Xalq üçün “üzən məzənnə” rejimi |
Müəllif: Admin | Bölmə: Xəbərlər | Vaxt: 9-01-2016, 09:39 | Şərh sayı: (0) | Baxılıb: 210
Xalq üçün “üzən məzənnə” rejimi
İstənilən bir işdə ən pis şey qeyri-müəyyənlikdir, ala-yarımçılıq, hədəflərin yayğınlığıdır. Təhlükə də dəqiq bilinəndə ona qarşı tədbir tökmək qat-qat asan olur, nəinki bu təhlükə iqnor olunanda, ciddiyə və vecə almayanda, dəqiq təsəvvür və təsvir etməyəndə.
Nəyə gətiririk sözü? İlk növbədə ona gətiririk ki, bu gün Azərbaycan hökuməti manatın ABŞ dollarına nisbətdə kursundan dolayı ölkə və toplumu, həmçinin, dövlətçiliyi gözləyən ciddi təhlükələri real hesablaya bilmir. Yaxud hesablamaq istəmir və bu təhlükələrə barmaqarası baxır.
Hər halda, bir daha vurğulanmalıdır və bunu müstəqil ekspertlər də təsdiqləyir ki, rəsmilərin atdığı addımlar manatın 98%-lik dəyər itkisindən sonra yaranan duruma adekvat deyil. Heç onun 1%-i də deyil və yenə kosmetik mahiyyət daşıyır.
Vəziyyət isə gerçəkdən ağırdır və həftəbəhəftə daha da ağırlaşmaqdadır. Sanki vətəndaşlar başlı-başına, taleyin ümidinə buraxılıb. Sonuncu cümlədə “sanki” sözünü yazmamaq da olar. Çünki manatın kursu ilə birgə, xalq da faktiki, başlı-başına, “üzən məzənə” rejiminə buraxılıb.
Acı gerçək belədir ki, ABŞ dollarının kursu qalxmaqla zəruri tələbat mallarının və xidmətlərinin qiymətləri də onunla bərabər qalxır. Bu da yerli istehsalı olmayan, qeyri-nefti sektoru inkişaf etməmiş, idxalı ixracı üstələyən bir ölkə üçün xarakterikdir və hamımızı haqlı şəkildə narahat edir.
Əslində manatın kursunu saxlamaq bu gün Qarabağdan da vacib məsələyə çevilməlidir hakimiyyət üçün. Zira, hər şey torpaqları azad edəcək vətəndaşın, xalqın, əsgərin iqtisadi durumundan başlayır. Valyuta sabitliyi, uğurlu valyuta siyasəti - daxili iqtisadi-sosial sabitlik, vətəndaş barışının kövrək şəkildə də olsa qorunub saxlanması deməkdir, dövlətə yeni xarici təhlükə və təhdidlərin artmaması, ordu quruculuğuna davam deməkdir. Sadalananlar işğalçı Ermənistanı ram eləməkdən ötrü əsas şərtlərdir...
Yazının girişində qeyri-müəyyənlikdən yazdıq. Daxili və xarici siyasətdə bu, olduqca vacibdir. Ən azı o səbəbə ki, dünya, müvafiq beynəlxalq maliyyə qurumları real vəziyyətimizi dəqiq bilməlidir ki, kritik anda Azərbaycan xalqına konkret kömək əli uzada bilsin. Əgər hökumət ənənəvi şəkildə öz qüruruna salıb bu işi də görmək istəmirsə, əhalinin etiraza qalxmamasından ürəklənib guya hər şeyin qaydasında olması təsəvvürü yaratmağa çalışırsa, onda bizi manatın devalvasiyasından da betər aqibət gözləyir...
Xarici siyasət kursunun müəyyənliyinə gəlincə, Azərbaycan heç qardaş Türkiyə ilə indiyədək gərəkən əlaqələr sistemi qurmağa nail olmayıb. Əks halda Bakı mənfur ermənilərin 1 nömrəli müttəfiqi olan Rusiya vətəndaşlarına viza rejimi tətbiq etmədiyi halda, türkiyəli qardaşlarımıza qarşı belə bir rejimi qüvvədə saxlamazdı.
Hədəflər qeyri-müəyyən olanda, xarici-daxili təhlükə və təhdidlər düzgün hesablanmayanda ayrı necə ola bilər ki. Azərbaycanın əsas dərdi bu gün ona düzgün diaqnoz qoyulmamasıdır. Diaqnoz səhvdirsə, “müalicə” də yanlış yöndə gedəcək və hətta daha ağır nəticələrə gətirəcək...
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər