Azərbaycanda itən 18 milyard dollarla bağlı araşdırma başladı |
Müəllif: Admin | Bölmə: Xəbərlər | Vaxt: 29-12-2015, 14:27 | Şərh sayı: (0) | Baxılıb: 309
Azərbaycanda itən 18 milyard dollarla bağlı araşdırma başladı
Təqaüddə olan xüsusi xidmət polkovniki Korrupsiyaya qarşı Mübarizə İdarəsində dindirildi
Təqaüddə olan xüsusi xidmət polkovniki Tofiq Rəcəbov Baş Prokuror yanında Korrupsiyaya Qarşı Mübarizə İdarəsində dindirilib. T.Rəcəbov bu haqda redaksiyamıza daxil olan xəbəri təsdiqləyib. Polkovnik deyib ki, onu Valeh adlı müstəntiq dindirib: “İfadəmi aldılar, ölkəyə gətirilən 18 milyardla bağlı əlimdə olan sənədləri verdim. Həmin sənədlər 18 milyardın Beynəlxalq Banka mədaxil olunması ilə bağlı idi. Təqdim etdiyim sənədlərdə Cahangir Hacıyevin, qəbul edən xəzinədarın imzası, bankın möhürü var. Sənədləri istintaqa təqdim etdim”.
T.Rəcəbov deyir ki, sənədləri Korrupsiyaya Qarşı Mübarizə İdarəsinə təqdim edəndən sonra ona qarşı təzyiqlər başlayıb: “Mənə edilən təzyiqdə Azərbaycanda “qara pullar”ın yuyulmasında əli olan şəxslərin rolu var. Eldar Mahmudovun qaynı Fərhadın Zevin küçəsində ofisi var. Onlar ölkəyə qarşı düşmənçilik siyasəti yeridiblər. Ölkədən milyardlarla pul çıxarıblar. Bu adamların müxbir hesabları dünyanın ən yaxşı banklarındadır. “Siti bank”, “Raiffeisen bank”dadır. Ölkədəki Eldar Mahmudova bağlı “brilyant mafiyası” pulları yerli banklar vasitəsi ilə həmin banklara axıdıb. Yoxlamaları xaricdəki həmin banklardan başlamaq lazımdır. Mən Baş Prokuror yanında Korrupsiyaya qarşı Mübarizə İdarəsinin rəhbərliyinə müraciət edirəm. Həmin banklara sorğu verib cavab alsınlar. Görsünlər ki, Eldar Mahmudov ətrafındakı bankirlərlə birgə dünyanın hər tərəfinə nə qədər pul köçürüb. Mərkəzi Bank sədri Elman Rüstəmovun, maliyyə naziri Samir Şərifovun bu qədər qanunsuzluqlardan xəbərləri olmayıb? Bu, mümkün deyil. Bu adamlar prezidenti aldadırlar. Bu gün yeni bir təşkilatın yaranmasına ehtiyac var. İstintaq komitəsi yaradıb səlahiyyət versinlər, ölkədən çıxarılan milyardların geri qaytarılması ancaq bu yolla mümkündür. Nazırlər, komitə sədrləri hər biri milyonçudur. Nəyin hesabına? Əlbir olub dövlətin pulunu dağıdıblar. Vətəndaşın əmlakının yağmalanmasına göz yumurlar. Banklar vətəndaşı soyur. Mənim əmlaklarımı əlimdən alıb Mixail Fransevin adına keçiriblər. Belə də şey olar? Azərbaycan konstitusiyası bankların qanunsuzluqları qarşısında aciz bir kitabçaya çevrilib”.
T.Rəcəbov deyir ki, məmurlar prezidentin qərarlarından öz şəxsi məqsədləri, varlanmaları üçün istifadə edirlər: “Prezident dərmanların ucuzlaşması üçün qərar verdi. Nəticə nə oldu? Dərmanlar dəfələrlə bahalaşdı. 80 qəpiyə aldığım dərman devalvasiyadan öncə 2 manat 40 qəpiyə satılırdı. İndi yəqin ki, 4-5 manat olar. Bu adamlar hansı məzhəbə qulluq edir, bilinmir. Türkiyədə 7 lirəyə olan dərmanı Azərbaycanda 30-40 manata satırlar. Prezident qərar verir, bu mafiozlar isə ondan sui-istifadə edirlər. monopoliyalar bir mafiyanın əlindən o birinin əlinə keçir. 1-ci devalvasiya zamanı Eldar Mahmudov və ətrafındakı bankirlər milyardlarla pulu ələ keçirdilər. Cinayət işi yerində sayır. Niyə?”
T.Rəcəbov deyir ki, E.Mahmudovun Əmlak Məsələləri Dövlət Komitəsinin sədri Kərəm Həsənovla əlaqələri də yoxlanılmalıdır: “Eldar Mahmudovun bütün gizli-aşkar əmlakları onun əli ilə özününküləşdirib. Mən sahibkaram, mənim nümunəmdə baxsınlar ki, Kərəm Həsənov Eldar Mahmudov üçün nələr edib. Xuluflu küçəsində yerləşən mənə məxsus şadlıq evini Kərəm Həsənov götürüb Eldar Mahmudova vermişdi. Mən şikayət edəndə Kərəm Həsənov dedi ki, oranı Eldar Mahmudova vermişik, danışma, şikayət eləmə, sənə şəhərin mərkəzində torpaq verəcəyik. Əmlak Komitəsində Yusif var, 050 200-08-03 iş telefonudur, 100 dəfə zəng etdim. Hər dəfə dedi ki, Kərəm müəllim deyir ki, narahat olmasın. İmkan versəydilər, özümün şadlıq evimi işlədib dolanardım. Mənim qədər mal-mülkü Eldar Mahmudov və bankir ətrafı tərəfindən əlindən alınan nə qədər sahibkar var. Bu adamlar öz səlahiyyətlərindən istifadə edərək sahibkarları məhv edirlər”.
Yada salaq ki, ötən saylarımızda T.Rəcəbovun ölkəyə inqilab üçün 18 milyard pul gətirilməsi haqda yazı dərc etmişdik. Vaxtilə xüsusi idarədə işləyən T.Rəcəbovun sözləri əsasında hazırlanmış “Azərbaycana inqilab üçün 18 milyard gətirilmişdi” sərlövhəli yazıda pulun ölkəyə hansı yolla gətirilməsindən söhbət açılırdı.
Həmin yazıdan sitat: “Bu yaxınlarda mən biznesimlə əlaqədar İsveçrədə idim. Orada bir neçə adamla görüşdüm. Onlar təklif etdilər ki, bəzi məsələləri prezidentə çatdırmaq lazımdır, ölkəyə təhlükə var. Yəni bəzi nazirlər qrup halında birləşiblər. Xarici ölkələrin, xüsusən Avropanın və böyük dövlətlərin siyasi rəhbərliklərinə çıxış axtarırlar. Özlərinə dayaq axtarırlar ki, gələcəkdə hakimiyyətə yiyələnsinlər, öz əmlaklarını qorusunlar. Bakıya qayıdan kimi dərhal yazıb çox yüksək səviyyəli bir vəzifəliyə verdim. O da aparıb bunu verib Eldar Mahmudova. O da mənə çatdırdı ki, istəyirsən bu həyatda yaşayasan, bir də ağzına belə şey gətirmə. Akif Çovdarov qapımızı pusdururdu, oğlumu güdürdülər. Demişdilər ki, danışsan, oğlunu tutub yox edəcəyik. Bunlar 2 il əvvəl olub. 2013-cü ildə prezident seçkisindən əvvəl. Həmin pullar çevriliş etməyə xərclənməli idi. Həmin pullardan mənə də təklif etmişdilər. Demişdilər ki, zavodların var, o pulları zavodlarına ayıraq. Pulu seçkidən 2-3 ay əvvəl verməli idilər. Başa düşdüm ki, çevrilişə hazırlıq gedir”.
Yazı dərc olunandan sonra bir çoxları T.Rəcəbovun dediklərinə şübhə ilə yanaşdılar. Sosial şəbəkələrdə mövzu günlərlə müzakirə edildi. Bu qədər məbləğin ölkəyə hansı yolla gətirildiyi haqda müzakirələr aparılmağa başladı. İddianın reallıqdan uzaq olması haqda uzun-uzadı fikirlər səsləndirildi. Bundan sonra T.Rəcəbov pulun ölkəyə gətirilməsini və Beynəlxalq Banka mədaxil olunmasını təsdiqləyən sənədləri ortaya qoydu.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər