Qeybəçəkilmənin hikməti |
Müəllif: Admin | Bölmə: Məqalələr | Vaxt: 15-10-2015, 15:43 | Şərh sayı: (0) | Baxılıb: 337
Qeybəçəkilmənin hikməti
Uzunmüddətli qeyb dövrü başlanandan bu günə qədər aktual məsələlərdən biri də qeybəçəkilmə barədə müxtəlif irad və şübhələrdir. İmamın qeybə çəkilməsinin hikməti nədir? Qeybdə olan İmamın cəmiyyətə hansı təsir və faydası ola bilər? Bu suallar bugünkü günə qədər öz aktuallığını qorumaqdadır. İmamın qeybə çəkilməsi barədə ortaya atılan şübhələrin mənşəyi də məhz bu suallardan yaranıb.
Qeybəçəkilmənin hikməti barədə araşdırma aparmaq üçün üç mühüm nöqtəyə diqqət etmək zəruridir:
1. İslam dininin gələcəkdə ümümbəşəri bir din olması.
Quran nöqteyi-nəzərindən, İslam dininin bütün dinlərdən üstünlüyü və onun ümumbəşəri bir dinə çevrilməsi qəti və qaçılmazdır. Allah-Taala müqəddəs kitabın üç müxtəlif ayəsində belə buyurur:
هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ
“Öz Peyğəmbərini hidayət (vasitələri) və haqq din ilə bütün dinlərə qalib etmək üçün göndərən Odur.” [1]
Başqa bir ayədə isə Allahın “Zəbur” kitabında yer üzərinə saleh şəxslərin hakim olacağını vəd verməsi aşkar şəkildə qeyd edilir:
وَلَقَدْ كَتَبْنَا فِي الزَّبُورِ مِن بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ
“Həqiqətən Biz Zikrdən (Musanın Tövratından) sonra (Davudun) Zəbur(un)da yazdıq və qərara aldıq ki, bu yerin varisi Mənim saleh bəndələrim olacaqlar.” [2]
2. İnsanın dünyaya təsiri və öz taleyindəki rolu.
İslam nöqteyi-nəzərindən, insan dünyaya təsir edə və öz müqəddəratını dəyişə bilər. Belə ki Qurani-Kərim bu barədə buyurur:
إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ
“Hər hansı bir tayfa öz tövrünü (nəfsində olanları) dəyişmədikcə (pozmadıqca), Allahda onun tövrünü (onda olanları, onun əhvalını) dəyişməz.” [3]
Buna görə də İslamın ümumbəşəri bir dinə çevrilməsi, dini qanun və dəyərlərin cəmiyyətə hökm sürməsi hər şeydən əvvəl insanın ixtiyar və iradəsinə bağlıdır. Əgər Allah-Taala İslam dinini icbari şəkildə və ya möcüzə vasitəsi ilə ümumbəşəri bir dinə çevirmək istəsəydi, bunu Peyğəmbərin (s) zamanında edərdi. Lakin Allah bunun belə olmasını istəmir:
وَلَوْ شَاء رَبُّكَ لآمَنَ مَن فِي الأَرْضِ كُلُّهُمْ جَمِيعًا أَفَأَنتَ تُكْرِهُ النَّاسَ حَتَّى يَكُونُواْ مُؤْمِنِينَ
“Və əgər sənin Rəbbin istəsəydi, yer üzündə olanların hamısı bütünlüklə məcburi surətdə iman gətirərdilər.Yoxsa sən camaatı zorla mömin olmağa məcbur edəcəksən?!” [4]
Deməli, İslami dəyərlərin bəşərə yayılması üçün əlverişli ictimai-siyasi şərait və camatın istəyi zəruri şərtlərdəndir. Lakin unutmayaq ki, İslamın mövcud cəmiyyətin tələb və istəklərinə cavab verməsi, dini dəyərlərin dünyaya yayılması üçün ümumbəşəri bir dövlətin qurulması İlahi bir rəhbərin varlığı zamanı gerçəkləşə bilər.
3. İmam Mehdinin (ə.f) İslamın ümumbəşəri bir dinə çevrilməsindəki rolu
Bu barədə nəql olunan hədisləri araşdırdıqda, ilahi dəyərləri dunyada dirçəldəcək şəxsin İmam Mehdi (ə.f) olması qənaətinə gələcəyik. Dünyada hökmranlıq edən bütün şeytani qüvvələri məhv edən, zülmün kökünü kəsən və ilahi qanunları bərpa edə yeganə şəxs odur.
Lakin unutmayaq ki, İmamın yuxarıda qeyd edilənləri həyata keçirməsi və İslamın ümumbəşəri bir dinə çevrilməsi üçün əlverişli şərait lazımdır. Çünki Allahın (sünnəsi) adət və ənənəsində camaatın məcburi və zorla islah olunması proqramı yoxdur. Cəmiyyət ilahi prinsiplərə əsaslanan hökumətin mahiyyətini dərk edib könüllü şəkildə qəbul etməlidir.
Qeybəçəkilmənin hikməti
Qeyd olunanları nəzərə alsaq, böyük ehtimalla qeybəçəkilmənin həqiqi hikməti lazımi ictimai-siyasi şəratin olmaması və bəşərin əqli yetkinlik dövrünə çatmamasıdır. Hədislərdə qeybəçəkilmənin hikməti barədə nəql olunan bu və ya digər amillərin mənşəyi məhz qeyd etdiyimiz bu iki amildən qaynaqlanır.
Bu qeyd olunanların hamısı bir ehtimal olaraq qalmaqdadır. Qeybəçəkilmənin həqiqi hikməti bəşəriyyət üçün yalnız İmam (ə.f) zühur etdikdən sonra aşkarlanacaq. İmam Sadiq (ə) qeybəçəkilmə barədə belə buyurur:
إِنَّ وجه الحکمة فی ذلک لا ینکشف إِلَّا بعد ظهورِه کما لا ینکشفُ وجه الحکمة لمَّا أتاهُ الخضر (ع) من خرق السَّفینة و قتل الغلام و إِقامة الجدار لموسى (ع) إِلا وقتَ افتراقهِما
“Xızırın (ə) gəmini deşməsinin, oğlan uşağını öldürməsinin və uçmaqda olan evin divarını təmir etməsinin hikməti Həzrət Musaya (ə) Ondan (Xızrdan) ayrılandan sonra məlum olduğu kimi, qeybəçəkilmənin hikməti də İmam Zamanın (ə.f) zühurundan sonra məlum olacaq.” [5]
Bəhruz Camal
Imamzaman.az
[1]Tövbə /33, Fəth /28, Səf / 9
[2]Ənbiya /105
[3]Rəd / 11
[4]Yunus / 99
[5] Biharul-Ənvar, c.52. səh.90,91, 113
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər