Bankların bağlanması maliyyə sistemində təlaş yaradıb |
Müəllif: Admin | Bölmə: Xəbərlər | Vaxt: 29-01-2016, 21:07 | Şərh sayı: (0) | Baxılıb: 327
Bankların bağlanması maliyyə sistemində təlaş yaradıb
Qubad İbadoğlu: “Mərkəzi Bankın missiyası yalnız qərar qəbul etmək olmamalıdır...” Ölkədə bir ayda altı bankın bağlanması bank sistemi ilə bağlı narahatlıqları artırıb. Ekspertlər lisenziyası alınacaq bankların sayının artacağını vurğulayırlar. Həmçinin artıq hökumət rəsmiləri də bankların birləşdiriləcəyi barədə təkliflər irəli sürürlər.
Artıq “Qafqaz İnkişaf Bankı” ASC və “Atrabank” ASC-nin bank lisenziyaları ləğv edilib. Mərkəzi Bank bildirir ki, “Qafqaz İnkişaf Bankı” ASC və “Atrabank” ASC Əmanətlərin Sığortalanması Fonduna üzv banklardır və fond tərəfindən əhalinin qorunan əmanətləri üzrə qanunvericiliyə müvafiq olaraq kompensasiyaların ödənişi həyata keçiriləcək. Mərkəzi Bank indiyə kimi “Bank of Azerbaijan”, “Gəncə Bank”, “NBC Bank” və “Yunayted Kredit Bank”ın lisenziyalarını ləğv edib.
Lisenziyalarının ləğvi banklar üçün gözlənilməzdir. Məsələn, bu gün səhər “AtraBank ”Cash İn" xidmətini aktiv etdiyi barədə məlumat yaymışdı. “NBC Bank” da lisenziyanın ləğv olunması qərarının onlar üçün gözlənilməz olduğunu bildirmişdi. “Qafqaz İnkişaf Bankı”nın Müşahidə Şurasının sədri, Azərbaycan Banklar Assosiasiyasının keçmiş rəhbəri Eldar İsmayılov isə fins.az-a açıqlamasında bildirib ki, “Azərbaycan Mərkəzi Bankının lisenziyamızı ləğv etməsini heç cür başa düşə bilmirik”. Onun sözlərinə görə, lisenziyanın alınması barədə qərar bank üçün gözlənilməz olub: “Bizim bank məcmu kapital və digər göstəricilərlə bağlı tələbi artıqlaması ilə yerinə yetirirdi. Prezident deyib ki, bank sektoru sağlamlaşdırılsın. Amma onu bu cür radikal addımlarla, kiçik bankları bağlamaqla etməzlər. Bu, qəbuledilməzdir. Daha liberal yollar var. Bazarda ancaq böyük bankların qalması o demək deyil, bank sektoru sağlam olacaq. Azərbaycan Beynəlxalq Bankı ölkənin ən böyük bankıdır, nə cür problemlər yaşadığı göz önündədir».
Eldar İsmayılov deyib ki, Mərkəzi Bank lisenziyanı ləğv etməzdən öncə heç konsolidasiyaya getməyi də təklif etməyib: “Gözlənilmədən çağırıb dedilər ki, lisenziyanı alırıq. Halbuki təklif olsaydı ki, konsolidasiyaya gedin, məmnuniyyətlə bunu edərdik. Birləşməyin kimə ziyanı var ki? Amma bununla bağlı təklif olmadı, birdən-birə səhər durub gördük ki, lisenziyamız ləğv olunub”. Onun sözlərinə görə, bankın bağlanması barədə qərar ictimaiyyətə açıqlanandan sonra əmanətçilərin axını ilə üzləşiblər: “165 nəfərin bizdə əmanəti var, təkcə bu gün 17-ni qəbul etmişik. Hamı gəlib pulunu istəyir. Gərginlik var. Bağlanmış digər banklarda da bu cür vəziyyət yaranıb. Bu qədər bankın birdən bağlanması bank sektoruna inamı tamamilə itirəcək. Daha heç kim banklara əmanət qoymayacaq”. Eldar İsmayılov onu da bildirib ki, bankın lisenziyasının bərpa olunması üçün hələ ki məhkəməyə müraciət etmək barədə düşünmürlər.
Ekspertlər hesab edirlər ki, indiyə kimi banklara birləşmələri barədə dəfələrlə çağırış edilib. Lakin kommersiya bankları “birləşin” tövsiyəsinə əməl etməyib. “Marja”nın proqnozuna görə, Azərbaycanda hələ lisenziyası ləğv oluna və ya birləşə biləcək ən azı 6 bank var: “Bank Avrasiya”, “Kredo Bank”, “Günay Bank”, “Deka Bank”, “Parabank” və “Zaminbank”. “Dəmir Bank” və “AG Bank” birləşmək barədə ilkin protokol imzalayıblar.
Ekspertlərin fikrincə, bankların birləşməsi vacibdir. Mərkəzi Bank hələ 2009-cu ildən bunu elan etsə də, indiyədək alınmayıb. İkinci devalvasiyadan sonra banklar çox pis vəziyyətə düşüb və birləşməsi qaçılmazdır. Bildirilir ki, yaxın vaxtlarda Azərbaycanda başlayan bankların konsolidasiya prosesi çərçivəsində “Paşabank”, “KapitalBank” və “AtaBank” ASC-lərin birləşəcəyi gözlənilir. “Report”a bu barədə bank mənbələrindən məlumat verilib. Lakin bu bankların rəsmiləri mümkün konsolidasiya ilə bağlı konkret cavab verməyiblər. “Paşa Bank”da məlumatı nə təsdiq, nə də təkzib ediblər. Bankdan rəsmi olaraq bu barədə məlumatsız olduqlarını açıqlayıblar. “Kapital Bank”da isə məlumatı təkzib ediblər. “AtaBank”da da məlumatı nə təsdiq, nə də təkzib ediblər. “AtaHolding”də bu barədə hər hansı məlumatın olmadığı bildirilib. Qeyd edək ki, “Kapitalbank” ASC-nin səhmlərinin 99,87 faizi “Paşa Holdinq”ə aiddir. Bankın nizamnamə kapitalı 185 milyon manatdır. Hazırda ölkədə 37 bank fəaliyyət göstərir.
Ekspert Əkrəm Həsənov güman edir ki, bankların ləğvinin ardı gələcək: “”Əmanətlərin tam sığortalanması haqqında" Qanun qüvvəyə minənədək bağlanan banklar olacaq, sonra olmayacaq. Əks təqdirdə, fond bütün əmanətləri kompensasiya etməli olacaq. Ləğv ediləcək banklarda sığortalanmış əmanətlərin miqdarı yenə də çox az olacaq. Ləğv edilən banklar bu meyarlara tam cavab verir. Bir sözlə, hər şey plan üzrə gedir, Mərkəzi Bankın planı üzrə...".
Ekspert Qubad İbadoğlu isə qeyd edib ki, bankların lisenziyasını ləğv etmək bu istiqamətdə aparılan alternativsiz siyasətin ən asan mərhələsidir: “Belə qərarların umumi bank-maliyyə sektorunun saglamlaşdırılmasına gətirib çıxarması üçün Mərkəzi Bank, Əmanətlərin Sığortalanması Fondu və ləğvetmə komissiyası ilə birlikdə əhəmiyyətli işlər görməlidir ki, əmanətçilər narazı qalmasın, eyni zamanda həmin banklardan kredit götürənlər ondan sui-istifadə etməsinlər. Bu isə ciddi hazırlıq və monitorinq tələb edir. Əgər bağlanan banklardan əmanətlərin geri götürülməsi ilə əlaqədar problemlər yaranarsa və bu, ictimailəşərsə, son nəticədə ondan bütün bank sistemi ziyan çəkəcək. Bu zaman Mərkəzi Bank qaş düzəltdiyi yerdə vurub göz çıxara bilər. Çünki bu həssas məsələdə Mərkəzi Bankın üzərinə böyük məsuliyyət düşür. Bank öz missiyasını yalnız qərar qəbul etməklə başa çatdırmamalı, qəbul edilmiş qərarların icrasına da nəzarət etməlidir. Odur ki, prosesi izləyib, gedişini də monitorinq etmək Mərkəzi Bankın məsuliyyətində qalır”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər