz qamaşdıran, “əl yandıran” gəlinliklər...
Qızıl sektorundan çıxıb, gəlinliklərin kirayəsi ilə maraqlanırıq. Məlum olur ki, burada da 50-100 manat qiymət artımı var. Kirayə qiymətləri əvvəl 100 manatdan başlayırdısa, indi normal bir gəlinlik 200 manatdan bahadır. Qiymətlər 150-500 manat arasında dəyişir. Daha gözəl zövqü olanlar daha çox pul ödəməli olurlar.
Gəlinlik kirayəsi ilə məşğul olanlar deyir ki, burada təklif olunan toy libaslarının əksəriyyəti hazır şəkildə xaricdən gətirilir. Bu isə xarici valyuta ilə olduğu üçün əvvəlkindən təxminən iki dəfə baha çıxır. Burada tikilən gəlinliklərin isə həm parçası, həm də bəzək üçün vurulan daş-qaşı da xaricdən gəlir. Bu baxımdan dolların bahalaşması onların da bazarına təsir edir.
Xınayaxdı mərasimləri üçün kirayə verilən kəcavənin bir günlük kirayəsi 150 manatdır. Kəcavənin hazır şəkildə gətirilib, qurulması və aparıcı bir yerdə 250 manata, bunun üzərinə kamera, musiqi, gəlinin rəfiqələrinin geyimini də gəlsək, 500-600 manata başa gəlir.
Müsahiblərimin sözlərinə görə, gözəllik salonları da qiyməti qaldırıb. Ən ucuz gəlin bəzəmək 200 manatdan başlayır. Ən bahalı “gəlin başı” 400-500 manata başa gəlir.
Gəlin maşınları bəy tapa bilmir: Tələbat azalıb...
Növbəti ünvanımız metronun “Xalqlar dostluğu” stansiyasının yaxınlığında, “Laçın” ticarət mərkəzinin qarşısındakı gəlin maşınlarının dayanacağıdır. Burada həm müasir, həm də antik görünüşlü maşınlar təqdim olunur.
Qiymətlər isə əvvəlki dövrlə müqayisədə hiss olunacaq dərəcədə ucuzlaşıb. Bir zamanlar 150-200 manatdan aşağı qiymətə yerindən tərpənməyən maşınları, indi hətta 60-80 manata şəhəriçi sürə bilərsiniz. Sürücülük vəsiqəsi olanlar təkcə maşını, olmayanlar isə sürücü ilə birlikdə maşını kirayələyə bilər.
Dayanacaqdakı əksər maşınların qiyməti 80-100 manat arasında dəyişir. Maşın bəy evinə hazır bəzəkli şəkildə gətirilir. Bəy evindən gəlin gətirməyə, oradan isə restorana getmək də ümumi qiymətə daxildir. Ən bahalı maşınlardan “Chrysler” 200 manata, “Mercedes Galenvagen” 150 manatadır. Təxminən bir il öncə bu avtomobillərlə gəlin aparmaq 350-400 manata başa gəlirdi.
Gül salonlarında da müştəri qıtlığı var
Toyun hər bir mərhələsində, istər nişanda, istər xınayaxdı və toyda hər iki tərəfin yolu gül dükanlarına düşə bilər. Burada həm gül buketlərinin və hədiyyələrin bağlanması, həm də maşınların, evlərin bəzədilməsi xidmətləri təklif olunur.
Güllərin qiymətində isə elə də ciddi bir artım yoxdur. Ən çox tələbat olan qırmızı qızılgülün qiyməti 4-5 manat arasında dəyişir. Digər dekorativ güllər isə 2 manatadır. 10 ədədlik qızılgül buketi 50-60 manata başa gəlir.
Satıcı deyir ki, müştərilərin də, buketlərə yığılan güllərin də sayında azalma var: “Əvvəllər gəlin buketləri 30-50 güllə bağlanırdı. İndi əksər müştərilər maksimum 10 gül sifariş edirlər. Gəlirlərimiz o qədər azalıb ki, icarə haqqını çətinliklə veririk”.
Əhalinin gəlirlərinin azalması və buna paralel olaraq, mal və xidmətlərin bahalaşması toya hazırlaşan ailələrin artıq xərclərdən çəkinməsinə səbəb olur. Bu isə qanunun nail ola bilmədiyi toy qadağalarının könüllü tətbiqinə gətirib, çıxarıb.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər