Çap xərclərinə görə qəzetlər tətil edə bilərmi... |
Müəllif: Admin | Bölmə: Xəbərlər | Vaxt: 9-01-2016, 09:19 | Şərh sayı: (0) | Baxılıb: 201
Çap xərclərinə görə qəzetlər tətil edə bilərmi...
Ələsgər Süleymanov: “Əgər hökümət tərəfindən bununla bağlı hər hansı bir addım atılmasa...”;Rəşad Məcid: “Reklamların artırılması haqda müzakirələr aparılmalıdır”
“Azərbaycan” nəşriyyatının çap xərclərini 25 faiz artırması qəzetlərin vəziyyətini ikiqat ağırlaşdırıb. Bəs görəsən çap xərclərinə görə qəzetlər tətil edə bilərmi?
“Yeni Müsavat” qəzetinin baş direktoru Ələsgər Süleymanov yaranmış vəziyyətin çox acınacaqlı olduğunu, hökümət tərəfindən bununla bağlı hər hansı addım atılmadığı təqdirdə etiraz etməkdən başqa çarə qalmadığını bildirib: “Mütəmadi olaraq mətbuatda etirazımızı bildiririk. Lakin hələ ki hökumət və ya aidiyyəti qurumlar tərəfindən heç bir reaksiyaya rast gəlmirik. Bu cür durğunluq, susqunluq isə bizi daha da narahat edir. Düşünürəm ki, qəzetlər nəsə bir çıxış yolu tapmalıdır. Əgər hökumət tərəfindən bununla bağlı hər hansı bir addım atılmasa etiraz etməkdən başqa bir çarəmiz qalmayacaq”.
Baş direktor bu günlərdə “Yeni Müsavat” qəzetinin qiymətinin artacağının istisna olmadığını deyib: “Qəzetin qiymətinin 10 qəpik artırılıması ilə bağlı hələ keçən ilin sonlarında - 2-ci devalvasiyadan əvvəl qərar vermişdik. Lakin ötən ilin 21 dekabr devalvasiyasından sonra bunun heç bir əhəmiyyəti qalmadı. 10 qəpik artımı indiki qəzet kağızının və çap xərclərinin artırılması fonunda tamamilə itib-batdı. Buna görə də düşünürük ki, başqa qəzetlər kimi növbəti həftədə qəzetin qiymətinin 60 qəpik olmasını müəyyənləşdirək. Başa düşürük ki, bu oxucuların vəziyyətini daha da ağırlaşdıracaq, lakin qəzetin mövcudluğunu qoruyub saxlamaq üçün bu addımları atmaqdan başqa çarə görmürük. Yalnız kağız xərcləri aşağı düşərsə, yaxud hökumət tərəfindən qəzetlərə hansısa güzəşt və ya əlavə yardımlar olarsa qəzet qiymətini artırmaya bilərik”.
Ələsgər Süleymanov vəziyyətdən çıxış yolu haqda öz təkliflərini də bildirib: “Təkliflər var ki, qəzetin dövrülüyü, səhifələrinin sayı azaldılsın. Yəni qəzetimiz 16 səhifə ilə deyil, 8 səhifə ilə nəşr edilsin. Həmin 8 səhifədə ən vacib, maraqlı, seçilmiş xəbərlərin xülasəsi olsun. Oxucular xəbərlər barəsində daha geniş şəkildə isə qəzetin elektron variantından, yəni saytdan məlumat alsın. Beləliklə də qəzetin maya dəyəri, çap xərcləri də aşağı salınar, qiymətini 50 qəpik etmək şərti ilə öz mövcudluğunu, dövrülüyünü qoruyar və mütəmadi oxucuların görüşünə gələr”.
“Azadlıq” qəzetinin baş redaktoru Sücəddin Şərif qəzetlərin tətil edəcəyini güman etmədiyini bildirib: “Çünki mətbuatda hazırda durum elədir ki, böyük əksəriyyəti təlimatla işləyir. Buna görə də belə bir hadisənin baş verə biləcəyini güman etmirəm. Beləliklə, baş verməsi mümkün olmayan bir hadisəyə qoşulub-qoşulmayacağımız barədə fikir deməyə çətinlik çəkirəm. Bizim görmək istədiyimiz, tələb etdiyimiz məqamlar da var”.
Sücəddin Şərif “Azadlıq” qəzetinin qiymətinin situasiyadan asılı olaraq yenidən arta biləcəyini deyib.
“525-ci” qəzetinin baş redaktoru Rəşad Məcid isə çap xərclərinin artırılması ilə bağlı tətil və ya digər aksiyaları yersiz hesab etdiyini açıqlayıb: “Azərbaycanda ənənəvi olaraq nəşriyyata olan borcların prezident tərəfindən saxlanılması, dondurulması və ya bağışlanması olub... Hər halda yazılı mətbuata dövlət tərəfindən dəstək var. Buna görə də tətil və digər aksiyaları yersiz hesab edirəm. Hesab edirəm ki, bir müddət sonra hər şey qaydasına düşəcək. Bu cür inflyasiyanı bizim yaşlı nəsil 90-cı illərin əvvəllərində çox görüb. İndiki nəsil üçün isə bu təəccüblü haldır. Çünki Azərbaycan manatı bundan öncə dollarla nisbətdə nüfuz qazanmışdı”.
R.Məcidin fikrincə problemin kökü reklam bazarının qıtlığı ilə bağlıdır: “Belə şəraitdə reklamların hansı formada artırılması haqda müzakirələr aparılmalıdır. Mətbuat Şurasında bununla bağlı müzakirələr gedib. Prezidentlə görüşdə də bu cür fikirlər səslənib. Reklamla bağlı müzakirələr daha aktual olar, nəinki bu tipli təkliflər. Qəzetlərin bahalaşması o qədər də effekt verə bilməz. Güman edirəm ki, hansısa qəzet öz etibarlı oxucularına güvənirsə, qiyməti qaldıra bilər. Amma bizim elə bir fikrimiz yoxdur”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər