Jurnalistlər də qənaət rejiminə keçir... |
Müəllif: Admin | Bölmə: Xəbərlər | Vaxt: 15-01-2016, 10:02 | Şərh sayı: (0) | Baxılıb: 221
Jurnalistlər də qənaət rejiminə keçir...
Seymur Verdizadə: “Gündə bir tikə çörək yeyirik, indi bir o qalıb ki, çörəkdən də imtina edək”; Zamin Hacı: “Ancaq yeməyimizdən kəsib qənaət edə bilərik, başqa heç bir fikrim yoxdur”Ölkədə yaranmış vəziyyətlə bağlı hökumət qənaət rejiminə keçir. Beləliklə, qənaət mövzusu Azərbaycan cəmiyyətində gündəmə oturmaqdadır. Bəs görəsən, jurnalistlər nəyə qənatə edir?
Mövzu ilə bağlı bir neçə tanınmış jurnalistin rəyini öyrəndik.
APA TV-nin əməkdaşı Natiq Qədimov toy tədbirlərini “ixtisara” saldığını deyib: “Toylara demək olar daha çox yaxın bildiyim şəxslərin məclisinə gedirəm. Bundan əvvəl hər dəvətnamə verilən uzaq qonşumun, qardaşımın əsgərlik yoldaşının toyuna belə gedirdimsə indi çalışıram bu məsrəfləri azaldım”.
Jurnalist bazarlığa da qənaət etdiyini bildirib: “Marketdən bazarlığı da azaltmışam. Həftədə 2 dəfə olduğum market alış-verişini aya uzağı 3 dəfəyə salmışam...”
Jurnalist Kamil Həmidov isə suala “Nəyimiz var ki, ona da qənaət edək” sualı ilə cavab verib:
“Açığını deyim ki, qənaət məsələsi yaxşı məsələdir. Amma baxır harada və necə... Qənaət o yerdə olur ki, insanın sosial-iqtisadi, maddi imkanı qənaəti etməyə, qənaətə keçməyə imkan verir və ya versin. Bizdə isə durum tam əksinədir. Yəni həqiqən, sosial-iqtisadi, maddi durumumuz-böyük əksəriyyətdən söhbət gedir- imkan verirmi ki, yaranmış, tamahkar və Allahsız məmurların üzündən ortaya çıxmış acınacaqlı vəziyyətlə bağlı qənaət rejiminə keçək? Əsla yox! Onsuz da indiyə kimi birtəhər günümüzü yola vermişik, qəpiyimizi-qəpiyimizə calamışıq-həmçinin borclardan, kreditlərdən asılı vəziyyətdə qalmışıq, şapalaqla üz qızartmışıq və sairə. İndi belə olan halda daha nəyə qənaət edəcəyik və ya etməliyik? Udduğumuz zəhərli havayamı, tərkibində min cür bakteriyalar olan, yəni icdiyimiz suyamı qənaət edəcəyik və ya etməliyik? Nəyimiz var ki, ona da qənaət edək?”
Jurnalistlərin Həmkarlar İttifaqının sədri, Mətbuat Şurasının sədr müavini Müşfiq Ələsgərli isə həyatında heç bir dəyişiklik hiss etmədiyini deyib:
“Həyatımda ciddi bir dəyişilik hiss etmirəm. Azərbaycanın 90-cı illərdəki vəziyyətini keçən bir adamam. Yəni həmin dövr indiki ilə müqayisəyə gəlməyəcək dərəcədə həm iqtisadi, həm sabitlik və digər məsələlərlə bağlı daha problemi bir dövr idi. O vaxtdan qənaətlə yaşamaq sanki xarakterimizə keçib. Təbii ki, situasiyanın dəyişməsindən aslı olmayaraq həmişə şəxsi işimdə, ailəmdə artıq xərclərdən, təmtəraqlı həyat tərzindan uzaq olmuşam, minimum şəraitlər və təminatlarla idarə olunmağa adət etrmişəm. O dövrü yaşayan insanların əksəriyyətində bu cəhət var. Yaranmış indiki çətin vəziyyət yeni stiuasiyadır, təbii ki, bu vəziyyətdən çıxacağıq”.
Müşfiq Ələsgərli toy dəvətlərini də təxirə salmadığını vurğulayıb: “Onsuz da bundan əvvəl də ən yaxın tanış hesab etdiyim adamların toyunda iştirak etmişəm. Bu, bir qədər qəribə səslənməsin. Toy və hüzr mərasimlərinə mənim baxışım fərqlidir. Nə özüm bu cür mərasimləri keçirəndə artıq xərclərə yol verirəm, nə də başqalarının dəbdəbə xatirinə keçirdiklərinə”.
Buna baxmayaraq, Müşfiq Ələsgərli qənaet etdiyi məsələlərdən də bəhs edib: “Bilirsiz ki, prezidentin qərarı ilə jurnalistlərə ev verilmişdi, mən də ev alanlar sırasındayam. Həmin evdə quruculuq işləri ilə məşğul olmaq, yeni mebellərin alınması və sairə bu kimi digər məsələləri hələlik təxirə salıb minimum şərtlərlə yaşamağa başlamışıq”.
Tanınmış jurnalist Seymur Verdizadə bu cür stiuasiyalarda xərcləri azaltmaq deyil, gəlirləri çoxaltmaq üçün çalışdığını vurğulayıb: “Onsuz da biz heç vaxt sağa-sola pul xərcləməmişik, həmişə bir qəpiyin belə qədrini bilmişik. İndi belə çıxır ki, o qəpiyin qədrini iki qat artıq bilməlyik.
Mənim xərclərim onsuz da məhdud olub. Buna görə də heç vaxt şəxsi gündəlik xərclərimdə israfçılığıa yol verməmişəm. Siqaretdən, alkoqollu işkilərdən uzaq olduğum üçün mənim hansısa əlavə bir xərcim olmayıb. Gündə bir tikə çörək yeyirik, indi bir o qalıb ki, çörəkdən də imtina edək. Beləliklə, xüsusi xərclərim yoxdur ki, onları təxirə salım. Həyat şəraitim elədir ki, hər şey planlaşdırılıb. Uşaqlarımın təhsili, təlim-tərbiyəsi, gündəlik tələbatlarını da təxirə salmaq niyyətində deyiləm. Ona görə də hələlik qənaət barəsində düşünmürəm. Əgər seçim qarşısında qalaramsa, ilk növbədə özümə məxsus xərclərimi azaldaram. Əsasən bu cür situasiyalarda xərcləri azaltmaq deyil, gəlirləri çoxaltmaq üçün çalışıram".
Tanınmış köşə yazarı Zamin Hacı da məsələyə öz rəyini bildirib: “Başqalarından fərqli olaraq heç vaxt daşıya bilməyəcəyim ağırlıqların altına girməmişəm, həmişə çalışmışam gözüm tox olsun. Bu mənada israfçılıq olmadığından qənaət etməyə də heç nə yoxdur. Bilirsiz ki, biz jurnalistlərin vəziyyəti həmişə necə olub. Qənaəti o adam edir ki, onun imkanı var.
Hökumət öz xərclərini azaldır; Ledi Qaqanın konserti, Avrovizion yarışması və digər bu kimi məsələlərə sərf edilən xərcləri. Bəs biz nəyə qənaət edəcəyik, o məlum deyil. Onsuz da bizim qazancımız gündəlik tələbatlarımızı güclə ödəyirdi. Ancaq yeməyimizdən kəsib qənaət edə bilərik, başqa heç bir fikrim yoxdur".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər