Nə üçün Həzrət Sahibəzzəmanın (ə.f) zühuru gecikir? |
Müəllif: Admin | Bölmə: Sual-Cavab | Vaxt: 1-10-2015, 19:15 | Şərh sayı: (0) | Baxılıb: 330
Nə üçün Həzrət Sahibəzzəmanın (ə.f) zühuru gecikir?
“İlahi, biz başımızı itirmişik; bəlalar, xəstəliklər, zülm və haqsızlıqlar içində qərq olmuşuq. Qeybdə olan İmamın (ə.f) zühurunu tezləşdir!” Bu sözlər hər gün hər yerdə göylərə ucalır. Zülmlə dolmuş dünyanın şərqindən qərbinədək xoşbəxt və firavan yaşamaq istəyən milyonlarla insan kainatın Xilaskarını gözləyir. Elə bir camaat namazı yoxdur ki, intizarında olduğumuz İmamın (ə.f) tez zühur etməsi üçün dua edilməsin. Bəs zühur nə üçün baş vermir? Təbii ki, nələrsə çatmır. Elə isə nə çatmır?! Bax, bu sual çoxlarını düşündürür. Həzrət Mehdinin (ə.f) zühuru mövzusuna baxdıqda bu mövzunun üçbucaq müstəvidən ibarət olduğunu görürük: 1-Allah-Taalanın istəyi. 2-Həzrət Sahibəzzamanın (ə.f) qeybdə olması. 3-İnsanların hazırlığı. Deməli, çatışmayan nədirsə, bizə aiddir. Üçbucağın 2 bucağı nöqsansızdır. Amma üçüncü ... Qurani-Kərimə, eləcə də peyğəmbərlərin sonuncusu Həzrət Muhəmmədin (s) sünnəsinə, məsum imamların (ə) hədislərinə nəzər saldıqda görürük ki, Allah-Taalanın və məsumların bizlərdə görmək istədikləri başlıca xüsusiyyətlərdən biri də haqqın tərəfdarı olmaqdır. Görəsən, biz haqqı müdafiə edirik yoxsa batili?! Bu sualı bizim hansımızdan soruşsalar, fikirləşmədən dilimiz deyəcək: Əlbəttə ki, biz haqqı müdafiə edirik! Kaş bu cavab həqiqət olaydı. Bizim qəlbimiz və əməlimiz də bu suala belə cavab verəydi: Biz Haqqı müdafiə edirik! Adətən, insanlar özlərindən gələn pis qoxuya narahat olmur, o pis qoxuya adi yanaşırlar. Lakin bu pis qoxu başqalarından gələrsə, çox narahat olur, qəzəblənirlər. Eləcə də ana öz körpəsini təmizləyəndə, övladının nəcis olmuş paltarlarını yuduqda həmin pis qoxuya görəi qətiyyən narahat olmur. Nə üçün?! Günahın da pis qoxusu var. Bir çox insanlar günahın pis qoxusunu özlərində hiss etmir, hətta bəziləri bunu müsbət qoxu sanır. Amma başqaları günah etdikdə onlardan gələn günahın pis qoxusuna narahat olurlar. Nə üçün biz özümüz qeybət edəndə heç narahat olmuruq, bunu günah kimi qəbul etmirik?! Halbuki başqasının qeybət etdiyini eşitdikdə narahat olur, həmin adama pis gözlə baxırıq. Qız ilə kürəkən, oğul ilə gəlin arasında mübahisə yarananda bu münaqişələrin səbəbini araşdırmadan qızı və ya oğulu müdafiə edir, kürəkən və ya gəlini günahkar sayırıq. Hətta bəzən bu münaqişələrin səbəbkarı kimi oğul və ya qızımızın olduğunu bildiyimiz halda da onları müdafiə edirik. Həmçinin dostlarımızdan birinin başqa birilə dalaşdığını eşitdikdə kimin haqlı olub-olmadığını araşdırmadan dostumuzu müdafiə edirik. Hələ bu azmış kimi bununla fəxr də edirik. Bəs haqq harda qaldı?! Bu vəziyyətdə necə iddia edə bilərik ki, biz haqqın tərəfdarıyıq?! Belə bir düşüncə tərzinə malik olan insanlar necə deyə bilərlər ki, biz İmamın (ə.f) gəlişinə hazırıq?! İmamın (ə.f) dostları haqqın müdafiəçiləridir. Bizim çatışmayan cəhətimiz də elə budur. Həzrət Muhəmməd (s) buyurmuşdur: لن تقدس امه لا يؤخذ للضعيف فيها حقه من القوی غير متتعتع “Zülmə məruz qalmış insanların haqqını zalımdan ala bilməyən xalq xoşbəxt ola bilməz.” Deməli, xoşbəxtlik və səadətin əsas şərtlərindən biri haqqı müdafiə etməkdir. Haqqın müdafiəsi lazım olan yerdə heç nədən qorxmaq olmaz. Elə isə səhv və günahlarımızı Allah qarşısında etiraf edib eyiblərimizi düzəltməyə başlayaq. Söz verək ki, yalnız və yalnız Haqqı müdafiə edəcəyik. Özümüzü islah edib əxlaqımızı gözəlləşdirək. Allah-Taala Qurani-Kərimdə "Maidə" surəsinin 8-ci ayəsində buyurur: يَا أَيُّهَا الَّذِينَ آمَنُواْ كُونُواْ قَوَّامِينَ لِلّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللّهَ إِنَّ اللّهَ خَبِيرٌ بِمَا تَعْمَلُونَ “Ey iman gətirənlər, (bütün fərdi və ictimai işlərdə) həmişə Allaha görə möhkəm və mətin dayanan və ədalətə şəhadət verənlərdən olun! Hər hansı bir dəstə ilə düşmənçilik sizi ədalətsizliyə vadar etməsin. Ədalətli olun ki, o, təqvaya daha yaxındır. Təqvalı olun! Həqiqətən, Allah etdiklərinizdən xəbərdardır.”
Tədqiqatçı Rza Əzizoğlu
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər