Rəsulzadənin doğum günü; Onu təhqir edən deputatın məhkəməsi... |
Müəllif: Admin | Bölmə: Xəbərlər | Vaxt: 29-01-2016, 19:34 | Şərh sayı: (0) | Baxılıb: 223
Rəsulzadənin doğum günü; Onu təhqir edən deputatın məhkəməsi...
“Naqif Həmzəyev layiq deyil ki, biz ondan maddi təzminat istəyək”Bir neçə gün sonra Azərbaycan Xalq Cumhuriyyətinin banisi, xalqımızın ən görkəmli şəxsiyyətlərindən biri Məhəmməd Əmin Rəsulzadənin doğum günü olacaq. Xatırladaq ki, Rəsulzadə1884-cü il yanvarın 31-də Bakının Novxanı kəndində anadan olub. Azərbaycana ilk olaraq müstəqillik bəxş edən Rəsulzadənin tarixi xidmətləri danılmazdır. Onun indi azad və qürurla dalğalanan üçrəngli bayrağımız haqqında səsləndirdiyi “Bir kərə yüksələn bayraq, bir daha enməz!” ifadəsi əbədi milli şüara çevrilib.
Lakin son illər ölkə rəsmiləri tərəfindən Rəsulzadəyə, onun şəxsiyyətinə qarşı biganəlik nümayiş olunurdu. Buna bariz nümunə onun Gəncə şəhəri Dəmiryolçular parkındakı büstünün başına çuval keçirilməsi idi. Dəfələrlə bu mövzu ilə bağlı mətbuatda kifayət qədər yazılar dərc olunub tənqidi fikirlər səsləndirilsə də təxminən 4 il çuval milli istiqlal hərəkatının büstünün üzərindən götürülmürdü. Rəsmilər isə öz açıqlamalarında bildirirdilər ki, “Dəmiryolçular parkı Nəqliyyat Nazirliyinin balansındadır, hazırda orda təmir işləri aparıldığından büst çuvalla örtülüb”.
Təxminən iki ay bundan əvvəl isə Gəncə şəhərindən yenicə millət vəkili seçilən Naqif Həmzəyev jurnalistlərin də iştirak etdiyi qeyri-rəsmi görüşdə Rəsulzadə barəsində təhqiredici, hədyanlı ifadələr işlətdi. Onun “Rəsulzadənın büstünə torba keçirilməsi ilə bağlı son durum haqda nə deyərdiz?” sualına verdiyi
“Niyə Rəsulzadənin büstü və ya heykəli qoyulmalıdır ki?! Mən bu cür tarixi şəxsiyyət tanımıram. Heç bilirsiniz o Rəsulzadə respublika yaratmaq üçün nələr edib? Yaxşı şəxsiyyət olsaydı qurduğu respublikanı qoruyub saxlayardı” kimi cavabları “Yeni Müsavat” qəzetində dərc olunaraq ictimaiyyətə çatdırıldı. Təbii ki, bu ifadələr geniş ictimaiyyətdə etiraza səbəb oldu, millət vəkilləri, ziyalılar məsələyə öz münasibətlərini bildirib deputatı tənqid etdilər. Hətta Milli Məclisin 4 dekabrda keçirdiyi plenar iclasında bu məsələ geniş müzakirə olundu, vitse-spiker Ziyafət Əsəgərov isə tərəflərə dialoq keçirilməsini tövsiyyə etdi.
Rəsulzadənin nəvəsi Rəis Rəsulzadə isə deputatı məhkəməyə vercəyini bildirsə də bu fikri Müsavat Partiyası reallaşdırdı. Belə ki, partiya YAP-çı deputata qarşı iddia qaldıraraq Məhəmməd Əmin Rəsulzadənin şərəf və ləyaqətini təhqir etdiyi üçün onu məhkəməyə verdi. Yanvarın 14-də Gəncə şəhəri Nizami rayon məhkəməsində Müsavatın şikayətinə dair məhkəmənin hazırlıq iclası keçirilib.Hazırlıq iclasında Naqif Həmzəyevin özü iştirak etməyib, prosesə onun nümayəndəsi qatılıb. Bu barədə vəkil Nemət Kərimli “Yeni Müsavat”a açıqlamasında bildirib:
“Bildiyiniz kimi Gəncədən seçilən millət vəkili Naqif Həmzəyev jurnalistlərin də iştirak etdiyi qeyri-rəsmi tədbirdə jurnalistin sualına cavab Rəsulzadəni təhqir etmiş, onu satqınlıqda ittiham etmişdi. Bu da ictimaiyyətdə geniş rezonas doğurdu. Milli Məclisin komissiya sədri bunula bağlı ciddi tədbir görüləcəyini desə də də sonradan siyasi proseslərə görə bunu etmədi. Müsavat Partiyası isə deputatı məhkəməyə verdi. Ona görə yox ki, Müsavatın yaradıcısı Rəsulzadədir, ona görə ki, o, Azərbaycanın ən öndə gedən tarixi şəxsiyyətidir. Beləliklə qanunvericiliyə əsaslanaraq məhkəməyə müraciət etdik”.
Vəkilin sözlərinə görə partiya gənc deputatın Azərbaycan xalqından və Rəsulzadənin ailəsindən üzr istəməsini tələb edir:
“Başqa biz ondan maddi təminat ummuruq, gözləmirik. Partiya rəhbəri hesab edir ki, Naqif Həmzəyev layiq deyil ki, biz ondan maddi təzminat istəyək”.
Vəkil onu da vurğuladı ki, məhkəmə prosesi fevralın 3-nə təyin olunub.
Müsavat Partiyası İcra Aparatının rəhbəri Gülağa Aslanlıda əməkdaşımıza açıqlamasında bildirdi ki, partiya Rəsulzadəni təhqir etdiyi üçün deputatın cəzalandırılmasını tələb edir.
Xatırladaq ki, “Yeni Müsavat” qəzetinin 2 dekabr tarixli sayında “Yeni deputat Rəsulzadəni vətən xaini adlandırdı” başlıqlı yazı dərc olunmuşdu. Bununla bağlı tənqidlərə tuş gələn deputat Rəsulzadəni təhqir etmədiyini, fikirlərinin təhrif olunduğunu desə də “Yeni Müsavat” qəzeti faktın həqiqiliyini məhkəmədə sübut edə biləcək dəlillərə malik olduğunu bildirmişdi. Geniş rezonanas doğuran yazının ardınca Azərbaycan Xalq Cümhuriyyətinin qurucusu Məhəmməd Əmin Rəsulzadənin Gəncə şəhəri Dəmiryolçular parkındakı büstünün başına keçirilmiş çuval götürülmüş, büstün ətrafında təmizlik işləri aparılmışdı.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər