“Mart ayında siyasi məhbusların çoxu azad oluna bilər” |
Müəllif: Admin | Bölmə: Xəbərlər | Vaxt: 26-01-2016, 22:57 | Şərh sayı: (0) | Baxılıb: 221
“Mart ayında siyasi məhbusların çoxu azad oluna bilər”
Hakimiyyətin qərbmeylli siyasəti ümidləri artırıb; hüquq müdafiəçisi martda sanksiya məsələsinin gündəmə gətiriləcəyindən narahatdır Son günlərdə Azərbaycanla Qərb arasındakı münasibətlərdə yumşalma hiss olunur. Xüsusilə prezident İlham Əliyevin Davos sammitindəki görüşləri bu istiqamətdə mühüm dönüş nöqtəsi oldu. Ekspertlər AŞ PA-nın bu günlərdə keçirilən sessiyasının münasibətlərin daha da istiləşməsinə səbəb olacağını proqnozlaşdırırlar.
Bütün bunların gələn ayın 15-də Azərbaycanla bağlı sanksiya məsələsinin müzakirəsini arxa plana keçirəcəyi deyilir. Sanksiya hədələri həyata keçməzsə, hakimiyyətin mart ayında, yəni Novruz bayramında böyük əfv sərəncamı verəcəyi barədə xəbərlər yayılıb. Ölkə iqtidarının Yeni ildə azadlığa buraxmaq planında olduğu, amma son anda Qərbdən gələn sanksiya hədələrinə görə qərarını dəyişdiyi siyasi məhbusları bu dəfə azadlığa buraxacağı bildirilir.
Hüquq müdafiəçisi Mirvari Qəhrəmanlı mart ayında əfv öncəsi növbəti dəfə sanksiya məsələsinin gündəmə gətiriləcəyindən narahat olduğunu bildirdi: “Yazırlar ki, sanksiyalar Azərbaycan məmurları və onların hesablarına aiddir. Bu cür sanksiyalar həyata keçdikdə, məmurların bank hesabları dondurulur və onlara viza verilmir. Məmurun bağlanmış hesabı sanksiya müddəti bitdikdən sonra bərpa edilə bilər. Amma indiki sanksiyada bəndlərdən biri xalqımıza, Azərbaycan iqtisadiyyatına qarşı yönəlib. Məni narahat edən budur. Orada beynəlxalq banklara tövsiyə olunur ki, Azərbaycanla bağlı layihələr dayandırılsın, kreditlər verilməsin. Çox adam deyir ki, bunun xalqa dəxli yoxdur. Tamamilə səhv fikirdir. İndiki krizis dönəmində birbaşa təsiri var. Çünki hazırda Azərbaycanla bağlı çoxsaylı layihələr həyata keçirilir. Burada maraqlı tərəf odur ki, əfv qabağı indiyə qədər beynəlxalq təşkilatlar öz fikirlərini deyirlər. Hakimiyyətə qarşı bəyanatlarını da veriblər.
Məni narahat edən odur ki, bu bəyanatlar olduğu halda, mart əfvinə az müddət qalmış hakimiyyəti qızışdırmaq üçün hansısa beynəlxalq təşkilat müəyyən addımlar atar. Çox arzu edirəm ki, Novruz qabağı belə sərt bəyanatlar verməsinlər. Bunlar olmasa, düşünürəm ki, hökumət siyasilərin əfvinə baxa bilər. Çox istərdim ki, həmkarlarım azad olunsun. Onu da qeyd edim ki, bu cür bəyanatlar səslənəndə, həmin xarici təşkilatlara və yerli QHT-lərə qarşı məhbus ailələri, cəmiyyət tərəfindən ciddi ittihamlar səsləndirilir. Düşünürəm ki, əfv olacaq”.
Hüquq müdafiəçisi ölkə başçısının siyasi müstəvidə bir sıra müsbət addımlar atdığını qeyd etdi: “Nardaranda tutulan şəxslərin azad edilməsi, Məşədi Natiq Kərimovun azadlığa buraxılması, eyni zamanda sərt yazılarına baxmayaraq, istefa verən Zərdab prokuroru Rüfət Səfərovun azadlığı ölkə başçısının atdığı müsbət addımlardır. Bu bizdə digər siyasilərin də azadlığa çıxacağına ümid yaradır. Bu onu göstərir ki, mart ayında siyasi məhbusların çoxu azad oluna bilər. Onların çoxunun cinayətlərinin olmadığı, siyasi əqidələrinə görə həbs edildikləri hər kəsə məlumdur. Çox yaxşı olardı ki, Avropadan gələn bəyanatların sahibləri gözləmə mövqeyi tutsunlar. Açığı, Azərbaycanla Qərb arasında münasibətlərin yumşaldığını deyə bilmərəm. Bəzi hökumətyönlü şəxslər var ki, xüsusi tapşırıqla hərəkət edirlər, Qərb barədə müsbət fikirlər səsləndirirlər. Düşünürəm ki, hakimiyyət yaranmış vəziyyətdən istifadə etməlidir. Çox ağır proseslər gedir. İqtidar mövcud vəziyyəti anlayıb, adekvat addımlar atmalıdır”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər