Korrupsiyaya qarşı Mübarizə Baş İdarəsi 2015-ci ilin hesabatını verdi |
Müəllif: Admin | Bölmə: Xəbərlər | Vaxt: 16-01-2016, 20:12 | Şərh sayı: (0) | Baxılıb: 257
Korrupsiyaya qarşı Mübarizə Baş İdarəsi 2015-ci ilin hesabatını verdi
İdarənin rəisi Kamran Əliyev korrupsioner məmurlardan danışdıYanvarın 15-də Baş prokuror yanında Korrupsiyaya qarşı Mübarizə Baş İdarəsində (KQMBİ) 2015-ci ildə görülən işlərlə bağlı mətbuat konfransı keçirilib. İdarə rəisi Kamran Əliyev bildirib ki, ötən il ərzində idarəyə 10 min 654 vətəndaş müraciət edib. 7 min 266 müraciət qurumda fəaliyyət göstərən “Qaynar xətt” əlaqə mərkəzi vasitəsi ilə daxil olub. 2 min 100 müraciət müsbət həll edilib, 30 müraciət üzrə CM-in müxtəlif maddələri ilə cinayət işi başlanıb. K.Əliyev deyib ki, Baş İdarədə 2 min 614 vətəndaş qəbul edilib.
İdarə rəisi bildirib ki, ötən il 14 əməliyyat tədbiri nəticəsində 16 vəzifəli şəxs cinayət başında yaxalanıb. KQMBİ-nin təqdimatları əsasında 169 vəzifəli şəxs intizam məsuliyyətinə cəlb edilib. İdarə rəisi vəzifəli şəxslərin hansı nazirliklərin nümayəndələri olduğunu da açıqlayıb. Məlum olub ki, 2015-ci ildə Səhiyyə Nazirliyi üzrə 42, Əmək və Əhalinin Sosial Müdafiəsi Nazirliyi üzrə 28, Təhsil Nazirliyi üzrə 13, Daxili İşlər Nazirliyi üzrə 48, Müdafiə Nazirliyi üzrə 1, Fövqəladə Hallar Nazirliyi üzrə 1, Gömrük Komitəsi üzrə 1 və digər dövlət qurumları üzrə 35 vəzifəli şəxs tutulub. Ötən il ərzində Baş İdarə tərəfindən 295 şəxs barəsində 200 cinayət işi məhkəməyə göndərilib. Həmin işlər üzrə vurulmuş 143 milyon 883 min manat ziyandan ibtidai araşdırma mərhələsində 36 milyon 101 min manat ödənilib. İstintaqı başa çatdırılmış 5 cinayət işi üzrə cəmi 43 milyon 654 min manat dəyərində əmlak üzərinə həbs qoyulub.
Baş idarə rəisi statistik məlumatları açıqladıqdan sonra mətbuat nümayəndələrinin suallarını cavablandırıb. 2004-cü ildə yaradılan idarədə baş tutan mətbuat konfransına ilk dəfə idi ki, “Yeni Müsavat” qəzetinin əməkdaşı da dəvət edilmişdi. Digər KİV nümayəndələri kimi biz də Kamran Əliyevə sual vermək imkanı qazandıq. Ümumilikdə mətbuat konfransında verilmiş sual-cavabları da təqdim edirik:
- Mətbuat vasitəsi ilə yayılan məlumatlar araşdırılırmı? Həmin araşdırmaların nəticəsi olaraq cinayət işləri başlanırmı?
Kamran Əliyev:
- Bütün mətbuat orqanları gündəlik olaraq tərəfimizdən izlənir. Mətbuatda gedən məlumatların daim monitorinqi aparılır. Baş İdarədə 5 cinayət işi var ki, konkret olaraq mətbuatda gedən məlumatlara əsasən başlanıb. Onlardan biri “Yasamal MTK” ilə bağlıdır. Hazırda həmin işlə bağlı intensiv araşdırmalar aparılır. Bundan başqa da icraatda mətbuatda gedən məlumatlarla bağlı aparılan araşdırmalar var. Biz mətbuata hörmətlə yanaşırıq, yayılan məlumatları diqqətlə izləyirik. Qərəzli, kimisə təhqir etmək məqsədi ilə bağlı yazılar təbii ki, digər mövzunun predmetidir.
- Azərbaycanda korrupsiya cinayətləri niyə azalmır?
- Korrupsiya cinayətləri ilə bağlı ona deyə bilərəm ki, bu proseslər var. Son 10 ilə nəzər yetirsək, təhlil etsək, görərik ki, ölkə rəhbərliyinin həyata keçirdiyi qanunverici, inzibati, təşkilati tədbirlər nəticəsində bu gün artıq bir çox korrupsiya cinayətləri mövcud deyil. Və əksinə. Yeni iqtisadi proseslər korrupsiya cinayətlərinin yeni formalarının ortaya çıxmasına səbəb olur. Bu bütün dünya ölkələrində, ABŞ-da, Avropada da belədir. Azərbaycanda "ASAN xidmət" mərkəzləri yaradılmaqla korrupsiya cinayətlərinin bir çoxu 1 günün içində aradan qaldırıldı. Bu təcrübəni biz gələcəkdə də davam etdirməliyik.
- Monopoliya korrupsiya cinayəti kateqoriyasına daxildirmi?
- Monopolistlər, işbazlarla bağlı sahədə də işlər gedir, araşdırma aparırıq. Onların fəaliyyətini qanunlarla, hüquqi baxımdan sübuta yetirmək mürəkkəb məsələdir. Bu o demək deyil ki, mümkün deyil. Biz işləyirik, siz yəqin ki, belə hallarla bağlı cinayət işlərinin olacağını da görəcəksiniz. Burada mal qıtlığı ilə bağlı söhbət açıldı. Süni qiymət artımını, mal qıtlığını kim yarada bilər? Ancaq monopolist şirkətlər edə bilər. Deyək ki, mən monopolistəm, ölkəyə dərmanı, konkret strateji məhsulu mən gətirirəm, rəqabət olmadığı üçün istənilən qiyməti müəyyən edə bilərəm. Təbii ki, belə hallar olur. Süni mal qıtlığı yaratma elə inhisarçılıq deməkdir. Bununla bağlı mübarizə gücləndiriləcək.
- Zərdab prokurorluğunun müstəntiqi Rüfət Səfərovla bağlı cinayət işi başlanıb?
- Rüfət Səfərovun konkret əməlləri ilə bağlı araşdırma aparılıb və barəsində cinayət işi istintaq olunur. Cinayət işi onun dediyi ilə, söylədikləri ilə bağlı deyil. Barəsində cinayət işi rüşvətxorluq maddəsi ilə bağlanıb.
- “MTN işi” üzrə istintaq edilən işlərlə bağlı vəziyyət nə yerdədir?
- “MTN işi” ilə bağlı KQMBİ-də araşdırma aparılmır. Baş İdarədə Rabitə Nazirliyinin vəzifəli şəxslərinin işi üzrə araşdırma aparılır.
- Devalvasiyadan sonra ölkədə süni qiymət artımı müşahidə olunur. Bunun qarşısını almaq üçün hansı tədbirlər görülr?
- Süni qiymət artımı ilə bağlı ictimai nəzarət vacibdir. 2016-cı ilin ilk günlərindən başlayaraq hər gün “Qaynar xətt”ə müraciətlər daxil olur. Təkcə yanvarın 14-də “Qaynar xətt”ə rayonlardakı böyük ticarət mərkəzlərində süni qiymət artımı ilə bağlı 10-a yaxın müraciət daxil olub. Həmin müraciətlərə də araşdırılır. Bu məsələlərə çox həssaslıqla yanaşılır. Müraciət müəlliflərinə zəng edib konkret soruşuruq ki, qiymət artımı nədə baş verib. Əgər müəyyən olunur ki, konkret halda qiymət artımı “qırmızı xətti” keçib, tədbir görülür. Peşəkar iş adamları belə hallara yol vermirlər. Biz maliyyə qurumları ilə təhlil aparıb devalvasiyanı nəzərə almaqla süni qiymət artımı hallarını müəyyən edirik. Dərman preparatları var ki, onlar ölkəyə gətiriləndə 10 manata rəsmiləşdirilir, burada 500-600 manata satılırsa, buna süni qiymət artımından başqa ad vermək olmaz. Ümumilikdə yaranmış iqtisadi situasiyadan sui-istifadə halları var.
- Deputat Fəazil Ağamalı həmkarları Əsabil Qasımov və Tahir Süleymanovun monopolist olduqlarını dedi, unu bahalaşdırdıqlarını açıqladı. Mətbuatda deputatın dedikləri ilə yəqin ki, tanışsınız. Bu məsələ araşdırılacaqmı?
- Məlumatlıyıq. Hörmətli Milli Məclis üzvlərinin öz fikirlərini demək, söyləmək hüquqları var. İki deputat bərəsində fikir səsləndirilib. O hallarla bağlı konkret olaraq hər hansı inhisarçılığın müəyyən olunması, süni qiymət artımı, həmin şirkətlər tərəfindən manatın məzənnəsi dəyişəndən sonra süni qiymət artımı halı müəyyən edilməmişdir. Bizdə olan məlumatlara görə, həmin şirkətlər əla növ unun topdansatış qiymətini 26 manat müəyyən ediblər. Ola bilər ki, onlardan unu alandan sonra hər hansı bir kəndə aparıb daha baha qiymətə satırlar. Artıq ölkə rəhbərliyi un məhsulları ilə bağlı göstəriş verib və hesab edirəm ki, bu un və çörək kimi strateji məhsulların qiymətinin stabilləşməsinə təsir edəcək.
- Fəzail Ağamalı həmin açıqlaması ilə hər iki deputatın həm də bizneslə məşğul olduqlarını açıqlamış oldu. Məsələnin bu tərəfi araşdırılacaqmı?
- Ola bilər ki, hər bir şəxs deputat olana qədər hər hansı bir işlə məşğul olub. Biznesmenin də deputat seçilmək hüququ var. Biz baxmalıyıq ki, bu nə dərəcədə sübut olunur ki, həmin şəxslərin öz adına rəsmi şirkət var, yoxdur. Bu kifayət qədər hüquqi məsələlərdir ki, araşdırma və sübutetmə tələb edir.
- Mətbuatda rayon icra hakimiyyəti başçılarının sahibkarları, vətəndaşları incitməsi haqda məlumatlar var. Belə məlumatların böyük əksəriyyətindən aydın olur ki, KQMBİ-nə olunan müraciətlər, ərizə və şikayətlər başçıların üstünə qayıdır. Bundan sonra başçı şikayət edənləri incidir. Belə bir sistem mövcuddur ki, şikayətlər icra başçılarına göndərilir?
- “Qaynar xətt” əlaqə mərkəzinə daxil olan məlumatlarda hər hansı bir rayonun icra nümayəndəsi, ərazi icra nümayəndəsindən, hər hansı bir şöbənin müdirindən şikayət daxil olursa, orada birbaşa korrupsiya cinayəti yoxdursa, süründürməçiliklə bağlıdırsa, biz bunu icra başçısının özünə göndəririk ki, məsələ araşdırılsın, bizə nəticə barədə məlumat verilsin. Əgər belə hallar dəfələrlə olursa, icra başçısına göndəririksə, nazirliyə göndəririksə, məsələ həll olunmursa, bu halda KQMBİ-də araşdırırıq. Əvvəlki araşdırmaları icra hakimiyyətində, nazirlikdə kimin apardığını, araşdırma işini tələb edirik. Əgər şikayətin kimdən olduğu şəxsə göndərildiyi halı müəyyən edilirsə, bu halda çox ciddi tədbir görülür. 2015-ci ildə 5 cinayət işi yerli icra hakimiyyətləri ilə bağlı olub və 9 nəfər vəzifəli şəxs barəsində məhkəmələrə işlər göndərilib.
- Binəqədidəki 16 mərtəbəli bina yandı. Məsələyə prezident səviyyəsində reaksiya verildi. Amma nəticədə JEK müdiri, qoca bir kişi tutuldu...
- 16 mərtəbəli bina ilə bağlı 1 nəfərin məsuliyyətə cəlb olunduğunu demək haqsızlıq olardı.
- 1 nəfər vəzifəli, qalanları aşağı vəzifəli şəxslər həbs ediliblər. İcra başçısının icazəsi olmadan həmin penoplastı ora vura bilməzdilər?
- Xeyr, belə deyil, məhz bu iş üzrə kifayət qədər vəzifəli şəxslər həbs olunub.
- Mənzil Tikinti Kooperativlərindəki dələduzluq məsələləri ilə bağlı hansı işlər görülür?
- Belə hallar son zamanlar, mətbuatda işıqlandırılandan sonra demək olar ki, yoxdur. Ola bilər ki, çox əvvəlki illərdə baş vermiş əməllərlə bağlı məlumatlar verilir, bu məsələlər də araşdırılır. Müvafiq qurumlara da müraciət etmişik ki, mənzillərin bir ünvandan satılması təşkil edilsin, mənzil almaq istəyənlər də bilsinlər ki, həmin ünvandan alınan mənzillər problemsiz mənzillərdir.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər