Azərbaycanı İslam koalisiyasından çəkindirən 2 təhlükə |
Müəllif: Admin | Bölmə: Xəbərlər | Vaxt: 11-01-2016, 11:26 | Şərh sayı: (0) | Baxılıb: 200
Azərbaycanı İslam koalisiyasından çəkindirən 2 təhlükə
Tanınmış ekspert yeni situasiyanın rəsmi Bakını ehtiyatlı davranışa sövq etdiyini deyir... Ötən il dekabrın əvvəlində Səudiyyə Ərəbistanının təşəbbüsü ilə yaradılan “Terrorizmə qarşı İslam koalisiyası”na bir çox müsəlman dövlətlətləri qoşulsa da Azərbaycan hələ ki, son qərarını verməyib. Azərbaycanın bu koalisiyaya qoşulması məsələsi barədə dekabrın 15-də xarici işlər naziri Elmar Məmmədyarov və Səudiyyə Ərəbistanının xarici işlər naziri Adel Əl Cubeir arasında telefon danışığı da olmuşdu.
Üstündən bir aya yaxın keçsə də, Azərbaycan yekun qərarını verməyib. Xarici İşlər Nazirliyinin mətbuat xidmətinin rəhbəri Hikmət Hacıyev bildirmişdi ki, Azərbaycan Respublikasının qanunlarına uyğun olaraq, ölkəmizin bu qəbildən olan hər hansı strukturlarda iştirakı ölkədaxili prosedurların tələbləri əsasında nəzərdən keçirilməlidir: “Hazırda məsələyə baxılır. Terrorizmdən əziyyət çəkən dövlət kimi Azərbaycan terrorizmin bütün forma və təzahürlərini qəti şəkildə qınayır”.
Azərbaycanın İslam koalisiyasına üzvlüyünün yubanmasının səbəbləri barədə politoloq Natiq Miri “Yeni Müsavat”a danışıb. Onun sözlərinə görə, regionda baş verən hadisələr bu və ya digər şəkildə Azərbaycana da öz təsirini göstərir. Son vaxtlar Səudiyyə Ərəbistanı və İran arasında yaşanan gərginlik də Azərbaycanın bir sıra məsələlərlə bağlı addımlarına öz təsirini göstərməkdədir.
Azərbaycan ehtiyatlı davranır və tərəf tutmaq istəmir: “Bunu müəyyən mənada anlamaq da olar. ”Terrorizmə qarşı İslam Koalisiyası"nın yaradılması ayətullah Nimr əl-Nimrin edamından əvvəl ortaya çıxan hadisə idi. Azərbaycana bu koalisiyaya qoşulmaq üçün təkliflər də Nimrin edamından əvvəl olmuşdu. Yəni hələ o zaman Səudiyyə ilə İran arasında indiki gərginlik yaşanmırdı. Səudiyyə ilə İran arasında gərgin münasibətlər sözügedən koalisiyaya qoşulmaq məsələsində Azərbaycanı tərəddüd etməyə sövq edir. İndiki şəraitdə Azərbaycan qızıl ortanı seçmək məcburiyyətindədir və tərəf tutmaq istəmir".ə
N.Mirinin fikrincə, Azərbaycan haqlı olaraq hesab edir ki, indiki vəziyyətdə Səudiyyənin ideya müəllifi olduğu koalisiyaya rəsmi qoşulması qonşuluğumuzdakı İranla münasibətlərə mənfi təsir göstərə bilər: “Nəzərə almaq lazımdır ki, İran Azərbaycanın böyük, güclü qonşusudur, eyni zamanda Azərbaycan əhalisinin böyük əksəriyyəti şiədir. İndiki vəziyyətdə Azərbaycanın Səudiyyənin ideya müəllifi olduğu ittifaqa daxil olması ola bilər ki, şiə toplumunda müsbət qarşılanmaz. Azərbaycan indiki situasiyada İranı qarşısına almamaq üçün koalisiyada iştirak qərarını yubadır. Digər tərəfdən də nəzərə alsaq ki, İslam koalisiyası İŞİD-lə mübarizə adı ilə yaranır, bu isə o deməkdir ki, həmin koalisiyaya qoşulan Azərbaycan kimi kiçik dövlətlər əli hətta nəhəng dövlətləri titrətməyə yetən terrorçu İŞİD qruplaşmasının hədəfinə çevrilə bilər. Bu baxımdan da rəsmi Bakının hələlik koalisiyaya qoşulmaması düzgün addım sayılmalıdır. Hesab edirəm ki, Azərbaycan heç bir zaman İslam koalisiyasında yer almayacaq”.
Politoloq sonda xatırlatdı ki, Azərbaycan həmin koalisiyaya üzv olmadan da terrorizmə qarşı öz töhfəsini uzun illərdir müxtəlif proqramlar çərçivəsində verir.
Musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər