İsveçrədən GUAM mesajı |
Müəllif: Admin | Bölmə: Xəbərlər | Vaxt: 25-01-2016, 15:50 | Şərh sayı: (0) | Baxılıb: 176
İsveçrədən GUAM mesajı
İqtisadçı deputat Azərbaycanın Davos Forumunda iştirakını yüksək dəyərləndirir“Davos Dünya İqtisadi Forumu iqtisadi xarakterli tədbirlərin zirvəsidir. Orada müzakirə olunan məsələlər dünya düzəninin ən aktual problemləri, riskləri və çağırışlıarı ilə əlaqədar olur və dünya siyasətinin yönəldilməsində fikirləşməkdən ötrü zəngin material verir”.
Milli Məclisin İqtisadi siyasət, sənaye və sahibkarlıq komitəsinin üzvü Əli Məsimli İsveçrənin Davos şəhərində keçirilən 46-cı İqtisadi Forumu və oradakı müzakirələri “Yeni Müsavat”a şərh edərkən bunları bildirdi. İqtisadçının sözlərinə görə, Azərbaycan prezidenti İlham Əliyevin Davosda Dünya İqtisadi Forumu çərçivəsində keçirilən tədbirlərlərdə fəal iştirakı hər cəhətdən Azərbaycanın xeyrinədir: “Həm prezidentin yetərincə yüksək intellektual yüklü çıxışları diqqəti geniş şəkildə cəlb edir, həm də bu çıxışlar ölkənin hansı imkan və potensiala malik olduğunu dünyanın biznes-iqtisadi elitasına çatdırmaq üçün çox yaxşı şans yaradır. Prezidentin ”Yeni enerji tarazlığı" mövzusunda sessiyada çıxışı zamanı toxunduğu məsələlər təkcə Azərbaycan üçün deyil, neft hasil edən ölkələrin xeyli hissəsi üçün mühüm aktuallıq kəsb edir. Böhranın doğurduğu ağır nəticələrdən az itkilərlə çıxmaq, qeyri-neft sektoruna diqqətin artırılması və bu sahənin məhsullarının rəqabət qabiliyyətinin artırılması kimi məsələlər neft ölkələrinin əksəriyyəti üçün, xarici investorların Azərbaycana investisiya qoymasına təminatlı çağırış isə xüsusən hazırkı böhranlı dövrdə bizim üçün çox aktualdır".
Ə.Məsimli qeyd etdi ki, Azərbaycan prezidentinin Davos Forumunda iştirakı bir sıra dövlət və hökumət başçıları, nazirlər, şirkət rəhbərləri ilə görüşləri baxımından da əhəmiyyətlidir: “Prezident İlham Əliyevin Davosda Türkiyənin baş naziri Əhməd Davudoğlu ilə görüşü iki qardaş ölkənin dövlət və hökumət başçılarının tez-tez fikir mübadilələri etmələri baxımından önəmlidir. Görüşdə ölkələrimiz arasında dostluq və qardaşlıq münasibətlərinin bütün sahələrdə yüksək səviyyədə inkişafı, yüksək səviyyədə mütəmadi görüşlərin əməkdaşlığımızın genişləndirilməsi baxımından əhəmiyyəti qeyd edilib. Beynəlxalq səviyyəli tədbirlərdə Azərbaycanın və Türkiyənin birgə iştirakının önəmi vurğulanıb. Azərbaycan prezidentinin Böyük Britaniyanın BP şirkətinin baş icraçı direktoru Robert Dadli ilə görüşü də önəmli xarakter daşıyır. Görüşdə ”Azəri-Çıraq-Günəşli" və “Şahdəniz” yataqlarının işlənilməsində Azərbaycan ilə BP şirkəti arasında əməkdaşlıq, eləcə də Abşeron yarımadasının dayaz sulu hissəsində geoloji kəşfiyyat işlərinin aparılması sahəsində işlər barədə fikir mübadiləsi olub. Prezident İlham Əliyevlə Rusiyanın “LUKoyl” şirkətinin prezidenti Vahid Ələkbərovun görüşü zamanı Azərbaycanla “LUKoyl” şirkəti arasında əməkdaşlığın perspektivlərinə dair məsələlər müzakirə olunub. Prezidentin Davosda “Lazard Avropa” şirkətinin vitse-prezidenti Metyu Piqas ilə görüşü də “Cənub qaz dəhlizi” kontekstində Azərbaycan-Avropa əməkdaşlığının genişləndirilməsinin maliyyə tərəfləri baxımından əhəmiyyətə malikdir. Göründüyü kimi, Azərbaycan Prezidentinin Davos İqtisadi Forumunda fəal iştirakı Azərbaycan üçün sadalanan istiqamətlərdə xüsusən indiki şəraitdə çox zəruri olan dividendlər gətirir".
Ə.Məsimli Forumda qlobal təhlükəsizlik, “dördüncü sənaye inqilabı”, dünya maliyyə sistemi, enerji daşıyıcılarının qiyməti və sair bu kimi aktual məsələlərin müzakirə olunmasına diqqət çəkdi: “Davos iqtisadi forum olsa da, bu həm də çox önəmli bir diplomatik təşəbbüsdür. Burda Ukraynada müharibəyə son qoyulması, Suriya sindromundan ziyan çəkənlərə humanitar yardım və sair yöndə çağırışlar böyük rezonans doğurdu. Davosda GUAM-ın iki əsas ölkəsinin dövlət başçılarının - Azərbaycan prezidenti İlham Əliyevin Ukrayna prezidenti Petro Poroşenko ilə görüşü də iki ölkə arasında iqtisadi sahədə, o cümlədən nəqliyyat, energetika, sərmayə qoyuluşu və digər istiqamətlərdə əməkdaşlığın perspektivlərinin müzakirə olunması da, nəinki yaxşı hal, həm də çox yaxşı bir mesajdır”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər