Yanvar qırğının 26-cı ili |
Müəllif: Admin | Bölmə: Məqalələr | Vaxt: 20-01-2016, 18:59 | Şərh sayı: (0) | Baxılıb: 256
Yanvar qırğının 26-cı ili
26 il öncə Azərbaycan xalqı istiqlal mübarizəsindən geri çəkilməyəcəyini bütün dünyaya nümayiş etdirdiBu gün 20 Yanvar hadisələrindən 26 il ötür. Hadisənin başvermə səbəbləri ilə bağlı zaman-zaman müxtəlif fikirlərə, rəylərə rast gəlinsə də, bütün əks mövqelər bir nöqtədə kəsişir: bu tarixi gündə Azərbaycan xalqı əsrlər boyu qəlbində yaşatdığı milli azadlıq və istiqlal istəyindən geri çəkilməyəcəyini, bu müqəddəs amal uğrunda hətta canından belə keçməyə hazır olduğunu bütün dünyaya nümayiş etdirdi.
1990-cı il yanvarın 20-də baş verən faciəli hadisələr süquta uğramaqda olan sovet imperiyasının mənfur repressiya maşınının xalqımıza qarşı törətdiyi amansız cinayət idi. Həmin gün 130-dan çox dinc insanın xüsusi qəddarlıqla qətlə yetirilməsi, 1000-ə yaxın insanın yaralanması, şübhəsiz, xalqımız üçün böyük dərd, faciə idi. Lakin eyni zamanda bu hadisə xalqımızın milli azadlıq və müstəqillik uğrunda mübarizəsinin kulminasiya nöqtəsi olmaqla, çağdaş tariximizə qürur və şərəf mübarizəsi kimi daxil oldu.
Yanvarın 19-da Azərbaycanda fövqəladə vəziyyətin elan edilməsinə 7 saat qalmış 11 minlik sovet ordusu respublikamızın paytaxtı Bakı şəhərinə yeridilərkən xüsusi qəddarlıq və görünməmiş vəhşilik törətdi. Azərbaycana yeridilən ordu hissələrinin tərkibinə Stavropol, Krasnodar və Rostovdan səfərbərliyə alınan erməni əsgər və zabitləri, sovet hərbi hissələrində xidmət edən ermənilər, erməni kursantlar da daxil edilmişdi.
SSRİ DTK-nın “Alfa” qrupu yanvarın 19-da saat 19.27-də Azərbaycan televiziyasının enerji blokunu partlatdı, respublikada televiziya verilişləri dayandırıldı. Gecə isə qoşun fövqəladə vəziyyət elan edilməsindən xəbərsiz olan şəhərə daxil oldu və əhaliyə divan tutmağa başladı. M.Qorbaçovun fərmanı qüvvəyə minənədək - yanvarın 20-də gecə 1-dək artıq xeyli insan öldürülmüşdü. Bakıda fövqəladə vəziyyətin elan olunması haqqında məlumat isə əhaliyə yalnız yanvarın 20-də səhər saat 7-də respublika radiosu ilə çatdırıldı. Həmin vaxt öldürülənlərin sayı artıq 100 nəfərə çatmışdı.
***
Məşhurlar həmin günü necə xatırladıqları barədə “Yeni Müsavat”a danışıb. Onları sizə təqdim edirik.
Xalq şairi Fikrət Qoca: “O zaman atışmaların altında idik. Başımızın üstündən güllələr keçirdi. Həmin gecənin səhəri günü də biz meydanlarda, Filarmoniya ilə Prezident Aparatı arasındakı ərazidə dayanırdıq. 22 yanvar günü isə hamı indiki Şəhidlər Xiyabanına axın etdi. Axın bizi aparırdı... Həmin günlə bağlı nə fikirlərim, düşüncələrim varsa əsərlərimə, poema və povestlərimə, şeirlərimə köçürdüm. 20 Yanvar şəhidlərinə aid mənim 4 povestim, poemam və çoxlu sayda şeirlərim var”.
Xalq artisti, bəstəkar Faiq Sücəddinov: “Xatırlayıram, biz Hökumət Evinin yanında, Hüsü Hacıyev küçəsində, Mərkəzi Univermaq tərəfdə dayanırdıq, bir-birimizə dəstək verirdik.
Bu tarix faciə günüdür, çoxlu sayda şəhidlər verdik. Lakin eyni zamanda o gün Azərbaycanın sınaq günü, hünər günüdür. Biz bu sınaqdan məğlub çıxmadıq.
20 Yanvar hadisələri ilə bağlı kifayət qədər əsərlər yazılıb, səhnələşdirilib, mahnılar bəstələnib. Hər il Şəhidlər Xiyabanına gedib o gün şəhid olan insanlarımızı anırıq. Onlar heç zaman bizim yadımızdan çıxmayacaq. Bu gün hər cür hərbi vəziyyətə hazırıq. Bizim çox güclü dövlətimiz, prezidentimiz, qoşunumuz var".
Xalq artisti Firəngiz Mütəllimova: “Evimiz Yasamal rayonunda yerləşirdi. Həmin gün qardaşımın ad günü idi, o, 20 yanvarda dünyaya gəlib. Evdə kiçik süfrə açıb onun gəlişini gözləyirdik. Gördüm ki, bayırda hay-küy var. Mikrofonla çağırışlar edilir, müxtəlif səslər gəlirdi. Nə baş verdiyini başa düşə bilmirdim. Çox nigaran idim. Qardaşım işdən gəldikdən sonra heç 10 dəqiqə keçməmiş atışma başladı. Yadımdadır, metronun ”İnşaatçılar" stansiyasının yaxınlığından da tanklar keçirdi. Atışmaya görə evdə aşağı əyilib qalmışdıq... Allah belə bir faciəni bir də yaşatmasın".
Əməkdar artist Bəhram Bağırzadə: “Həmin zaman ”Semaşko"da (1 saylı Şəhər Kliniki Xəstəxana) rəhmətlik dostumun yanında idim. Əfsuslar olsun ki, o, xəstəxanada dünyasını dəyişdi. Həmin vaxt Bakının bir çox ərazisində işıqları söndürmüşdülər, həmçinin də “Semaşko”da. Əməliyyatlar əl fənəri ilə aparılırdı. Xəstəxanaya bir-birinin ardınca çoxlu sayda yaralı insanlar gətirilirdi...
Hər il, 20 Yanvar tarixində ailəmlə birgə Şəhidlər Xiyabanına gedib həmin günü yad edirəm. Allah bütün şəhidlərimizə rəhmət etsin!"
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər